Manipud Managbasatayo

Mararaut dagiti “Rain Forest” Inkeddengko nga ipatulod ti bilang maipapan iti rain forest (Marso 22, 1990) iti Brazilian Institute for the Environment and Renewable Natural Resources. Simmungbatda: “Agyamankami iti panangipatulodmo iti maysa a kopia iti magasin nga Agriingkayo! a mangtaming iti pannakalukas dagiti kabakiran. Alaenmi daytoy a gundaway a mangkomendar iti kinamanagpanunotyo ken ti panangitudomi iti kinatan-ok ti magasin, isu a pudno a makatulong a mangpataud iti sangsangkamaysa a pannakaammo iti ekolohia.”

C. H. A. S., Brazil

Dati a Racista Diak maiyebkas no kasanot’ panangtagiragsakko iti estoria ni Virgil Dugué, a “Pinadasko a Balbaliwan ti Lubong.” (Marso 22, 1990) Daytoy ti nangipabigbig kaniak kadagiti epekto iti racismo ken no kasano ti kinaranggas dayta.

J. N., Estados Unidos

Subway ti Siudad ti Nueva York Kalpasan ti panangbasak iti artikulo a “Panagbiahe iti ‘Usok iti Daga,’” napilitanak a mangiyebkas ti, “Agyamanak.” (Abril 22, 1990) Kas inaldaw a managlugan iti subway, narigat a makita no ania ti pudno a kasasaad ti sistema ti tren—makaay-ayo. Ita nga agsapa bayat ti ipapanko iti trabaho, immulogak iti agdan ket nagluganak iti tren a naidumduma ti panangmatmatko.

M. H., Estados Unidos

Mamalmalo nga Assawa Maysaak nga agrepreporma a manangmalo iti asawa, ket ti Nobiembre 22, 1988, nga Agriingkayo! pudno a tinulongannak a makakita no kasano a nakaal-alas ti panangmalmalo iti asawa. Kalpasan ti panangbasak iti magasin, nagladingitak ket nagsangitak. Nagkararagak a palabasen koman ti pamiliami daytoy.

D. S., Estados Unidos

Panagduadua Agsursuratak maipapan iti artikulo nga “Agimtuod dagiti Agtutubo . . . Apay a Kasta Unay ti Panagduaduak?” (Abril 22, 1990) Agtawenak iti 33, ket tinulongannak ti artikulo iti kasta unay. Idi ubingak pay, nagbekkel ni nanangko. Maysa nga alkoholiko ti amak ket pinagsasawannak, inabusonak iti pisikal ken seksual. Kankanayon a lalaisennakami ket impariknana kadakami nga awan ti mamaaymi. Gapuna kas agtutubo, kasta unay ti panagduaduak. No dadduma, agsagabaak pay laeng iti panagduadua, ngem saanen a kas idi. Ti panagbalinko nga amin-tiempo nga ebanghelisador kasta unay ti naitulongna kaniak, ta nakitak ti bendision ni Jehova kaniak iti daytoy a trabaho. Ket no inay-ayatnak ni Jehova, kunak iti bagik, di masapul a mariknak nga awan ti mamaayko.

C. R., Estados Unidos

Makaparegta iti kasta unay ti pannakaammo a dadduma nga agtutubo ti addaan iti kastoy a panagrikrikna. Gapu ta nalawag ken detaliado dagiti pangarigan, naidiligko ti kasasaadko. Intudo met ti artikulo a ti pannakarikna ti kinatalged saan a dagdagus a mapataud ket nalabit sumubli ti panagduadua. Daytoy ket nasayaat a balakad. No makitak dagitoy a mamagkalma a sasao, agsennaayak, ket narigatko a lapdan dagiti luak.

C. T. Japan

Lubong nga Awanan kadagiti Paltog Dagiti nabiit pay nga artikuloyo maipapan kadagiti paltog (Mayo 22, 1990) riniribuknak. Ti sasao a “no ad-adu dagiti paltog, ad-adu dagiti panagpipinnaltog” pinatalgedanna dagiti agsasaruno a pangarigan ken inadaw a sasao a di umiso ti panangiladawanna iti pudno a kasasaad. Kas pangarigan, imbagayo a ti Switzerland ti kangatuan ti ik-ikutan ti tunggal tao a paltog idiay Europa. Ngem saan a dinakdakamat ti artikulo a ti Switzerland ti kababaan ti kaadu ti krimen ken panangpapatay iti lubong! Ti panangpabasol kadagiti paltog maipaay kadagiti parikut kadagiti nadangkes ket kasla di umiso ti nakaituronganna.

K. C., Estados Unidos

Apresiarenmi dagitoy a komento. Mabalin a masapul iti pannakalawlawag ti dadduma a kontrobersial nga estadistika a naisitar kadagiti artikulomi. Nupay kasta, ti “Agriingkayo!” saan a mangal-ala iti takder maipapan kadagiti napolitikaan nga isyu maipapan iti panangtimbeng iti paltog no di ket itantandudona ti masanguanan a “lubong nga awanan kadagiti paltog” iti sidong ti Pagarian ti Dios. Agingga iti dayta, dagiti Kristiano maiturongda babaen kadagiti prinsipio idiay Isaias 2:4 ken Mateo 26:52.—ED.