No Matay Dagiti Kanario
DAGITI canario ad-adda a sensitiboda iti makasabidong a gas ngem dagiti tattao. Gapu itoy a rason, idi napalabas dagiti minero ti karbon mangawitda iti nakatangkal a kanario iti uneg ti minas kas pamay-an a pangdillawda iti kaadda iti napeggad a gas. Babaen iti pannakapakdaarda iti ipapatay ti kanario, dagiti minero makalisida iti peggad agingga a ti minas umison ti bentilasionna. Babaen iti daytoy a pangibatayan a panunot, maawatan a naimbag ti maysa dagiti komento ni Dr. David Suzuki, maysa a mabigbigbig a sientista idiay Canada.
Gaput’ pannakaseknan iti nalawagen nga ipapatay ti planetatayo a Daga, inusarna ti sumaganad nga ilustrasion: “No mangala ti kanario iti pagminasan ti karbon ket natay ti kanario, di kunaen ti minero, ‘O, natay dayta a tumatayab ngem saanak met a tumatayab.’ Natay ti kanario gapu ta isut’ mangang-anges iti isu met laeng nga angin nga ang-angsenna.”
Kalpasanna innayonna: “No makitayo dagiti 22 a balyena a Beluga a matmatay iti Gulf of St. Lawrence ket napnapnoda kadagiti makasabidong a kemikal ta masapul nga agguanteska ken agmaskara tapno sagidem ida, no ibaga dagiti tattao kadatayo a ti maple sugar a kabakiran iti Quebec matayton iti uneg ti sangapulo a tawen, no ibaga dagiti tattao kadatayo a dua a kita ti mapukaw iti maysa nga oras ken 10,000 a seals ti natay idiay North Sea ket dida ammo no apay, sigurado . . . dagidiay dagiti kanario ket no pagarupentayo a datayo awantayo iti isu met laeng nga aglawlaw a kas dagidiay nga organismo, agmauyongtayo.”
Ni Dr. Suzuki pagsennaayanna ti kinapudno a dagiti politiko dida ikankano dagitoy a “kanario” ket dida makita ti kinaserioso iti kasasaad agingga a mangrugin a matay dagiti babassit nga ubbing a nakaad-adu. Kunaenna: “Gapuna ipalubostayo kadi a dagiti babassit nga annaktayo ti agbalin a kanariotayo?”
Dagiti pudno a Kristiano, nupay maseknanda, saanda a maupay. Ni Jehova, ti Namarsua iti daga, “a pinarsuana dayta a saan nga ongaong, a binukelna tapno isu ti pagyanan,” dinanto ipalubos ti awan panangikankanona, nabuklis a tattao a mangitultuloy a mangdadael iti aglawlawtayo iti agnanayon. Iti Saona, ti Biblia, ikarina a “dadaelenna dagidiay a mangdaddadael iti daga.”—Isaias 45:18; Apocalipsis 11:18.