Manipud Managbasatayo
Dagiti An-anayen Agsagsagabaak manipud iti nakaro a di pannakakita iti adayo nanipud idi agedadak iti innem. Mariknak ti panagimon iti siasinoman nga addaan iti normal a panagkita ken ngangngani marigatanak a mangisuot kadagiti sarmingko—nakapuspuskol dagiti lenteda. Ti artikulo maipapan kadagiti naisangsangayan a kasapulan (Agosto 22, 1989) tinulongannak a makabigbig a dagiti dadduma, kas ti bulsek ken tuleng nga ubing a babai a ni Janice, ket nabaelenda ti nagserbi iti Dios nupay addaanda iti nakarkaro pay nga an-anayen ngem siak.
S. J., Francia
Dagiti Maton Ti artikulo ti “Agimtuod dagiti Agtutubo . . . ” maipapan kadagiti butangero (Agosto 8, 1989) dimteng iti umiso a tiempo! Idi napan a tawen ngangngani binutbutengdak ti intero a klase gaput’ pagarupda a saanak a “nakalma.” Ket angawendak. No dadduma masaktan ti riknak ta makaluaak. Yantangay addaanak ti kabbaro a pangrugian iti daytoy a tawen ti panageskuela, ipadasko dagiti dadduma a singasing.
Y. P., Estados Unidos
Natalged a Taraon Tinagiragsakko dagiti artikuloyo maipapan iti panangisagana iti taraon (Hunio 22, 1989), ngem maseknanak maipapan iti balakad a panangipaburek kadagiti mapagduaduaan a danum. Pudno a ti panangipaburek papatayenna dagiti bakteria, ngem ti danum kadagiti dadduma a luglugar, kas iti aw-away iti Makintengnga a Laud nga Estados Unidos, mabalin a nakaro ti pannakamulitna kadagiti nitrates. Ti panangipaburek iti danum ken ti pananginum iti dayta ket mabalin a nakapegpeggad unay, nangnangruna kadagiti maladaga. Dagiti nitrates ket saan a maikkat no maipaburek, gapuna ti panangipaburek pakaruenna laeng ti kaadu ti nitrates iti danum. Pangngaasiyo ta ipakaammoyo kadagiti managbasa a sukimatenda dagiti gubuayan iti danumda (no praktikal dayta) maipaay iti pannakamulit iti nitrate sakbay ti panangipaburekda iti dayta a maipaay nga inumen.
M. C., Estados Unidos
Imbaga ti U.S. Environmental Protection Agency iti “Agriingkayo!” a pudno a saan a nainsiriban ti mangipaburek iti danum nga inumen a namulitan kadagiti nitrates manipud kadagiti abuno wenno dagiti rugit manipud kadagiti kasilyas. Adut’ agpannuray iti kaadu ti pannakamulitna. Kadagiti rumangrang-ay a pagilian, mabalin a masansan a narigat, no saan pay ket nga imposible, ti siuumiso a panangsukimat dagiti managbasa kadagiti lokal a gubuayan iti danum maipaay iti linaonna a nitrate. Nupay kasta, ti panangipaburek kadagiti mapagduaduaan nga inumen a danum kaskasdi a nainsiriban pay laeng a panagannad kadagiti dagdaga a sadiay ti peggad iti pannakamulit iti bakteria nakarkaro ngem ti pannakamulitna iti nitrate.—ED.
Panaginnarem Ti Abril 22, 1989, nga artikulo maipapan iti panaginnarem ti nangriribuk kaniak. Uray ti bassit laeng a panaginniggem iti ima, panaginnarakup, wenno panaginnungngo mabalin a paaduenna ti tarigagay a lumbes pay iti dayta. Maparegta koma ti pareha a liklikanda ti di kasapulan a panaginniggem.
K. R., Estados Unidos
Adda pannakasapul iti kinatimbeng maipapan iti daytoy a banag. Dagiti napalabas nga artikulo nangnangruna a tinamingna ti tema maipapan iti panagtalinaed a nadalus. (Kitaenyo ti “Agriingkayo!” a Nobiembre 8 ken Disiembre 8, 1985.) Ket ti artikulo a matuktukoy namakdaar met a dagiti ebkas iti panangipateg saan koma a maaramid gapu iti inaagum a derrep. Nupay kasta, dagiti maitutop a panangipakita iti panangipateg sakbay ti panagasawa ket saan a naikkat iti Kasuratan. (Canta ni Salomon 1:2; 2:6; 8:5) Dagiti indibidual ngarud masapul a mangaramidda iti personal a pangngeddeng maipapan iti daytoy a banag, a laglagipenda ti rikriknada ken limitasionda a mismo, ti panangmatmat dagiti dadduma, ken ti obligasionda nga agtalinaed a nadalus iti imatang ti Dios.—ED.
Panangisardeng iti Panagsigarilio Pagyamanan iti artikulo a “Sangapulo a Pamay-an ti Saanen a Panagsigarilio.” (Hulio 8, 1989) Us-usarek dayta a tumulong iti maysa a tao a nabayagen nga agtabtabako ket dina maisardeng. Nangalaak met kadagiti dadduma a napadakkelen a kopia iti artikulo ket inkabilko ida iti pagtrabahuak, a sadiay adut’ lumablabas nga agsigsigarilio. Naawisda iti material ket dadduma ti mangiyap-aplikar iti nabasada.
R. L. B. S., Brazil