Kayo a Mamagtalinaed Kadagiti Tattao a Siririing!
Babaen ti koresponsal ti Agriingkayo! idiay Sweden
TI PANAGIPRENTA iti magasin nga Agriingkayo! nga ig-iggamanyo agpannuray iti kasta unay iti pamay-an a mangrugi iti kabakiran. Dagiti puon ti kayo mangipaayda kadagiti materiales a kasapulan a maipaay iti papel. Kastoy ti panangrugina. Ngem mangalatayo iti maysa a mangiladawan a panagpasiar ket kitaentayo no kasano ti panagbalin ti maysa a kayo a maysa a magasin a kas iti Agriingkayo!
Ti alikamen iti umuna a ladawan ket maysa a moderno a makina a pagpukan iti kayo, maysa a processor, nga agpukpukan. Dayta saan laeng nga agpukan kadagiti kaykayo no di ket ikkatenna pay dagiti sangsangana. Kasta met, ragadienna dagiti troso a pagbalinen a kalalainganna ti kaatiddog. Ti troso ket ibiahe dagiti trak wenno tren a mapan iti paktoria ti papel. Maysa a napnapno a trak ti mangitulod iti 20 tonelada iti maminsan. Idiay paktoria ti papel a binisita ti Agriingkayo! a maipaay itoy a report, maysa a panagitulod ti troso ti sumangpet iti kada 15 minutos iti agmalmalem. Dagiti isuamin a troso ti dagdagus a maidissaag babaen kadagiti dadakkel a mekanikal a sipit, kas iti makita iti naudi a ladawan iti panid 25.
Adu a kakasta a kaykayo ti kasapulan para iti maymaysa laeng a bilang iti Agriingkayo! Yantangay nakaad-adu a papel ti mausar iti tinawen, adu a kaykayo ti masapul a mapukan. Nupay kasta, idiay Sweden daytoy ket maysa a nakaan-annad ti pannakaaywanna a pamay-an. Dagiti autoridad ipalubosda laeng ti pannakapukan dagiti kayo no adda katupagna a lugar a mamulaan, ket iti kastoy a pamay-an, dagiti kabakiran ti Sweden agtultuloy a masuksukatan.
Ti diagrama ken ladawan iti panid 25 ipakitana ti pamay-an iti uneg ti makina ti papel. Ti pulp ket maipakan iti maysa a murdong ket ti papel rummuar iti sabali a murdong.
Ngem kasano a mapataud ti pulp? Umuna ti troso maputputed iti kalalainganna a kaatiddog, ket maikkat dagiti ukisna a maikabil kadagiti dadakkel a drum. Kalpasanna ti troso ti automatiko a maklase sigun iti kapuskol ken kaatiddog. Ti troso a makaabut kadagiti dadduma a pagalagadan ket maaramid a groundwood pulp iti paggilingan. Daytoy a pulp isut’ maysa kadagiti uppat a nagduduma a kita a nausar iti panangaramid iti papel iti paktoria ti papel. Ti nabati a troso ket masigsigit ket mausar a mangpataud iti thermomechanical pulp ken sulfite pulp. Ti maikapat a kita iti pulp agtaud iti maulit a mausar a papel.
Ti groundwood pulp ket mapataud babaen iti pananggiling iti troso nga addaan iti danum, a marumrumek iti nagbaetan dagiti dadakkel a gilingan. Ti resultana isut’ mekanikal ti pannakaaramidna a pulp.
Ti thermomechanical pulp ket mapataud babaen ti panangpapino kadagiti nasigsigit a kayo babaen iti kasta unay a dagsen ken pudot tapno dagiti ur-uratna ket masinasinada. Daytoy ti mangipaay iti at-atiddog ken nalaglagda nga urat ngem ti mapataud a mekanikal.
