Problema a Sanguen ti Iglesia Katolika

“BARO A PENTECOSTES.” Kastat’ namnama nga inyebkas ni Papa Juan XXIII iti konsilio ekumenikal a nangrugi idi 1962 ket naawagan Vatican II. Ninamnamana a daytat’ naespirituan a mangpabaro kadagiti Katoliko ken mangyeg kadagiti panagbalbaliw tapno maluktan ti panagkaykaysa ti Kakristianuan.

Ngem ti kakasta nga ideya ti aggiornamento (pannakapabaro) saan a nagustuan dagiti dadduma a prelado ti Vatican. Impadamag ti The New Encyclopædia Britannica: “Ngem, ti desision ti Papa di nagustuan ti konserbatibo a Curia, ta kumbinsidoda a rimmang-ay ti iglesia iti sidong ti liderato ni Pio XII ket awan pagimbagan a nakitada kadagiti panagbalbaliw a nasirmata ni Juan. Dadduma a kardinal ti Vatican kinapudnona inusarda amin a bilegda a mangitantan iti konsilio agingga a pimmusay daydi lakay sada siuulimek a linipatan daydi proyekto.”

Dekrito iti Ekumenismo ti Vatican II

Immabut ti biag ni Papa Juan XXIII agingga a naangay ti Maikadua a Konsilio ti Vatican, ngem di nagbayag natay, idi Hunio 1963, naunday pay a tiempo sakbay a nalpas ti konsilio idi Disiembre 1965. Ngem, impablaak ni Papa Paulo VI idi Nobiembre 21, 1964, ti Dekrito iti Ekumenismo. Kuna ti introduksionna: “Ti isusubli ti panagkaykaysa dagiti amin a Kristiano isut’ maysa a kangrunaan a pakaseknan ti Maikadua a Konsilio ti Vatican.”

Nagpateg, ta insurat ni Jesuita a padi Walter M. Abbott iti The Documents of Vatican II: “Ti Dekrito iti Ekumenismo minarkaanna ti naan-anay nga iyeentra ti Iglesia Katolika Romana iti ekumenikal a ganuat.” Umarngi met, sigun iti paulo a “Ti Romano Katolicismo kalpasan ti maikadua a Konsilio ti Vatican,” sipopositibo a kinuna ti The New Encyclopædia Britannica: “Pormal nga iniddianen ti Iglesia Katolika Romana ti takderna nga ‘is-isu ti pudno nga iglesia.’”

Ngem talaga aya nga iniddianen ti Iglesia Katolika ti takderna? Ania dagiti kondisionna tapno maragpat ti panagkaykaysa? Kalpasan a sinalaysayna ti beddeng ti pakiramanan dagiti Katoliko kadagiti ekumenikal nga aktibidad, inkeddeng ti Dekrito iti Ekumenismo: “Daytoy sagrado a Konsilio idagadagna kadagiti miembro a liklikanda ti aniaman a parawpaw wenno ubbaw a regta. . . . Ti ekumenikal nga aktibidadda awan sabali no di ti naan-anay ken napasnek a Kinakatoliko, nga isut’ kinasungdo iti kinapudno nga inawattayo kadagiti Apostol ken Amma, ken maitunos iti pammati a sigsigud nga inannurot ti Iglesia Katolika.”

Dagiti Tuben iti Panagkaykaysa

Kinapudnona, ti Iglesia Katolika Romana dina iniddian ti takderna nga is-isu laeng ti pudno nga iglesia. Kuna ti Dekrito iti Ekumenismo ti Vatican II: “Babaen laeng iti Iglesia Katolika ni Kristo, nga isut’ sapasap a tumulong iti pannakaisalakan, a magun-odan ti naan-anay a pamuspusan iti pannakaisalakan. Mamatikami a ti laeng apostoliko a gunglo, a ni Pedro ti ulo, ti nangipuderan ti Apotayo kadagiti amin a pamendision ti Baro a Tulag.”

Kuna ti kalkalpas a Pranses a libro a Théo—Nouvelle Encyclopédie Catholique (1989): “Para kadagiti Katoliko, ti papa, kas suno ni Pedro, sigun iti teolohia, isut’ permanente nga elemento ti panagkaykaysa ti Iglesia ken dagiti obispo. Ngem, ti simple a kinapudnona, ti papa isut’ kangrunaan a gapu ti panagsisina dagiti Kristiano.”

