Watchtower ONLINE A LIBRARIA
Watchtower
ONLINE A LIBRARIA
Iloko
  • BIBLIA
  • PUBLIKASION
  • GIMONG
  • g91 9/8 pp. 11-14
  • Maysaak a Nasigo a Mannanakaw

Awan video-na ti napilim.

Pasensiakan, adda problema iti pannakai-load ti video.

  • Maysaak a Nasigo a Mannanakaw
  • Agriingkayo!—1991
  • Subtitulo
  • Umasping a Material
  • Saanak a Naipasngay a Kriminal
  • Apay a Pinilik ti Panagbiag iti Krimen
  • Nasarakakon ti Kinapudno
  • Panangasaba Idiay Pagbaludan
  • Naikkan iti Parol ken Determinado
  • Ti Panaglibas a Nagturong iti Kinapudno
    Agriingkayo!—1994
  • Ti Ngumerngernger a Leon Nagbalin a Naamo a Karnero
    Agriingkayo!—1999
  • No Kasano a ti Kinapudno Binaliwannak Manipud Kriminal a Nagbalin a Kristiano
    Agriingkayo!—1989
  • Ti Pannakabalin ti Kinapudno a Mamaglinteg
    Agriingkayo!—1991
Kitaen ti Ad-adu Pay
Agriingkayo!—1991
g91 9/8 pp. 11-14

Maysaak a Nasigo a Mannanakaw

BANG! Nagkallungogan ti mazo ti ukom iti korte. Dagiti sumaganad a sasaona, nupay naalumamay, kasla bugkaw kaniak. “Sentensiaanka iti 15 a tawen a pannakabalud.” Diakto pulos malipatan dagidiay a sasao wenno dagiti simmaruno a paspasamak. Dagus a kinaduanak ti polis manipud iti korte a nagsubli iti temporario a seldak isu a nagbalin a pagtaengak iti napalabas a tallo a bulan.

Nasapa pay iti sumaganad a bigat, naiturongak manipud iti seldak, iti maysa a pasilio a sumrek iti maysa a bassit a kuarto, a sadiay naikkanak iti lalat a sinturon nga agarup 13 centimetros ti kalawana a nahebilyaan iti likudan. Iti sango adda dua a dadakkel a singsing a metal isu a nakaposasan dagiti im-imak. Idi nakompleton daytoy, inturongdak dagiti dua nga opisiales iti sabali a pasilio, a sadiay nakikaduaak iti maysa a grupo dagiti lallaki a naposasan iti kasta met laeng. Nagtakder iti dua a linea dagiti lallaki, nga agaabay. Naipuestoak iti linea, ket maysa a kawar iti nagbaetan ti dua a linea ti naital-o ken nakandaduan iti maikatlo a singsing, iti sikigan ti sinturon a lalat.

Kalpasanna, innem nga opisiales ti nangiturong kadakami iti elebeytor a mangipan kadakami iti maysa a naisangsangayan ti pannakaaramidna a bus. Adtoyakon, nakatugaw a sumaganad iti mammapatay ken iti sango dagiti managlako iti droga, manangrames, ken naarmasan a manangloob. Dakam amin mapankam iti maymaysa a lugar—pagbaludan!

Ania, mabalin a panunotenyo, ti nangiturong kadagitoy a kasasaad? Palubosandak a mangisalaysay iti nalikudak ken dagiti paspasamak a nangiturong iti pannakabaludko.