Ti sulfite pulp ket mapataud babaen iti kemikal. Daytat’ naisagana kadagiti dadakkel a pagkargaan a mangrunaw kadagiti sigsigit babaen ti pananganger kadakuada iti magnesium bisulfite, kas iti panaganger babaen iti pressure cooker. Daytoy ti mangpataud iti kalalagdaan a pulp kadagiti umuna a tallo a kita.
Ti maikapat a kita, ti pulp manipud iti nausar manen a papel, ket mapataud kalpasan a ti nausaren a papel ket matunawen ken madalusan iti dati a tinta ken pigketna.
Kamaudiananna, iti pagipulipolan maputputed dagiti papel sigun iti kadakkel a kayat ti suki ken kalpasanna maiyimpake. Dagiti nalpasen a rolio maklaseda sigun iti pagturonganda ket kalpasanna maipatuloddan babaen iti trak, tren, wenno barko a mapan iti suki.
Ti papel nakagtengen iti rotary press idiay pagimprentaan idiay Arboga. Ti rolio maipakan iti maysa a makina a mangputputed iti papel iti umiso a kadakkel para ti baro a napnuan kolor a mapakanan iti papel a pagimprenta iti Sweden. Daytoy a baro a pagimprenta kabaelanna ti mangimprenta iti 15,000 nga impresion iti maysa nga oras.
Tunggal bilang ti maipatulod kadagiti suskritor idiay Sweden ken iti sabali a daga. Mainayon pay, dagiti rineppet a kopia a maiwaras iti publiko ket maipatulod kadagiti ginasgasut a kongregasion dagiti Saksi ni Jehova iti intero a pagilian. Rinibribo a kopia manipud kadagitoy a reppet ti ibatbati dagiti Saksi no sumarungkarda kadagiti pagtaengan dagiti tattao wenno masabetda ida iti sadinoman a lugar.
Wen, ti puon ti kayo iti kabakiran nakagtengen iti maudi a pakausaranna—ti magasin nga Agriingkayo! Paliiwenyo met, a ti Agriingkayo! iramanna dagiti artikulo a mangipakaammo ken mangriing kadagiti managbasa iti kaipapanan dagiti paspasamak iti lubong sigun iti lawag ti padto ti Biblia. Ngarud daytat’ tumulong kadagiti managbasa a mangammo maipapan iti Namarsua ken ti panggepna maipaay iti kaaldawantayo. Ti kasta a pannakaammo tulongannatayo a makaawat iti kaipapanan iti mapaspasamak iti tiempotayo ken kasta met tulongannatayo a mangibangon iti natibker a namnama a maipaay iti nasaysayaat a masanguanan.
[Kahon/Diagram iti panid 25]
Ti “Paper Machine”
A. Ti pulp a makagteng iti makina ti papel ket kasla saan a napalet a digo ket nailatag a sumagmamano a metros ti kalawana iti maysa a wire-gauze conveyor belt. Iti daytoy a tukad ti pulp ket agarup 99 porsiento a danum. Kaaduan itoy a danum ket maikkatto bayat ti panagdaliasatna iti makina, a dayta dandani 70 metros ti kaatiddogna.
B. Ti kaadu ti danum ket makissayan iti agarup 60 porsiento iti pagpespesan. Mapespes ti danum babaen iti makina, a masansan babaen iti vacuum suction.
C. Iti pagbilagan, ti nakalatag a papel ket mapamagaan babaen kadagiti papudoten ti sengngaw a silindro.
D. Ti panangpitpit papinuenna ti papel, ket maaramid daytoy babaen ti panangipalabas iti papel iti nagbaetan dagiti silindro. Adda laeng 5 porsiento a mabati a danum inton ti papel ket malukoten kamaudiananna kadagiti rolio.
[Diagram] (Para iti aktual a pannakaurnosna, kitaem ti publikasion)
Umuna a kahon Pasetna a barot Pakapespesan Pakapamagaan Panangpasileng
Nabasa a murdong Panangrolio
[Dagiti Ladawan iti panid 26]
Ti sanga idiay Arboga, Sweden
Maipempenpen a rolio ti papel