Maysaak a Kayaw
“Dawatem iti Diosmo ti isuamin tapno agtungpal a naimbag ti isuamin!” Dagidiay a sasao nagtaud iti maysa a gangannaet a, sumagmamano laeng nga oras sakbayna, binekkelnak—maysa nga awan gawayna a babai—a siiirut, a butbutngennak iti maysa a granada. Iti ruar, dagiti nalaing a tumiro a polis ti mangipatpaturong kadagiti paltogda iti nakatengngelak. Maysaak a kayaw iti maysa a banko idiay Siudad ti Guatemala!
Inriaw ti lalaki: “Di agkutkuti ti asinoman! Daytoy ket maysa a hold-ap! Tarigagayak ti isuamin a kuarta!” Inriawna iti polis: “Dikay pumalpaltog. Saan nga ay-ayam ti iggenko. No pumaltogkayo, saan laeng a sisiak ti matay. Dakam amin mapirpirsaykami!”
NAGKARARAGAK ken Jehova a Dios, a dawdawatek ti tulongna, ta mariknak a mapukpukawkon ti kinakalmak. Dinawatko kenkuana a tulongannak nga agbalin a nakalma ken maibturak ti rigat. Nalagipko nga isut’ maysa a nabileg a sarikedked a pagkamangan dagiti nalinteg maipaay iti pannalaknib.—Proverbio 18:10.
Idi napasublikon ti kinakalmak, nadlawko a dagiti empleado ti banko, agraman dagiti suki, nagballigida a rimmuar. Dagiti laeng security guards, ti lalaki a nanghold-ap, ken siak ti nabati. Kalpasanna napalubosan a pumanaw dagiti security guards.
Kalpasan ti sumagmamano a tiempo, uppat a di naarmasan a lallaki ti napalubosan a simrek, a mairaman kadakuada ti maysa a sikologo (kas naammuak kalpasanna) ken ti maysa a reporter. Isuda a dua nagsaludsodda iti lalaki, kas iti no apay nga agtigtignay iti kastoy. Isut’ simmungbat nga ar-aramidenna dayta a pagibales agsipud ta dadduma nga institusion dakes ti panangtratoda kenkuana.
Panangipabigbig iti Bagik
Iti dayta a punto nakalkalmaakon, gapuna ti sikologo rinugiannan ti nagsaludsod kaniak. Sinaludsodna ti nagnagan dagiti dadakkelko ken dagiti kakabsatko a lallaki ken babbai. Impabigbigko ti bagik a maysaak a Saksi ni Jehova ken inaunaak kadagiti lima nga annak isu a nangipasagepsepan dagiti Kristiano a dadakkelko kadagiti prinsipio ti Biblia.
Bayat ti panaglabas ti rabii, dagiti uppat a lallaki rimmuardan a sinaggaysa. Dinawatko iti nangkayaw kaniak a palubosannak a pumanawen. Saan ti sungbatna. Kunana pay: “Dika agdanag. Naimbagto ti isuamin. Iteddanto kaniak ti tarigagayko, ket makaawidkanton.” Simmungbatak: “Didanto mangted kenka ti aniaman. Papatayendata. Pangngaasim, paruarennakon.” Ngem kinunana: “Kaykayatko ti matay, ket no kasapulan matayta a dua.”
Idi nalagipko ti imbagana nga immuna, pinadasko ti nakirinnason kenkuana: “Addaak kadi idi sinaktandaka?” “Awanka,” kinunana. “Ngarud apay a masapul a bayadak ti diak inaramid?” inimtuodko. Isut’ simmungbat: “Gasat dayta. No masapul a matayta ditoy, matayta.” Ngem simmungbatak: “Saan a gasat dayta. Sikat’ mangpampanunot a masapul a matayka. Ni Jehova Dios iti ayat; pakawanennatayo. Ik-ikkannatay ti gundaway a mangisalakan iti bagitayo agsipud ta di nagbaliw ti panggepna. Pagbalinennanto daytoy daga a maysa a paraiso.”
Iti dayta a kanito adda simrek iti banko ket pinaregtana ti lalaki a nanghold-ap a sumukon, a kunkunana: “Agtulagta. Palubosam ni Siomara a pumanaw. Alaem amin a kuarta iti counter ken iti pagidulinan, ket aggigiddantay a rummuar tapno didaka saktan.” Ngem ti nangkayaw kaniak nagmadi.
Saan a Kakomplot
Limmabas dagiti adu nga or-oras. Kalpasanna, kellaat, nangngegko ti maysa a lalaki nga agsasao babaen iti megaphone, a kunkunana: “Sumukokan! Dikanto mangabak. Rummuarkan a nakatayag dagiti im-imam. Ibagam iti nanghold-ap a lalaki a sumukon. Saanka a kayaw. Maysaka a kakomplot! Dika agpampammarangen!” Nakigtotak, inyikkisko: “Aniat’ nangted kalintegan kenka a mangakusar kaniak?” Simmungbat ti timek: “Palpaliiwendaka, nakakalkalmaka. Siasinoman nga adda iti lugarmo saan a kasta ti panagtignayna.”
Idi nangngegko daytoy, dinakamatko ti nagan ni Jehova a nakapigpigsa ket nagkararagak. Kalpasanna kinunak iti nangakusar nga adda iti megaphone: “Aw-awitemto daytoy iti konsiensiam iti natda a panagbiagmo, ta ak-akusarennak iti banag nga awan pammaneknekmo.” Kalpasanna naammuak a maysa a diario ti Guatemala ken maysa nga estasion ti TV ti nangipadamag met a nalawag a maysaak a kakomplot.