Saanak a Naipasngay a Kriminal

Nagasawa dagiti dadakkelko kalpasan la unay ti Gubat Sangalubongan II, ket idi 1947 naipasngay ti inauna a kabsatko a lalaki. Dua a tawen kalpasanna naipasngayak, a sinaruno ti sabali pay a kabsat a lalaki 18 a bulan kalpasanna. Gapuna kadua dagiti tallo nga ubbing, nagbiahe iti nawatiwat dagiti dadakkelko manipud Richmond, Virginia, E.U.A., a nagturong iti estado ti Oregon iti Kosta ti Pacifico. Kalpasanna nagbiahekami a nagpaamianan a napan iti Estado ti Washington ket nagnaedkami iti siudad ti Bellevue. Nanipud idin, kasla normalen ti biag kaniak. Nupay saankam a nasinged unay a pamilia, kanayon nga addaankam iti iruruar nga agkakadua ken tumabunokami iti lokal a simbaan Luterano. Ti panagraem iti Dios, ken Jesus, ken iti Biblia gagangayen iti pamilia manipud Virginia. Idi Enero 1960 naipasngay ti inaudi a kabsatko a babai. Anian a ragsak ni nanangko a maaddaan kamaudiananna ti babai a tartarigagayanna a kanayon!

Nupay kasta, adda napasamak innem a bulan kamaudiananna a nangbalbaliw iti wagas ti panagbiagmi. Immakarkami manen, iti daytoy a tiempo iti napuskol ti kakaykayuanna nga ili iti Maple Valley. Simmardengkamin a makimisa, awanen dagiti panagpasiar ti pamilia, ket naginumen iti kasta unay ni tatangko. Pagladingitennak pay laeng a manglagip iti dayta nga iyaakar. Naup-upaykami iti napaut a tiempo kalpasanna. Patiek a daytoy nakatulong iti dakes a panagbiagko kas maysa a tin-edyer.

Apay a Pinilik ti Panagbiag iti Krimen

Ti Maple Valley, kas mapanunotyo laengen iti pannakangngeg iti naganna, saan a naragsak a lugar para iti maysa a nasukir a tin-edyer idi 1960’s. Gapuna mangaramidak iti bukodko a pagragsakan. Nalaka laeng daytoy kaniak gapu iti dakes a grupo dagiti tattao a pakikadkaduaak idiay eskuelaan. Kalpasan ti klase dagiti paspasamak agbalinda a pagraragsakan a panagbarbartek, a sarunuen ti panagdidinnanog ken droga. Iti adu kadagitoy nga okasion, agibar-ibarak nga agawid iti alas tres wenno alas kuatro ti parbangon—nabartek. Wenno diak agawid iti sumagmamano nga aldaw, a makipagnaedak kadagiti gagayyem. Nakaskasdaaw, ammok a dakes ti ar-aramidek, ngem kasla pulos a di madmadlaw dagiti dadakkelko.

No dadduma, agtakawkami tapno kitaenmi laeng no dikam matiliw gapu iti dayta. Naminsan, nagtakawak iti kotse ket naglugananmi a nagraragsakan. Ngem natiliwak ket binusbosko iti nasurok a nakatawen iti lokal a pagbaludan kadagiti delingkuente, ti Green Hill.

Idi nawayawayaanak idiay Green Hill, addaakon iti high school. Ditoy kinunak mausarkon dagiti bambanag a “nasursurok” iti ‘eskuelaan [dagiti ubbing] iti krimen.’ Diak idi nabigbig a ti pagsasao iti Biblia, “Ti dakes a pannakikuyog dadaelenna dagiti nasayaat a kababalin,” agep-epekton.—1 Corinto 15:33.

Agarup 16 años ti edadkon idi nasabetko ti maysa a naiduma, maysa nga agtutubo a lalaki a managan Jim Carley. Isu ken ti pamiliana nabiit pay nga immakarda iti ilik manipud Idaho. Mammano laeng ti makaammo kenkuana a kas Jim; ad-adda nga isut’ am-ammoda a kas Spud, nabirngasan iti nalatak a patatas iti Idaho. Isut’ maysa kadagiti Saksi ni Jehova.

Ni Jim ken siak ageskuelakami iti isu met laeng nga eskuelaan. Babaen ti panangpaliiwko kenkuana, madlawko nga isut’ naiduma kadagiti dadduma a gagayyemko. Makikadua iti siasinoman ngem saan nga agar-aramid iti dakes. Daytoy ti nangawis kaniak. Malagipko a naimbag ti panangibagana kaniak no apay a di agbayag daytoy dakes a sistema mabiiten ti panagpatinggana ket masukatan iti maysa a baro a lubong iti talna iti sidong ti turay iti nailangitan a Pagarian ti Dios.

