Manipud Managbasatayo

Agsina a Nagannak Ti artikuloyo nga “Agimtuod dagiti Agtutubo . . . Kasano a Maibturak ti Panagsina dagiti Dadakkelko?” (Oktubre 22, 1990) ti kasla naaramid a maipaay kaniak, ket pinaregtanak. Maysaak a 16 años, ket nagsina dagiti dadakkelko. No dadduma malidlidayak ken maup-upay, ngem ni Jehova ti kasingedan a Gayyemko, ket tinulongannak iti kasta unay. Maawatak nga awan ti mamaay iti panagdanagko maipapan iti panagsina dagiti dadakkelko. Nakasarakak kadagiti nasasayaat a gagayyem iti uneg ti kongregasion Kristiano. Nasarakak met dagiti gimong ken dadduma a Nakristianuan nga ar-aramid a makapabileg.

D. B. G., Brazil

Problema ti Hubble Dagiti komentoyo iti “Panangmatmat iti Lubong” (Disiembre 8, 1990) ti kasla namagbalin a ti teleskopio a Hubble ket naan-anay a di nagballigi. Nupay kasta, naparmekdan dagiti dadduma nga immuna a parikut, ket mabalindan a makita dagiti bambanag a nalawlawag ngem dagiti agturong iti daga a teleskopio.

D. N., Estados Unidos

Saanmi nga inggagara nga awagan ti teleskopio a Hubble a “naan-anay a di nagballigi” no di ket impakaammomi ti kasta unay a pannakapaay ti sientipiko a komunidad idi ti kangrunaan a sarmingna nasarakan nga adda dipirensiana.—ED.

Dagus a Pannakapnek Pagyamanan iti kasta unay kadagiti artikulo a napauluan “Pananggun-od Amin iti Dayta. Pananggun-od Itan iti Dayta!” (Enero 22, 1991) Dagitoy ti kasla sungbat iti napasnek a karkararagko ket inikkannak ti adu a pagpanunotan. Nanangruna nga inapresiarko dagiti makasukisok-panunot a salsaludsod nga inyimtuodyo. Nakapatpategdanto dagitoy no masulisogak a mangsurot iti kurso a dagus a pannakapnek.

P. D., Estados Unidos

Nakomendaran ti Agriingkayo! Ti literatura a namagkaykaysa kadagiti tema a nakapatpateg iti kagimongantayo (kas iti medisina, sosiolohia, ken ecolohia), a maipaay iti saan a napolitikaan a pamay-an nga addaan ti bassit a narelihiusuan a kasasaad, ken agpannuray iti libro dagiti liblibro maipaay kadagiti panangilawlawagna—ti kasta a literatura ket nakarigrigat a masarakan kadagitoy nga al-aldaw. Ngarud idawatko a dayta ket opisial a mairekord kadagiti Opisial a Rekord ti gimong (Minutes) a ti Agriingkayo! maikkan iti pakaidayawan, nangnangruna ti bilangna a Nobiembre 8 ken 22, maipapan iti UFO’s ken ti resistensia.

N.B., Municipal Council of Tietê São Paulo, Brazil

Resistensia Impagarupko a naawatak dagiti sasao iti Salmo 139:14: “Idaydayawkanto [ti Dios] ta nakaam-amak ken nakaskasdaaw ti pannakaaramidko.” Ngem agyamanak kadagiti nalawag, ababa nga artikulo maipapan iti tema a “Ti Resistensiatayo—Milagro iti Panamarsua” (Nobiembre 22, 1990), ta naammuakon ti naan-anay a kaipapanan dayta a kasuratan! Ti lubong dagiti selula nga adda iti unegtayo makakayaw. Pudno a nakaskasdaaw ti ar-aramid ti Namarsuatayo. Agyamanak ti awan sardayna, agtultuloy a panagsirarakyo maipapan kadagitoy a kita iti tema. Dagiti artikulo pudno a makapabileg-pammati.

D. J., Estados Unidos

Basta makaparagsak dagiti artikulo ken edukasional. Bayat ti panangbasbasa kadakuada, diak maibturan a di idayaw ni Jehova ken no kasano a nakaskasdaaw ti panangaramidna kadatayo. Narigat a patien a pagarupen dagiti dadduma a tattao nga amin dagitoy ket napasamakda a naiparparna.

Y. S., Estados Unidos

Diak ammo no kasano ti panagyamanko kadakayo kadagidiay a nakaskasdaaw nga artikulo. Diak pay pulos nangnangngeg wenno nabasbasa ti maysa a panangilawlawag a nakasimsimple, ngem detaliado. Yantangay agsakitak iti maysa kadagitoy a saksakit a dinakamatyo, nasaysayaaten ti pannakaawatko iti ibagbaga ti doktor kaniak ken ti panangtamingko iti parikutko iti salun-at.

M. R. O., Brazil