Surat iti Panangapresiar
DAGITI Saksi ni Jehova tinawen a mangimprentada ken agiwarasda kadagiti pinullo ribo a kopia iti Biblia ken liblibro a makatulong iti panangawat iti Biblia. Nabiit pay, maysa nga estudiante iti Biblia manipud Texas, E.U.A., ti nakaawat manipud iti 20-años a kaanakanna ti maysa a surat iti panangapresiar kadagiti kopia dagitoy a publikasion isu nga impaayna kenkuana. Ti sumaganad, iti pasetna, isu dagiti komentona maipapan itoy a literatura:
“Patgek nga Auntie Irene ken Pamiliana,
“ . . . Ala 1:00 t.b., gapuna diak sigurado no kasano ti kaatiddogto daytoy a surat, ngem padasek nga ibaga ti kayatko nga ibaga, ket kangrunaanna dayta ti panagyamanko kenka!
“Dagiti impatulodmo kaniak a liblibro ket pudno a nakaskasdaawda! Pudno a nalablabes pay ngem ti ninamnamak. Mangipaayda iti rekado dagiti isuamin; maysa a sangkabassit a ramen a mamagbalin iti dayta a makapainteres ken makagunggona a basaen.
“Ti Life . . . by Evolution or by Creation ket pudno a makaawis! Dagiti autor daytoy a libro masapul a mapasamanoda! Praktikal dagiti panangilawlawag, nainkalintegan, ken napudno. Ti paboritok a linea iti libro ket ‘ti biag a naparsua a di inggagara ket maipadis iti kompleto a diksionario a timmaud iti maysa a panagbettak iti pagimprentaan.’ Nakaskasdaaw ti pannakaisaona!
“Ti Paraiso [Mabalinyo ti Agbiag nga Agnanayon iti Paraiso a Daga] ket sabali pay a nagsayaatan ti pannakaisuratna a libro. Daytoy gupgopenna dagiti adu a bambanag a nabasakon ngem addaan adu nga estilo ken panagtalek ngem dagiti dadduma a material. Masapul a leppasek daytoy a libro.
“Ti Panakirinnason [manipud kadagiti Kasuratan] isut’ maysa a diksionario a kankanayon a tinartarigagayak. Nainkalintegan ti panagrasonna maipapan kadagiti kangrunaan a kapanunotan a diak naawatan idi; adda naibatay-Biblia a panangmatmat kadagiti agdama a topiko. Naan-anay a makapasiddaaw! Daytat’ maysa a libro a masapul a sukimaten; agyamanak manen.
“Ti Dagiti Saludsod [nga Iyimtuod dagiti Agtutubo—Dagiti Sungbat nga Epektibo] ket maysa a libro a praktikal itatta. Inusarko dayta a mamalakad iti ingungotek a gayyem nga addaan iti sumagmamano a parikut iti panag-“date.” Dagiti nainkalintegan a sungbat pudno a praktikalda kenkuana. Personal a nasarakak a makatulong dayta iti nasaysayaat a pannakaawatko iti bagik. Agyamanak kenka.
“Ket ti maudi ngem napateg met, isu ti New World Translation. Daytoy a bersion ket nalaklaka nga awaten ngem ti KJV [King James Version] ta kaykayatko ti agkonsulta iti dayta a masansan ngem ti sabali . . . Bendisionannaka ti Dios maipaay kadagitoy a nagpapateg a regalo! . . .
“No awan dagiti liblibro nga impatulodmo kaniak nalabit malmalmesakon iti panangay-ay iti bagik, ngem itan addaanak kadagiti instrumento a mangtaming iti kasasaadko, ket daytat’ maysa a banag a narigat a bayadan. Pagpannakkelnakanto ni Jesus. Ket pagpannakkelka met!
“Adu unay ti naammuak iti nakabibiit, makaparagsak! Pulos a diak impagarup a makapainteres unay ti Biblia ken makatignay. Itan addaanakon kadagiti natibker a rason a rumkuas iti basura ti biag a nangipurruakan ni Satanas kaniak, ket kayatko nga iraman dayta iti lubong. Agyamanak!
“Pangngaasiyo ta idanonyo ti pakomustak iti pamilia. . . .
“Ikarkararagankay amin!
Siyayaman,
Michael”