Manipud Managbasatayo

Sientipiko a Kinanengneng Masmasdaawak maipapan iti kunaenda a 6 porsiento laeng kadagiti Americano ti nasursuruan iti siensia. (“Panangmatmat iti Lubong,” Hunio 8, 1989) Gapuna nangaramidak iti bukodko a bassit a surbey kadagiti 12 a kalalainganna ti sapul a klase dagiti natataengan. Aminda malaksid kadagiti tallo ti nangikuna a ti init agrikrikos iti aglawlaw ti daga! Idi napagsaludsodanda no kasano kapaut ti panagrikos “dayta,” makagun-odak kadagiti sungbat a kas iti “tunggal 18 nga oras,” “24 nga oras,” “48 nga oras,” “365 a tawen,” ken “adu a lightyears.” Ti kakaruan isu daydiay nangibaga kaniak: “Saanen nga agrikrikos ti daga itatta . . . Adda laengen idiay pagrikosanna.”

J. W. H., Estados Unidos

Panangparmek iti Krimen Kas salaknib kadagiti manangsaneb, nabalakadan dagiti managbasayo a tulbekanda dagiti amin a ruangan ti kotse no agmammanehoda. (Abril 22, 1989) Daytoy mabalin a napeggad. No mapasamak ti aksidente wennno lumned iti danum, dagiti manangalaw marigatanda a mangala kadagiti biktima.

C. M., Netherlands

Ti Auto Club iti America imbagana iti “Awake!” a maysa laeng a kakasangapulo iti 1 porsiento kadagiti aksidente idiay Estados Unidos ramanenna ti ilelenned iti danum. Ngarud, kadagiti luglugar a nakaro ti krimen, dagiti peggad iti panagmaneho a saan a nakatulbek dagiti ruangan ket ringbawanna ti peggad iti saan a di pannakaruar iti kotse. Uray pay kadagita, dagiti manangalaw gagangay a mawayawayaanda dagiti naserraan a biktima babaen ti panangbuongda kadagiti tawa ti kotse.​—ED.

Homoseksualidad Masapul nga iyebkasko ti panagyamanko iti pannursuro ken pammaregta iti artikulo a “Homoseksualidad​—Apay Ketdin a Saan?” (Hulio 8, 1989) Daytat’ saan a panangatake iti tao no di ket iti pamay-an ti panagtigtignay ti tao. Agannayasak iti homoseksualidad. Kanayon a pampanunotek, ‘Pumadaka iti dayta wenno saanka a kasta.’ Ngem agarup lima a tawenen a napalabas, rinugiak ti nakipagadal iti Biblia kadagiti Saksi ni Jehova. Idi damo inlimedko dagiti parikutko. Ngem kamaudiananna nakisaritaak kadagiti dua a Kristiano a panglakayen, ket tinulongandak nga agbalin a kualipikado maipaay iti bautismo.

Nabigbigko ti pannakasapul iti asawa, ngem umuna pay a sukayek ti panagteppel. Babaen iti tulong ni Jehova ken ti makapabileg a pannursuro iti organisasionna, makapagtalinaedakto.

R. T., Netherlands

Mapagsasawan Pagyamanan iti artikuloyo maipapan iti mapagsasawan. (Hunio 8, 1989) Pulos a didak indayaw dagiti dadakkelko wenno impakitada kaniak nga inay-ayatdak, malaksid ti panangipaayda kadagiti material a bambanag kas iti taraon, kawes, wenno kuarta. Mabigbigko itan a ti panangmedmedko iti dilak mabalin a pinasayaatna koma ti kasasaad. Ti artikulo ket pudno a maintiempuan.

S. M., Australia

Naupayak iti artikulo. Nupay kasano karigat ti aldaw ti maysa a naganak, awan ti kalinteganna a mangibunton iti dayta iti ubing. Imbes a maysa nga artikulo nga agkuna a masapul nga agbaliw dagiti biktima, pangngaasiyo ta ikkandakami ti maysa nga artikulo a mangtaming iti parikut: dagiti nagannak.

M. W., Estados Unidos

Dagiti komentoyo ket nasayaat ti pannakailawlawagna. Nupay kasta, ti artikulo ket saan a nairanta a mangtaming ‘iti ramut ti parikut’ no di ket naisurat a mangtulong kadagiti agtutubo nga agballigi iti narikut a kasasaad. Ti artikulo kinunana pay: “Saan a mabalin nga ikalintegan ti dakes a panagsasao.” Dagiti biktima iti panangabuso dagiti nagannak ngarud masapul a mariknada a responsableda. Nupay kasta, babaen iti nainsiriban a panagtignay, dagiti agtutubo a biktima mabalin a makagun-odda ti kasayaatan iti daytoy dakes a kasasaad.​—ED.

Ti artikulo ket pudno a makaparegta, ket tarigagayak a nagun-odak koma dayta idi dumakdakkelak pay laeng. Ti agsioman nga amak pinagsasawannak iti adu a pamay-an. Riawannak ket mangisawang kadagiti bambanag a pudno a makapasakit. Maturogak nga agsangsangit. Tinulongannak ni Jehova a nanglipat iti napalabas, linipatak ti gurak, ket nagbiagak a maipaay Kenkuana.

Y. M., Estados Unidos