Ti World Council of Churches—Panagtitinnulong Wenno Riribuk?
Babaen ti koresponsal ti Agriingkayo! idiay Australia
NAGLUKAT ti asamblea idi Pebrero 7, 1991, iti makaay-ayo a paraangan ti Australian National University idiay Canberra, Australia, ti kabesera ti pagilian. Agarup a 4,000 a gagangay a tattao ken 316 a papangulo iti simbaan manipud iti nasurok a sangagasut a pagpagilian ti timmabuno. Ti napalabas nga innem a panagtataripnong ti WCC (World Council of Churches) ket naangay kadagiti nagduduma a pagilian iti las-ud ti 35 a tawtawen, manipud idi 1948 idiay Amsterdam, ti Netherlands.
Ania ti WCC? Saan a dakkel a simbaan dayta. Daytat’ maysa a timpuyog dagiti simbaan, maysa a bagi a maipaay iti panagsisinnukat iti kapanunotan. Ti opisial a palawag iti panangabrasa ket impaay ti primero ministro ti Australia, ni Robert J. Hawke—nupay impudnona a mismo nga isut’ maysa nga agnostiko. Ti napili a tema para iti daytoy dua a lawas nga asamblea ket naiyebkas iti porma ti kararag: “Umayka Nasantuan nga Espiritu—Pabaruem ti Intero a Sangaparsuaan!”
Nupay kasta, ti di ninamnama a paspasamak iti lubong inyadayuna ti rikna ken pananginanama dagiti delegado manipud iti panangpabaro ti nasantuan nga espiritu ket naiturongda iti politika ken iti moralidad ti gubat idiay Persian Gulf. Daytoy nasapa a pannakaisiasi manipud iti espiritual a panagpapatang pinagsiddaawna ni Sir Paul Reeves, maysa nga arsobispo nga Anglicano ken sigud a gobernador-heneral ti New Zealand: “Kadagiti panagtataripnong a kas iti daytoy, maguyugoytayo nga agsisinnupiat maipanggep iti pannakabalin, isu a bassit pakainaiganna iti Nasantuan nga Espiritu.” Pinagreggetan ti arsobispo ti Canberra nga ikalintegan ti pateg ti di panagtutunos: “Ti panagkaykaysa isut’ sagut ti Nasantuan nga Espiritu. Ti nasalun-at a panagduduma isut’ sagut ti isu met laeng a Nasantuan nga Espiritu.”
Ni David Gill, sekretario heneral iti Australian Council of Churches, ti nangiyebkas met iti pannakaseknan nga agpeggad ti integridad a mismo ti WCC, a napaliiwna nga uming-inget a supsuportaran ti organisasion dagiti grupo nga agsapsapul iti panagbalbaliw ken iti gundaway a pangiyesngawanda iti pakaseknanda.
Ordinasion dagiti Babbai—Ad-adda a Riribuk
Napagsasaritaan met ti akem dagiti babbai iti moderno a simbaan, ngem di naragsakan dagiti babbai. Kaaduan kadakuada ti nangibilang iti daytoy a kas iturturayan dagiti lallaki. Sirururod a ginupgop daytoy ni Lois Wilson iti Canada: “Nalulok ti politika iti WCC ket ti panagkunak saan a dayta ti adda iti panunot ni Jesus.” Aniat’ nangyeg iti daytoy a pannakaupay? Kunaen ti diario a Canberra Times: “Di maragsakan dagiti babbai ket agpaknida iti banyo gapu ta napangtaanda tapno malappedanda nga umawat iti nominasion iti kangrunaan a komite ti konsilio. Naballaagan ti maysa a babai nga isut’ mailaksid iti simbaanna tapno maupay nga umawat iti nominasion.”
Aniat’ Napasamak iti Naespirituan a Tema?
Naseknan dagiti dadduma iti di panangipaganetget ti asamblea iti Biblikal wenno teolohikal a kababagas ti trabahona. Saan a nakaskasdaaw daytoy, ta kaaduan a napagsasaritaanda ket maipanggep iti politika. Kinapudnona, iti naiyimprenta a report maipapan iti asamblea, nakasarak ti managbasa iti maymaysa laeng nga ababa a panangtukoy idiay Biblia.
Kunaen ti narelihiusuan a magasin a National Outlook a ni David Gill “iyanninagna ti kapanunotan dagiti dadduma a timmabuno kadagiti panagtataripnong ti WCC iti nabiit pay a napalabas, ken isu, kas kinuna ti maysa a tao iti nabiit pay, addaan met iti dakkel a namnama ngem di natungpal.”
Maisupadi iti dayta, idi a dagiti tao a mabisin ken mawaw iti naespirituan nakalangenda ni Jesus, nagawidda nga addaan pannakapnek. Nagawidda a naliwliwaan: “Umaykayo kaniak, dakayo amin nga agrigrigat ken madagdagsenan, ta paginanaenkayto. Alaenyo ti sangolko kadakayo ket agsursurokayo kaniak, ta siak naemmaak ken napakumbabaak iti panagpuspusok, ket makasarakkayto iti inana a maipaay kadagiti kararuayo. Ta ti sangolko nalaka ken nalag-an ti awitko.”—Mateo 11:28-30.