Kayatko ti dumngeg iti ad-adu pay, gapuna timmabunoak iti “simbaanda,” a maawagan Kingdom Hall, iti namindua a daras. Daytoy ket idi 1967. Makapainteres ti nangngegko sadiay, ngem mariknak a daytoy a baro a lubong ket maysa a banag a nakaad-adayo pay iti masanguanan. Malaksid iti dayta, agragragsakak itan. Adda negosiok a mangipapaay iti aniaman a banag a tarigagayan ti sinoman—dagiti alikamen, paspaset ti kotse, stereos, telebision. Siempre, dagitoy a “bambanag” maipaayda babaen iti panagtakaw ken kinasikap. Apay a mapanak iti maysa nga iglesia a mangkondenar iti nakaay-ayat a “negosio”?

Iti edad a 19, simmardengakon nga ageskuela ket inkasarko ti nobiak idi addaak iti high school. Makatawen laeng kalpasanna siak ti aman ti maysa nga ubing a babai, ni Rhonda Jean. Gapu itoy a nainayon a responsabilidad, mariknak ti pannakasapul a mangipaay kadakuada ngem babaen laeng iti kinukusit a pamay-an.

Nasarakakon ti Kinapudno

Addaak pay laeng iti “negosio” a mangusar ken aglako iti droga, agtakaw kadagiti kotse, ken mangloob kadagiti pagtaengan, ngem dimtengen ti dakes nga epekto ti “negosio.” Naarestoak ket di nagbayag nasarakakon ti bagik a naposasan a nadeskribir a nasaksakbay ket addaakon iti dalanko a mapan iti pagbaludan. Iti daytoy a punto, agedadakon iti 20, addaan iti asawa ken innem a bulan nga anak a babai. Ket itan maibaludak iti sumaganad a 15 años! Nabigbigko a masapul a mangaramidak iti maysa a banag a mangtengngel iti biagko. Linagipkon ti naibaga ni Spud kaniak idi maipapan iti Biblia.

Idi addaak iti pagbaludan, rinugiak a binasa ti Biblia agraman dagiti pagsursuruan a bukod a sekular a liblibro. ‘Ti panangbasa kadagitoy a libro tulongandak a dumakkel,’ kinunak. Di nakatulong dagitoy. Awan ti nakatulong agingga a ti sabali a balud idiay Corrections Center idiay Shelton, Washington, inimtuodna no kayatko ti makikadua iti panagsasarita iti Biblia a kadua dagiti Saksi manipud iti lokal a kongregasion. Naibaga kaniak nga umayda iti pagbaludan iti linawas. Immanamongak. Nanipud idi damo a nasabetko dagiti Saksi, ammokon a ti masursurok manipud iti Biblia ken ti libro a pagadalan a Ti Kinapudno a Mangiturong iti Biag nga Awan Inggana ket pudno. Nasarakakon ti kinapudno!

Panangasaba Idiay Pagbaludan

No dadduma agingga iti 15 a balud ti makikadua kaniak iti linawas a panagadalko iti Biblia a kadua dagiti Saksi. Bayat daytoy a tiempo inkeddeng ti asawak a nagbalinakon a mauyong idiay pagbaludan, ket rinugiannan dagiti addang iti diborsio. Daytoy ti nangsubok iti kasta unay ti kabbaro a nasarakak a pammati.

Inkeddengko a pabilgen ti pammatik babaen ti pananggun-od iti ad-adu a naespirituan a taraon. Rinugiak a binasa ti intero a Biblia agraman dagiti publikasion iti Biblia, agraman dagiti daanen a bilang ti magasin a Ti Pagwanawanan ken Agriingkayo! Bumilbilegen ti pammatik. Kasta met, rinugiakon ti mangasaba iti siasinoman a dumngeg. Di nagbayag likliklikandakon dagiti adu a balud. No lagipek, makitak a daytat’ pudno a salaknib kaniak.

