Manipud Managbasatayo
“Greenhouse Effect” Ti format ken ti layout maipaay kadagiti artikulo maipapan iti greenhouse effect (Setiembre 8, 1989) ket nagsayaatan ti pannakaaramidda ta kayatmo nga itultuloy ti mangbasa iti dayta. Ti panangaramat kadagiti retrato ken dagiti kahon ti mangipaay kadakayo iti rikna nga addaankayo iti tiempo a mangbasa iti dayta, a maisupadi iti intero a panid a naprentaan. Nasarakak a diak kayat nga idisso ti magasin agingga a maturposko dayta. Kas banagna, kayatko nga iraman dagiti linaonna kadagiti dadduma.
G. G., Estados Unidos
Ti panagsurat, arte, ken ti panangiladawan ket simmayaatdan—iti kasta unay. Nangnangruna a naawiskami iti “Greenhouse” nga Agriingkayo! Nakabasakamin kadagiti sumagmamano a nakapuy ti pannakaisuratna nga artikulo maipapan iti isu met laeng a tema kadagiti magasin ken pagiwarnak ket saanda nga inlawlawag dagiti bambanag kadagiti termino a maawatan dagiti kaaduan a tattao. Anian a nagsayaatan nga alikamen daytoy a bilang a maipaay iti pannakisarita kadagiti tattao ditoy napudot a makin-abagatan a California!
Mr. and Mrs. J. P. M., Estados Unidos
Nakaam-amak a Gubuayan ti Organo Nakalkaldaang ti panangulit ti Agriingkayo! iti awan nakaibatayanna a sao-sao, isu a maawatan a kastoy gapu iti naited a kinapudno nga agparang a kasla ti Parliamento ti Europa ti nangipaay iti pammalubos kadagitoy a report. Dagitoy a sao-sao nakadangrandan iti natauan a pakaigapuan iti panagtagibe.
T. L., U.S. Information Agency, Estados Unidos
Ti Marso 22, 1989, a tema ti “Agriingkayo!” a napauluan “Nakaam-amak a Gubuayan ti Organo” ket naibatay iti maysa a resolusion nga impablaak ti Parliamento ti Europa, maysa a mapapati nga organisasion. Nupay kasta, dayta nga organisasion kunkunaenna itan a dayta ket biktima iti di umiso nga impormasion. Ti “Agriingkayo!” inimbestigarnan dagiti bambanag nanipud idi ket naammuanna a nupay no adda sumagmamano a nasayaat ti pannakaipablaakna a panangaresto idiay Guatemala maipaay iti panangilako kadagiti ubbing idi 1987, awan ti pammaneknek a dagiti ubbing ket nailakoda a maipaay iti panangiyakar ti organo. Imbes ketdi, dagiti orihinal a report kunaenda a dagiti ubbing ket magunggun-odanda ken mailaklakoda a saan a legal maipaay iti panangtagibe.—ED.
Panagtalinaed dagiti Gagayyem Agtawenak ti 11 años ket kayatko ti agyaman kadakayo maipaay iti artikulo nga “Agimtuod dagiti Agtutubo . . . Apay Nakarigrigat ti Mangtaginayon kadagiti Gagayyem?” (Setiembre 22, 1989) Addaanak iti kasayaatan a gayyem a basta din nangikankano kaniak. Babaen iti tulong ti publikasionyo, inkeddengko ti mangsapul iti pudno a gayyem.
B. S., Australia
“Down’s Syndrome” Ti pannakabasak ti kapadasan maipapan ken ni Suzy (Agosto 8, 1989) ti nangtignay iti kasta unay iti emosionko ta nagsangitak iti intero nga istoria. Apresiarek met nga impaay ni Jehova kadatayo ti naindaklan a namnama iti panagungar, ta napukawkon ti amak iti ipapatay. Ipaayko ti pusok ken karkararagko iti pamilia ni Suzy.
B. E., Estados Unidos
“Recycled Paper” Ti bilangyo a Setiembre 8, 1989, panid 29, naglaon kadagiti makapainteres a banag maipapan iti panangulit a panangusar iti papel, isu a mabalin a pakapasardengan iti kankanayon nga umad-adu a polusion iti aglawlawtayo. Kaskasdi, saan a maiprenprenta Ti Pagwanawanan ken Agriingkayo! iti recycled paper wenno naulit a nausar a papel. Siasinoman a mangitandudo iti maysa a pagalagadan ngem agtignay a maisupadi kadakuada ket mabalin a maibilang laeng a managinsisingpet.
F. S., Pederal a Republika iti Alemania
Ti naulit a nausar a papel a nasayaat ti kalidadna wenno umdas ti kaaduna a maibagay iti nakaad-adu a panagimprentami ket saan a magun-odan iti agdama. Yantangay ti “recycled paper” nangingngina iti 20 porsiento ngem ti papel a naaramid iti kabbaro a linabag, awan duadua a sumagmamanonto pay a tiempo ti mapalabas sakbay a daytat’ gagangay a mausar iti adu a panagiprenta. Nupay kasta, no mabalin, dagiti basura a papel manipud kadagiti pagimprentaanmi ket mailako a maipaay a mausar manen. Ket adu a naulit a nausar a materiales ti nausaren iti panangpataud kadagiti akkub dagiti natangken ti akkubna a publikasionmi.—ED.