Manipud Managbasatayo

Saksakit iti Pannangan Iti 15 años nakidangdangadangakon iti saksakit iti pannangan. Ti artikuloyo (Disiembre 22, 1990) ket nainkalintegan ken naayat ken sinalaysayna ti pagtataudan ti parikut—ti saan a panangraem iti bagi met laeng. Kayatko nga inayon a mabayag bassit ti pannakaisardeng ken pannakaisubli ti gagangay a panagandar dagiti tisyu ti piskel, ti pannakarunot dagiti tulang, ken dagiti parikut iti panagtunaw ken ti glandula nga endocrine a mabalin a resulta iti saksakit iti pannangan. Mabalin a makapaupay ken di makaparegta ti panagbalbaliw iti kalukmeg ken kadakkel, agbaliwbaliw ti rikna, malmalday, makarurod, ken salimuoten. No pagaammoyo no aniat’ ramanen ti pannakaimbag, nupay kasta, mammano nga agsublikayo.

L. B., Estados Unidos

Maymaysa a Naganak a Sangakabbalayan Natignayak a mangiyebkas iti panangapresiar iti artikulo nga, “Agimtuod dagiti Agtutubo . . . Kasanok ti Agragsak a Makipagnaed iti Maymaysa a Naganak?” (Disiembre 22, 1990) Ni nanangko isut’ ulo iti maymaysa a naganak a sangakabbalayan, ket daytoy nga artikulo ti nangipalagip kenkuana kadagiti kapadasanna a dimmakkel iti maymaysa a naganak a pamilia. Babaen iti panangsalaysayko iti kapadasak, makunak a dagiti singasing maipapan iti pannakisarita ken panangliklik iti panangsayang ket pudno nga epektibo, ket agtultuloy a gunggunggonaandak kas maysa nga amin-tiempo nga ebanghelisador. Kankanayonto nga agyamanak iti nagsayaatan a panangsanay nga inted ni Nanang kadakami. Kankanayon nga impaayna ti dayaw iti Dios gapu iti balligina kas maymaysa a naganak.

J. F., Estados Unidos

Di pay nabayag a natay ni tatang. Pagarupek a ti artikulo rimmuar nga agpaay kaniak iti umiso a tiempo. Makitak a pudno a mangipateg ni Jehova. Agyamanak manen!

L. J., Estados Unidos

Panagsirarak Babaen iti Animal Nasarakak ti Hulio 8, 1990, a bilangyo a makariro. Ti aso iti ladawan iti akkub ket malidliday unay; kasla agpakpakaasi iti maysa a mangaywan kenkuana.

S. P., Alemania

Ti aso iti ladawan ket binulod manipud iti lokal a paglakuan iti taraken ket umiso ti pannakaaywanna bayat ti panangikutmi. Kasla ti malmalday a kasasaad ket gagangayen kenkuana.—ED.

Ipapatay ti Anak Pagyamanan ti artikulo a “Ti Panangmatmat ti Biblia—‘Apay Innala ti Dios ti Anakko’” (Pebrero 8, 1991) Simmangpet ti artikulo babaen iti koreo iti dayta met laeng nga aldaw a ti asawak ken siak napukawmi ti damo nga anakmi babaen ti pannakaalis. Daytat’ makaipanamnama a pammalagip kadakami a saan a biang ti Dios ti pannakapukawna.

J. G., Estados Unidos

Mongoose Tinagiragsakko ti artikulo maipapan iti mongooses. (Marso 8, 1991) Nupay kasta, masapul ti panagannad iti panangikkat iti karkarna nga animal manipud iti nakaibulosanna ket taraknen dayta.

P. L., Estados Unidos

Apresiarenmi ti nasayaat a punto nga imbagam. Ti panangtaraken kadagiti dadduma a kita iti mongoose ket nadakamat laeng a mangiyilustrar iti kinapudno a saanda a naisigud a narungsot. Kinapudnona, iparit ti Estados Unidos ti pananggatang kadagiti mongoose nga agpaay a taraken.—ED.

Panaginum ken Panagmaneho Di pay nabayag a naawatko ti permisok nga agmaneho isut’ gapuna a nasarakak a makapainteres ti bilangyo a Pebrero 8, 1991. Makaparegta ti artikulo ket nangipaay iti nalawag a pakdaar. Awan ti mangayat nga aglugar iti kasasaad iti agtutubo a lalaki isu a nakapapatay ti maysa a tao! Ikkakto ti maysa a kopia ti mannursurok iti panagmaneho.

L. K., Alemania

Ti artikuloyo a “Sanguen dagiti Biktima dagiti Nagbasol” pagarubosenna ti luak. Tarigagayak koma a dagiti tattao saanda nga uminum ken agmaneho. Maispalda ti nakaad-adu a biag.

K. M., Estados Unidos