Nupay kasta, naaddaanak iti adu a makaay-ayo a pannakisarita kadagiti dadduma iti pagbaludan. Ti maysa isut’ maysa a padi a Katoliko, isu a nagkuna a maisursuroak kadagiti natiritir a bambanag ket dagiti tattao pagbalinenda a sawen ti Biblia ti aniaman a kayatda. Tapno paneknekan ti imbagana, kinunana nga ipakitana kaniak a kunaen ti Biblia nga awan ti Dios. Inawatko ti tukonna. Inukagna ti Bibliana iti libro ti Salmo ket inpuestona ti imana tapno ti tammudona malingdanna ti paset iti bersikulo. Kinunak: “Pangngaasiyo ta iyakaryo ti ramayyo tapno mabasak ti intero a bersikulo. Simmungbat: “Basta basaem laeng ti adda iti baba ti ramayko.” Binasak, ket iti pannakasdaawko kinunana: “Awan ti Dios.” “Adda dita,” kinunana, “daytat’ mangpaneknek iti dayta. Awan ti Dios!” Dinawatko manen ti panangkitak iti intero a bersikulo. Iti daytoy a tiempo inyakarna ti imana. Ket sadiay kinunana: “Ti maag kinunana iti pusona, Awan ti Dios.”—Salmo 14:1, King James Version.

Naikkan iti Parol ken Determinado

Gaput’ nabalbaliwan a kababalinko ken ugali, naikkanak iti parol kalpasan laeng iti dua a tawen a pannakabalud. Daytat’ idi maudin a paset iti 1971. Mabalin a pagarupen dagiti daduma a ‘nagbalinak a relihiuso’ tapno maallilawko laeng dagiti tattao a mangipapaay iti parol kadagiti balud. Ngem itan nakaruarakon ket ad-adda a determinado a saanen a makikadua manen kadagiti dakes a kakuyog. Ingagarak ti agnaed iti maysa a lugar nga ammok nga awan sadiay dagiti dati a kakaduak. Ammok a saan a nainsiriban a makikuyogak iti aniaman kadagiti dati a kakaduak. Liniklikandak met gapu ta nangngegda a nagbalinakon a kas iti “padi” a mangaskasaba iti siasinoman.

Intultuloyko ti panagadalko iti Biblia ken regular a tumabunoak kadagiti gimgimong iti Kongregasion ti Covington idiay Kent, Washington. Ti trabaho a panangasaba kankanayon nga adda pasetna iti biagko, ket idi 1972, nabautisaranak. Padpadasek a taginayonen ti kinatimbeng kadagiti sekular a bambanag ken maigiddato iti dayta agserbi iti Dios ken mangisuro iti anakko a babai iti Biblia. Isut’ dandanin agtawen iti tallo ket makipagnanaed ken nanangna, ti dati nga asawak. Daytat’ nagbalin a pudno a karit a nagpaut iti 16 nga atitiddog ken makaupay a tawtawen. Aminek, addada tiempo a mariknak a di napartak ti pannakaibanag dagiti bambanag a maitunos iti kayatko. Kalpasanna malagipko ti Nainkasuratan a balakad: “No mabalin, ken kas iti kabaelanyo agbiagkayo a makikappia kadagiti isuamin a tattao. . . . ‘Kuak ti pammales; Siak supapakakto, kuna ni Jehova.’”—Roma 12:18, 19.

Adu a rabii ti binusbosko a nagsangsangit ken nagkarkararag. Ti lubongko iti dayta a tiempo ket kas iti gagangay a panniempo iti Puget Sound, a nalidem ken mammano nga aginit. Ti pakaragsakak isu dagiti teokratiko nga ar-aramid, kas kadagiti gimgimong ken dagiti asamblea a sadiay maaddaan ti maysa kadagiti baro a pannakipagayam ken pabaruen dagiti datin a pannakipagayam. Iti maysa kadagita nga asamblea, nasabetko ti maysa a mangipaay iti napaut nga impresion kaniak, ket kalpasan iti dua a tawen a panagam-ammo iti maysa ken maysa, nagkasarkamin ken ni Mary Hughes idi Agosto 1974.

