Manipud Managbasatayo
Panangriribuk Idiay Eskuelaan Ti artikulo nga “Agimtuod dagiti Agtutubo . . . Kasanot’ Aramidek Tapno Bay-annak nga Agmaymaysa?” (Mayo 22, 1991) ket nagsayaatan ti pannakaisaona. Idi ages-eskuelaak pay, kankanayon a pilpilitendak dagiti kaeskuelaak a maki-“date.” Idi nakitada a diak makikompromiso, sinardengandakon a rirriribuken. Itan diakon ages-eskuela ket agtartrabahoakon. Maysa a bulan a napalabasen, maysa a nataenganen a lalaki (37 años) nga adda iti pagtrabahuan ti immasideg kaniak ket imbagana kaniak a napintasak ket kayatna ti makiam-ammo kaniak. Agtawenak iti 18. Diak nakatagari iti apagkanito. Ngem kalpasanna inlawlawagko nga agad-adalak tapno agbalinak a maysa a Saksi ni Jehova ket nangipaimaak ti literatura kenkuana. Inawatna met ti panagkedkedko iti panangallukoyna.
M. L., Estados Unidos
Panaglaba iti Kawes Agsuratak tapno iyebkasko ti panangapresiarko iti artikulo a “Kastoy ti Pananglabami kadagiti Kawesmi . . .” (Enero 22, 1991) Gaput’ maysaak nga espesial payunir [maysa nga amin-tiempo nga ebanghelisador] nga agserserbi iti away, masapul a labaak dagiti kawesko babaen iti ima. Gaput’ nabasak ti artikuloyo, awan ti rasonko nga umapal kadagidiay addaan kadagiti automatiko a makina a paglaba.
M. M., Dominican Republic
World Cup Soccer Gaput’ nabasak ti reportyo maipapan iti kinakampeon iti World Cup soccer (Mayo 8, 1991), diak umanamong iti di nasayaat a panangiladawanyo itoy nga ay-ayam. Dagiti madanagan nga inna mabalin a pasardengenda dagiti annakda nga agay-ayam iti soccer gapu iti pannakabasada iti kinaranggas kadagiti estadium a pagay-ayaman.
S. B., Alemania
Dikam nangipinta iti di nasayaat a ladawan iti ay-ayam a mismo, wenno up-upayenmi dagiti agtutubo a mangtagiragsak iti ay-ayam iti natimbeng a pamay-an. Basta impadamagmi laeng ti ‘di nasayaat a ladawan’ nga impinta ti pagiwarnak kadagiti hooligan (butangero) a naikadua kadagiti dadduma nga agrayo itoy nga ay-ayam. Nainsiriban ti panagannad dagiti Kristiano maipapan iti itatabuno kadagita nga okasion a sadiay mainanama a mapasamak ti kinaranggas.—ED.
Mision a Panagsusaid Ti kapadasan ni Yoshimi Aono (Enero 22, 1991) ti kasla naisurat a maipaay ken tatangko. Kas ken ni Yoshimi Aono, ni tatangko nakalugan iti maysa a submarino idi gubat. Nakitana ti ipapatay dagiti sumagmamano a miembro iti Kaiten Special Attack Corps. Ti kapadasanna iti gubat ti namagbalin kenkuana a mamati nga awan ti Dios wenno ni Buddha. Nanipud iti nagbalinak a maysa a Saksi ni Jehova, ninamnamak ti gundaway a mangibaga ken tatangko maipapan iti ayat ti Dios. Ti artikulo sinungbatanna ti kararagko. Ipatulodkonto a dagdagus dayta kenkuana.
A. S., Japan
Format ti “Agriingkayo!” Kayatko nga iyebkas ti panangapresiarko iti napintas a baro a format iti Agriingkayo! a nangrugi iti Enero 8, 1991, a bilang. Yantangay agtartrabahoak iti maysa a departamento ti teknikal a publikasion, dagdagus a nadlawko ti nagbaliwan ti layout, fonts, ken dagiti kolor. Nakitak bayat ti 20 a tawen no kasano ti panagbaliw daytoy a magasin a maitunos iti tiempo tapno agbalin nga ad-adda a napnuan kolor ken makaawis nga alikamen a mangiyadani kadagiti tattao ken ni Jehova. Nakaipaimaak ti maysa a bilang iti katrabahuak gapu laeng kadagitoy a napipintas a baro a nagbalbaliwan!
D. A., Estados Unidos
Artikulo Maipapan iti Animal Naimpusuan ti panagyamanko kadagiti artikulo maipapan kadagiti animal ken ti nakaparsuaan. Idi damo diak pudno nga ikankano dagidiay nga artikulo, nupay kankanayon a madlawko a dagiti ladawan ket napipintasda ken napnuan kolor. Maysa nga aldaw adda nangdakamat iti maysa nga artikulo a nabasana maipapan iti maysa nga antelope a maawagan kudu. (Pebrero 22, 1991) Daytoy ti nangtignay iti interesko a mangbasa iti artikulo. Rinugiak metten a binasa dagiti dadduma nga artikulo, kas ti maysa maipapan iti mongoose. (Marso 8, 1991) Dagitoy nga artikulo tinulongandak a “makakita” ken Jehova babaen iti parparsuana.
B. T., Estados Unidos