Manipud Managbasatayo

Reporma a Katoliko Pagarupek a ti artikuloyo maipapan iti relihiuso a historia (Agosto 22, 1989) ket kaaduanna naisurat a naimbag. Nupay kasta, patiek a dakkel ti nagbiddutanyo iti adut’ saklawenna a panangpabasolyo ken ni Martin Luther manipud iti “panangbusor ti Katoliko iti Semitismo.” Ni Martin Luther nangisao iti pananggura kadagiti rasa dagiti Judio, nga inawaganna ida a “nababa ken nanengneng a tattao” ken inawaganna pay ida a “diablo.”

E. W., Estados Unidos

Ti artikulo naipamaysa kadagiti dakes nga ar-aramid ti Iglesia Katolika, saan a kadagiti nagbiddutan dagiti repormador a Protestante. Idi damo ni Luther binusorna ti bumusbusor ti Semitismo a Katoliko. Nupay kasta, ti Aleman a libro a “Die Juden und Martin Luther—Martin Luther und die Juden,” (The Jews and Martin Luther—Martin Luther and the Jews), ni Heinz Kremers, ilawlawagna: “Idi damo nainggayyeman ni Martin Luther kadagiti Judio, yantangay inanamaenna a makumbertedanto iti Kinakristiano apaman a ti pudpudno nga ebanghelio ket maikasaba kadakuada. Idi saan a natungpal daytoy, isut’ nagbalin a napasnek a kabusor dagiti Judio.”—ED.

Satanismo Nakigtotak iti akkub iti Oktubre 22, 1989, a bilang! Kankanayon a masarakak dagiti magasin a makapabileg. Ngem daytoy nga isyu ti mangkigtot ken mangriribuk kaniak. Saan kadi a dakes ti maaddaan kadagiti Sataniko a simbolo nga aniaman a porma iti pagtaengan ti maysa?

P. W., Estados Unidos

Ti tema a Satanismo ket pudno a makapakigtot. Nupay kasta, mapilitkami a mangpakdaar kadagiti managbasami maipapan kadagiti ‘pamay-an ni Satanas,’ ket no dadduma daytoy ramanenna ti panangiparang kadagiti tema a mabalin a saan a makaawis kadagiti dadduma. (2 Corinto 2:11) Nupay kasta, awan kadagiti teksto wenno ladladawan—agraman ti panangiladawan kadagiti simbolo a Sataniko—ti naiparang iti pamay-an a pangitandudo iti Satanismo wenno manggargari iti panagusiuso iti dayta. Imbes ketdi, dagitoy nagserbida a mangtulong kadagiti managbasa, agraman dagiti agtutubo, a manggura ken mangliklik kadagiti Sataniko nga ar-aramid.—ED.

Binasak a buyogen ti panagamak ken panagsidaaw ti reportyo maipapan iti Satanismo, ket apresiarek ti panangiturong iti atension dagiti managbasayo iti daytoy dakes a basol. Awan ti nakitak a pakakitaan iti Satanismo iti lugarko, ngem nupay kasta, kankanayon nga agsiputak kadagiti posible a panagparangda.

M. V. H., M.D., Estados Unidos

Kuto ti Ulo Kas maysa a nars iti eskuelaan, a mangtamtaming iti tema maipapan iti kuto ti ulo a kankanayon, umanamongak iti kaaduan iti artikuloyo. (Agosto 22, 1989) Daksanggasat, insingasingyo ti panangkuskos iti ulo a kas ti ad-adda nga epektibo a pamay-an iti panangagas iti ubing. Personal a makitak a ti panangkuskos iti ulo ti ubing tapno maikkat dagiti kuto ket nakaskasdaaw ken saan a nasken. Diak met irekomendar ti panangusar iti gas iti anit. Daytat’ makasabidong ken sumged, ket sigurado a ti ginasgasut a kaso iti kaadda ti kuto ti ulo ket nasaysayaat ngem ti mapuoran nga ubing.

C. M., Inglatera

Apresiarenmi dagitoy a komento. Ti “Agriingkayo!” dina irekomendar dagiti medikal a panangagas. Ngem yantangay ti pagiwarnakmi ket maiwarwaras iti sangalubongan ket basbasaen dagiti tattao a mabalin a saan a makagun-od kadagiti moderno a panangagas, basta impadamagmi laeng dagiti pamay-an iti pagtaengan a kunaen dagiti dadduma a naballigi iti panangagas iti kaadda iti kuto. Dagiti medikal nga autoridad, nupay kasta, dida irekomendar ti panangpukis iti buok nga aduan iti kuto, a matmatanda daytoy a makadadael iti rikrikna ken saan a nasken. Ti panangpukis iti buok ket mairekomendar laeng no ti buok ket nakaat-atiddog unay wenno agpipilet ket saanen a masagaysay. Kasta met, dagiti medikal nga autoridad itatta dida irekomendar ti gas a maiyapros iti anit. Kas pangarigan, ni Propesor David Taplin iti University of Miami School of Medicine imbagana iti “Agriingkayo!” a matmatanna daytoy nga ugali a kas saanen nga uso.—ED.