Panagpadles Babaen kadagiti Bituen Itatta
“MANIPUD iti White House agingga iti Wall Street, nakalatlatak ti astrolohia.” Kastat’ nangrugian ti maysa a report iti diario maipapan iti panaginteres ti publiko iti astrolohia idiay Estados Unidos.
Ti panangtukoyna iti White House mabalin nga ipalagipna iti managbasa ti kasta unay ti pannakaipablaakna a salaysay iti maysa a katulongan ti dati a presidente. Iti librona a For the Record, nagsurat ni Donald T. Regan:
“Ngangngani tunggal tignay nga aramiden dagiti Reagan bayat ti panagserbik a kas chief of staff iti White House ket umun-una nga ilawlawag ti maysa a babai idiay San Francisco a mangaramid iti panagpadles tapno masigurado a dagiti planeta ket maitunos ti lugarda iti maaramid.”
Aniaman ti maikuna maipapan iti dayta a banag, pudno nga ipanayagna ti kasta unay a panaginteres dagiti tattao iti Makinlaud a lubong iti astrolohia, a sadiay ti moderno a siensia mabalin a pinukawna koman ti maudi a pakaitan-okan iti astrolohia. Usigenyo dagitoy a kinapudno:
◼ Sigun iti AFA (American Federation of Astrologers), addada agarup 5,000 nga amin-tiempo, propesional nga astrologo ken mabalin a 50,000 a paset-tiempo a mangar-aramid iti dayta idiay Estados Unidos. Iti tinawen, dagiti naibayad iti panangbasa aggatad iti agarup $35 milion.
◼ “Tinawen idiay Francia . . . nasurok a 10 milion a tattao ti nagkonsulta iti maysa kadagiti nasurok a 30,000 nga opisial a mabigbigbig nga astrologo wenno medium,” kuna ti Toutes les Nouvelles, maysa a linawas a magasin iti Paris.
◼ Dagiti horoscopes ket kankanayon a paset iti 92 porsiento, wenno nasursurok ngem 1,500 nga inaldaw a pagiwarnak idiay Estados Unidos. Idiay Alemania, idi ti inaldaw a pagiwarnak, ti Weser Kurier, naliwayanna ti nangimprenta iti benneg ti horoscope iti maysa nga aldaw, naawat dagiti awag ti telepono manipud kadagiti managbasa “a di makaammo no agtalinaedda iti balay wenno rummuarda iti dayta nga aldaw, no ipuonanda ti kuartada, ken no sadino.”
◼ Umad-adu nga astrologo ti agturturongen kadagiti kompiuter. Ti Astro Intelligence iti Switzerland, kas pangarigan, makaipaay iti 20-panid a panangusig iti horoscope nga inyimprenta iti kompiuter a ti gatadna ket 55 Swiss francs ($36, E.U.). Maysa a nalatak a Briton nga astrologo mangiruar iti nasurok a 20,000 nga inaramid ti kompiuter a personal a horoscope iti tinawen iti agarup a £10 ($18, E.U.) ti tunggal maysa. Uray pay ti serbisio ti horoscope babaen ti panangidayal ti telepono magunggun-odanen kadagiti siudad a kas iti Nueva York. Ireport ti New York Telephone Company ti agarup maysa a milion nga awag a naawat iti binulan.
Apay Adda Pannakaawis?
Iti daytoy a panawen iti bukod a pakaragsakan, aniaman a mangikari iti nasaysayaat a pannakaawat iti kaipapanan iti biag wenno ti nasaysayaat a pannakaawat iti bagi ket maawat. Gapuna, kadagiti sasao dagiti managpaliiw, maysa kadagiti rason no apay a maawis dagiti tattao iti astrolohia ket “dayta kunaenna a maibagana ti maipapan iti kapapatgan a tao kadagiti isuamin, ti bagiyo met laeng.”
Ngem pudno kadi nga aramiden ti astrolohia daytoy? Ket, ti kapapatgan, pudno kadi a konkontrolen dagiti bituen ti biagtayo? Usigentayo a naimbag daytoy a kasasaad.