Maikaduapulo-Siglo a Fax

MANIPUD iti Nueva York agingga iti Toronto iti nakurkurang a maysa a minuto. Dayta ti kapartak ti fax. Ania dayta? Iti simple a panangdeskribir, daytat’ panangkopia—pannakikomunikar a di mangisasao iti uray maysa a sao. Idiay laeng Estados Unidos, nasurok a sangagasut a ribo a kapadpadana a makina ti magatang iti binulan.

Dagiti doktor mangipatulodda kadagiti reportda iti medisina, dagiti abogado iyallatiwda dagiti legal a papeles, dagiti managlako ti groseria ipaayda dagiti pedido a taraon, ket dagiti estasion ti radio umawatda kadagiti dawat a kankanta manipud kadagiti managdengngeg—amin babaen iti fax. Iti maysa nga oras laeng kalpasan ti pannakaipasngay ti maysa a maladaga, maysa a taga California nga ina im-fax-na pay ti lamma ti saka ti maladagana kadagiti apona a lakay/baket iti sabali nga estado.

Kasano ti Panagandarna?

Simple laeng. Ti laeng kasapulam isut’ maysa a telepono, maysa a plug iti diding, ken makina ti fax. Maysa a dokumento ti maipakan iti makina, a sadiay ti alikamen a pagsukimat basaenna amin dagiti nangisit a kolor iti panid, ipatarusna ida kadagiti elektrikal a bileg, ket iyallatiwna ida babaen iti linea ti telepono. Ti umawat a fax ipatarusna met dagiti bileg kadagiti nangisit a kolor ket iprentana a kapada nga interamente ti kopia.

Sadino ti Nagtaudan Daytoy a Teknolohia?

Idi 1843 maysa a managaramid ti relo ken imbentor a managan Alexander Bain nangaramid ken nangipatente iti damo a fax. Daytat’ saan a napintas nga alikamen no idilig iti estandarte itatta. Maysa nga addaan barot nga elektrikal a pagsurat ti naikabit iti ngudo ti agpalpallayug a pendulo iti rabaw ti maysa a bloke iti metal a tipo, isu a mangipaay kadagiti elektrikal a bileg iti barot ti telegrama. Ti sabali pay nga addaan barot a pendulo ti mangipatarus iti tunggal bileg iti nangisit a kolor iti sensitibo ti koriente a papel.

Idi 1907 napataud dagiti fax a mangusar iti agrikrikus a drum ken ti maysa a photoelectric cell a makabasa iti ordinario a naiprenta manipud iti mismo a papel a naibalkot iti drum. Nupay kasta, ti pannakaiyallatiwna babaen iti radio ket nabannayat ken masansan a malapdan.

Ti teknolohia idi 1980’s, a mangusar kadagiti fiber optics, digital transmission, ken signal compression, ti namagbalin a posible iti fax a makabasa ken makaiyallatiw iti kapartak a tallo a segundo iti tunggal panid iti sidong dagiti naisangsangayan a kasasaad. Itatta, ti kasaknapan a maus-usar a grupo dagiti makina addaanda iti praktikal a kapartak a panagiyallatiw a 45 segundos iti tunggal panid.

Kasano a Nausar ti Fax?

Dagiti kasapulan unay nga impormasion a gagangay nga itulod dagiti agpatnag a mensahero wenno serbisio ti koreo ket mabalinen a maitulod iti sumagmamano laeng a minutos. Dagiti napapateg a dokumento mabalin nga ipatulod iti fax ket mabalin nga adda iti im-ima ti maikadua a partido iti dandani isu met laeng a tiempo a kas iti kabayag iti panangsurat iti direksion iti sobre, panangselio, ken panangibuson iti dayta.

Idiay Canada maysa nga ubing ti nabiit pay a naresita nga addaan iti serioso a makapapeggad-biag a medikal a komplikasion a makasapul iti panangagas babaen iti dara. Kas Saksi ni Jehova, dagiti nagannak natibkerda iti relihiuso a pammatida nga iti aniaman a kasasaad awan ti mausar a dara. Nakiumanda kadagiti medikal a managsirarak, ket iti uneg ti sumagmamano a minutos dagiti artikulo ti naipatulod babaen iti fax iti doktor a mangay-aywan tapno tumulong iti medikal a grupo a mangtingiting kadagiti pamay-an iti panangtaming nga awan ti mausar a dara. Naraem ti pagayatan dagiti nagannak, ket ti maladaga sibaballigi a naagasan. Naawis ti pamilia ta ti medikal a grupo ti ospital inusarna itan ti fax kas pamay-an iti panangiraman kadagiti medikal a pagalagadan.

Uray pay dagiti pagiwarnak epektibo nga inusardan ti fax. Idi 1989, idi ti buyot nga Insik linapdanna ti iyaalsa ti estudiante idiay Tiananmen Square idiay Beijing, China, ti gobierno linapdanna ti telebision, radio, ken ti naiprenta a panangsaklaw. Dagiti telepono nabaybay-an a silulukat tapno taginayonen ti transaksion, gapuna inusar dagiti reporter ti fax a mangipatulod kadagiti damdamag ken ladladawan kadagiti tattao iti uneg ti China ken iti dadduma iti lubong.

Inusar met ti industria ti adbertising daytoy a teknolohia. Maysa a manedyer ti panaglako kinunana a no maipatulod dagiti fax ad, “dagiti mensahe ket dagdagus ken naganat. Mabasada a dagus.” Ngem no maipapan kadagiti addaan iti fax, daytoy a junk a fax pagsisilpuenna laeng dagiti alikamenda, a mangsinga iti pannakaawatda kadagiti impormasion a nasken iti negosioda.

Kas ipamatmat ti adda iti ngato, limitado laeng ti panangusar iti fax iti kapanunotanyo. Nupay kasta, kas iti kaaduan a baro a teknolohia, adda maysa sadiay a mangabuso iti dayta.

Ania ti Ipaay ti Masanguanan iti Fax?

Maysa nga enhiniero ti kompiuter makitana a dagiti fax pumarpartakda pay ken nalalaingda. Bayat a dagiti makina a maiparabaw laeng iti lamisaan gagangaydan iti negosio, ti panangusar iti fax iti lugar a mismo ti negosio sukatannanton ti pannakaitulod dagiti surat iti uneg mismo iti lugar ti negosio. Dagiti naan-anay kolorna a kapada a mismo, agraman dagiti maaw-awit a makina a fax, maparparang-aydan. Maysa a kumbinasion iti copier/printer/makina a fax nga iturturong ti maysa a personal kompiuter ti maysa a mainanama iti masanguanan. Maysa a kangrunaan a managpataud ipadtona pay a mabalin a magun-odanton ti maysa a personal a makina a fax a kas iti kadakkel iti memo pad iti $100.

Nupay no ti telepono mangipapaay pay laeng iti dagus a pannakisarita, dagita a mensahe no dadduma di umiso ti pannakaadawna wenno di umiso ti pannakaipatarusna. Ti fax maitulodna ti aktual a mensahe a naiprenta—ket napartak. Itan daytat’ napateg nga alikamen ti komunikasion iti biagtayo. Ti fax addan iti tiempotayo ket adtoy nga agtalinaed.