Iti daytoy a kanito bimmalaet ti nangkayaw kaniak: “Sardenganyon ti mangrirriribuk kenkuana! Awan pakibianganna kaniak! Isut’ nasarakak ditoy, ket sursurotenna laeng dagiti bilinko.”
Nalagipko a ni Jehova dinatay inikkan ti espiritu iti kinatakrut no di ket espiritu ti kinatibker ken ti natalna nga isip. (2 Timoteo 1:7) Daytoy ti mangpatured kaniak, a kas met iti pannakaammo a diak agsolsolo. Nabang-aran ti unegko ken panunotko: ‘No agbiagtayo, ammotayo nga agpaay ken Jehova, ket no mataytayo, agpaay met kenkuana.’—Roma 14:8.
Kalpasan ti tengngat’ rabii inimtuodko manen ti nangkayaw kaniak no nagbaliwen ti panunotna. Idi simmungbat a saan, dinakamatko ti pamiliak. Imbagak kenkuana nga ay-ayatek ida, ta diak kayat ida a panawan uray no ammok a no pagayatan ni Jehova, makitakto ida manen iti baro a lubong. Iti dayta, imbaga ti nanghold-ap a lalaki nga agkararagak iti Dios ket dawatek kenkuana ti isuamin tapno agtungpal ti isuamin a naimbag.
Iti ruar ti banko, kasla adda kayat nga ibaga dagiti polis kaniak. Kamaudiananna naammuak a padpadasendak a paasitgen iti ruangan tapno matulongandak a rummuar. Ket nangngegko ida a nagkuna iti lalaki a nanghold-ap: “Alaem ti kuartan sadiay, ket palubosam ti babai a rummuar. Ammomi a ni Siomara awan biangna iti daytoy.”
Diak pagaammo a dagiti dadakkelko addada iti ruar, agraman dagiti dadduma a padak a Kristiano a kakaduak. Nakatulongda a nangilawlawag nga awan pakainaigak iti nanghold-ap a lalaki.
Kalpasanna adda baro a kalikagum ti nangkayaw kaniak: “Kayatko ti kotse ti radio-patrol nga addaan laeng ti maysa a di naarmasan a tsuper a mangipan kaniak iti kayatko a papanan, ket no addakamin iti natalged a lugar, palubosakon ti babai. No padasendak a paltogan, ti babai ken siak mapirpirsay.” Ngem impilitko: “Dimo pampanunoten dayta. Pampanunotem laeng ti matay. Ngem dagiti bagitayo kukua ni Jehova.”
Nawayawayaanen Kamaudiananna
Agarup alas kuatro iti agsapa, mangrugin a mariknak nga agsakitak. Nasuroken a 16 nga oras ti napalabas nanipud iseserrekko iti banko. Diak nakaturog, wenno nangan iti aniaman, ket ti timek iti megaphone pagnerbiosennakami.
Iti parbangon maysa a babai a maysa gayam a doktor ti nakisarita kaniak. Imbagana a tunggal lumabas a kanito dakes maipaay kaniak. Imbaga ti nangkayaw kaniak: “Pangngaasim ta agibturka pay bassit.” Kalpasanna immanamongen a mabalin nga adda sumrek a mangaywan kaniak. Ngem dagiti adda iti ruar a makinrebbeng iti dayta mabutengda ket dida kayat ti sumrek.
Agarup memos kuarto para alas otso, nagpigerger ti intero a bagik. Kalpasanna naulawakon ket natumbaakon iti datar, nga awan ti puotko. Idi nakapuotak, addaakon iti ruar ti banko! Tinulongannak ti maysa a polis a bimmangon, ket babaen ti tulong ti dua pay, nagtarayak iti kotse ti patrol ket naipanakon iti ospital. Natalimudawak manen idi dumsaagak iti kotse, ket diakon nakapuot agingga nga inagasandak. Kalpasanna naibaga kaniak: “Natalgedkan. Nagtungpal ti isuamin a naimbag. Aginanakan.” Napanunotko ni Jehova a Dios. Nagyamanak kenkuana maipaay iti panangtulongna kaniak a nagibtur iti rigat.
Kamaudiananna, dagiti dadakkelko imbagada kaniak no kasano ti iruruarko iti banko. Inruarnak ti nanghold-ap a lalaki, a padpadasennak a pabiagen. Ngem iti apagkanito, binaybay-annak ket tinaliawna ti banko. Iti dayta a kanito ti polis ti nangringbaw kenkuana, ket naalawakon. Di ammo dagiti polis no aniat’ nangtignay iti nangkayaw kaniak a mangbaybay-a kaniak ket tinaliawna ti banko idinto nga ammona nga awan ti adda sadiay.
Kalpasan ti uppat nga aldaw iti ospital, nawayawayaanakon, ket nagawidakon. Natignayak a naimbag iti panangipakita dagiti Kristiano a kakabsatko a lallaki ken babbai iti ayat. Agarup 60 ti nagtitipon iti pagtaengak. Anian a rag-ok a makaammo a ti pamiliak ken siak dikam agsolsolo! Mapampanunotko ti kalatko iti biag, nga isu ti panagserbi iti Dios, ken ti kinapudno dagiti sasaona: “Binirbirukko ni Jehova, ket isu sinungbatannak, ket inispalnak kadagiti amin a panagbutbutengko.” (Salmo 34:4)—Kas insalaysay ni Siomara Velásquez López.
[Ladawan iti panid 18]
Siomara Velásquez López