Dagiti Nasken a Petsa iti Ekumenikal a Ganuat

1844: Rugi ti ganuat dagiti denominasion nga idi agangay binuangayna ti Young Men’s ken ti Young Women’s Christian Association.

1846: Damo nga internasional a kumperensia dagiti denominasion ti Evangelical Alliance, a naangay sadi Londres, Inglatera.

1908: Naporma ti Pederal a Konsilio dagiti Iglesia ni Kristo ti America. Idi 1950 isut’ nagbalin a Nasional a Konsilio dagiti Iglesia ni Kristo ti Estados Unidos ti America.

1910: Naangay idiay Edinburgh, Scotland, ti Umuna a Sangalubongan a Kumperensia dagiti Misionero, a “talaga a nangrugian ti moderno nga ekumenikal a ganuat.”—Encyclopædia Britannica.

1919: Inlaksid ni Papa Benedicto XV ti awis nga iraraman ti Iglesia Katolika a makitungtong iti Protestante nga Iglesia Episcopal maipapan iti pammati ken mision (dagiti naggigiddiatan dagiti iglesia iti doktrina ken ministerio).

1921: Naporma ti Internasional a Konsilio dagiti Misionero.

1925: Naangay idiay Stockholm, Sweden, ti umuna nga internasional a kumperensia ti Sapasap a Nakristianuan a Konsilio iti Biag ken Aramid (a pangadal iti komon a pagalagadan ti iglesia kadagiti ekonomikal, politikal, ken sosial nga isyu).

1927: Umuna a sangalubongan a kumperensia ti “Pammati ken Mision” a ganuat dagiti iglesia, a naangay sadi Lausanne, Switzerland.

1928: Inruar ni Papa Pio XI ti enciklikal a Mortalium animos, a nangiparit kadagiti Katoliko a mangsuporta iti ekumenikal a ganuat.

1937: Ti kumperensia iti “Biag ken Aramid” a naangay sadi Oxford, Inglatera, ken ti kumperensia iti “Pammati ken Mision” sadi Edinburgh, Scotland, inanamonganda a maporma ti probisional a komite a mangbukel iti sangalubongan a konsilio dagiti iglesia. Naitantan daytoy a proyekto gaput’ ibebettak ti Gubat Sangalubongan II.

1948: Naporma ti WCC (World Council of Churches) idi naangay ti nangbukel nga asamblea idiay Amsterdam, Olanda. Gistay 150 nga iglesia Protestante ken sumagmamano nga iglesia ti Dumaya nga Orthodox ti nakimiembro. Nanipud idin, ti WCC regular ti sapasap nga asambleana (1954: Evanston, Illinois, E.U.A.; 1961: New Delhi, India; 1968: Uppsala, Sweden; 1975: Nairobi, Kenya; 1983: Vancouver, Canada).

1960: Inyusuat ni Papa Juan XXIII idiay Vatican ti Secretariat a Mangpatanor iti Nakristianuan a Panagkaykaysa. Daytoy ti “damo nga opisial a panangbigbig ti Iglesia Katolika Romana iti kaadda ti ekumenikal a ganuat.”—Encyclopædia Britannica.

1961: Nakikaykaysa iti WCC ti Internasional a Konsilio dagiti Misionero. Nangrugi ti Vatican a nangibaon kadagiti opisial a Katoliko a managpaliiw kadagiti sapasap nga asamblea ti WCC.

1964: Impablaak ni Papa Paulo VI ti “Decrito iti Ekumenismo” ti Maikadua a Konsilio ti Vatican, a nangsalaysay iti beddeng ti iraraman dagiti Katoliko iti ekumenikal a ganuat.

1965: Ti papa ken ti patriarka nga Orthodox agpada a winaswasda ti ti panangilaksid ti maysa ken maysa kadakuada dagidi panguluenda idi 1054.

1968: Ti SODEPAX (Joint Committee on Society, Development, and Peace) inyusuat ti Vatican ken ti WCC.

1969: Sinarungkaran ni Papa Paulo VI ti sangalubongan a hedkuarter ti WCC, idiay Geneva, Switzerland. Inggunamgunamna, nupay kasta, nga isut’ suno ni apostol Pedro ket dina pay ngad tiempo a pagtutungtonganda ti isusugpon ti Iglesia Katolika iti WCC.

1980: Nawaswas ti SODEPAX.

1986: Inorganisa ni Papa Juan Paulo II ti ekumenikal a “Sangalubongan nga Aldaw ti Panagkararag iti Talna” idiay Assisi, Italia, a nagtitiponan dagiti espiritual a lider dagiti kangrunaan a relihion ti lubong tapno agdawatda iti talna sigun kadagiti nagduduma a ritualda.