Idi Hulio iti sumaganad a tawen, naaddaankami iti anak a lalaki a pinanagananmi iti Trey. Ammok nga iti daytoy a panagasawa, kankanayon nga umuna ti Dios, nangnangruna ta nabiit pay a natudinganak a ministerial nga adipen iti kongregasion Kristiano. Gapu iti daytoy a pribilehio, nabigbigko a maysa a baro a ruangan ti gundaway ti nalukatan para kaniak iti panagserbi ken ni Jehova. Determinadoak a manggundaway a naan-anay iti dayta ken agtultuloy nga agserbi kenkuana. Sigagaget a nagtrabahoak, a kankanayon a nagtalekak iti Dios nga isuronak no kasano a rumang-ayak iti naespirituan. Iti kada makalikagumanak a mangaramid iti maysa nga assainmen, awatek, nga agtalekak kenkuana nga ikkannak iti kasapulan a sirib. Kalpasanna, idi 1987, natudinganak kas maysa a panglakayen.

Nasursurok bayat dagiti adu a tawtawen a ti panangaramid kadagiti bambanag iti pamay-an ni Jehova isu ti kanayon a kasiriban a kurso. Aganuskayo. Daytoy ad-adda pay a naipasagepsep kaniak idi, iti primavera iti 1990, ti anakko a babai a ni Rhonda, nga agtawenen iti 20, nagawid a makipagtaeng kadakami ket nagbalin a nabautisaran a Saksi. Naminsan manen naipalagip kaniak no kasano ti kinabileg ti kinapudno. Gapu iti legal a rason iti panangaywan, dikam pulos nagkitkita iti napalabas a walo a tawen. Binendisionan ni Jehova ti panangikagumaanko iti adu a tawtawen iti napalabas idi nagimulaak iti bukel ti kinapudno iti anakko a babai bayat ti ababa a panangbisita nga impalubos dagiti korte.

Kasla malagip amin ni Rhonda ti dandani amin a banag nga insuro ni Mary ken siak kenkuana maipapan iti Biblia bayat ti panagbisita. Ket anian nga impresion ti naipaay ti biag ti pamiliami kenkuana! Nanipud iti dayta nga aldaw ti primavera, rimmang-ay a nakaparpartak ni Rhonda iti pannakaammo iti Biblia.

No lagipek ti nalikudak ken ti biagko idi ken kalpasanna matmatak ti biagko itan, kunaek a ti panagbalin nga okupado iti panagserbi iti Dios pudno a kasayaatan a salaknib manipud kadagiti silo ni Satanas. Imbes a dayta mangigawid a birko a lalat a karimonko unay, mapadpadasakon ti kasta unay a wayawaya, pannakawayawaya manipud iti pannakaibalud a nagturong iti wayawaya gaput’ panagbalin a manangitandudo iti kappia a ministro iti Dios.—Kas insalaysay ni Tom McDaniel.

[Ladawan iti panid 12]

Idi maysaak a balud 626023 idiay Washington State correctional center

[Ladawan iti panid 13]

Ti pamilia ni McDaniel—Mary, Tom, anak a babai a ni Rhonda, ken anak a lalaki a ni Trey

    Dagiti Publikasion iti Iloko (1984-2025)
    Ag-log out
    Ag-log in
    • Iloko
    • I-share
    • Ti Kayatmo a Setting
    • Copyright © 2025 Watch Tower Bible and Tract Society of Pennsylvania
    • Pagannurotan iti Panagusar
    • Pagannurotan iti Kinapribado
    • Privacy Settings
    • JW.ORG
    • Ag-log in
    I-share