Daytoy mamagsisina a doktrina ti kinatan-ok ti papa nainaig unay kadagiti dogma ti di panagkamali ti papa ken ti apostoliko a panagsusuno dagiti Katoliko nga obispo, a pareho a di akseptaren dagiti kaaduan a di Katoliko nga iglesiat’ Kakristianuan. Adda kadi nagapuanan ti Vatican II a nangretubar iti takder dagiti Katoliko kadagitoy a doktrina?

Ti Vatican II a Dogmatiko a Konstitusion iti Iglesia sumungbat, iti parapo 18: “Daytoy sagrado a konsilio, kas isusurotna iti gapuanan ti Umuna a Konsilio ti Vatican [a nangikeddeng iti dogma a di agkamali ti papa], isuro ken iwaragawagna a ni Jesu-Kristo, ti agnanayon a pastor, insaadna ti santa Iglesia babaen ti panangipuderna kadagiti apostol ti misionda a kas nangibaonan ti Ama kenkuana (cf. Jn. Ju 20:21). Nagayatanna a dagiti sunona, dagiti obispo, isudat’ pastor ti Iglesia inggat’ manungpal ti lubong. Ngem, tapno agkaykaysa ken di nasinasina ti episkopada, insaadna ni Pedro nga ulo dagiti apostol, ket kenkuana insaadna ti manayon ken makita a gubuayan ken pundasion ti panagkaykaysa ti pammati ken ti komunion. Daytoy a sursuro maipapan iti institusion, ti kinapermanente, ti kasasaad ken pateg ti sagrado a kinatan-ok ti Romano a Papa ken ti di agkamali a sursuro ti saadna, ti sagrado a konsilio pabaruenna nga idagadag tapno patien a sititibker dagiti miembro, ket, sititibker nga iyusuatna daytoy a ganuat, gandatna nga iwaragawag iti publiko ken binsabinsaen a sibabatad ti doktrina maipapan kadagiti obispo, a suno dagiti apostol, a kaduada ti suno ni Pedro, ti Vicario ni Kristo ken ti makitkita nga ulo ti intero nga Iglesia, idirihirna ti balay ti sibibiag a Dios.”

Nakadidillaw, daytoy a Dogmatiko a Konstitusion iti Iglesia impablaak ni Papa Paulo VI iti mismo nga aldaw a pinirmaanna ti Dekrito iti Ekumenismo. Ket iti dayta met la a Nobiembre 21, 1964, improklamarnan “Maria nga ‘Ina ti Iglesia,’ kayatna a sawen, kadagiti amin a miembro ken amin a pastor.” Kasano a makuna a ti Dekrito iti Ekumenismo ‘minarkaanna ti naan-anay nga iyeentra ti Iglesia Katolika Romana iti ekumenikal a ganuat’ idinto ta inrana ti papa iti aldaw a pannakaipablaak dayta ti inna panangpasingked kadagiti dogma a di pulos akseptaren dagiti kaaduan a miembro ti WCC (World Council of Churches)?

Ti Problema ti Iglesia

Kinuna ni Dr. Samuel McCrea Cavert, dati a kangatuan a sekretario ti Nasional a Konsilio dagiti Iglesia, a dakkel ti akemna iti pannakaporma ti Sangalubongan a Konsilio dagiti Iglesia: “Ti Dekrito [iti Ekumenismo] talaga a di maitunos ti ekumenikal a panangmatmatna gapu ta ipapanna a ti Katolika Romana is-isu la ti pudno nga Iglesia. . . . Nainaig pay ditoy ti sabali a panangipapan nga isut’ kinatan-ok ni Pedro ken ti panangsakupna iti intero nga Iglesia. Dagitoy a panangipapan ipasimudaagda a ti pannakatarus ti Katolika Romana iti ekumenismo ket di nagbalbaliw a naisentro sadi Roma.”

Imbaga ni Dr. Konrad Raiser, maikadua a sekretario ti WCC: “Adu ti ekumenikal a deklarasion ti papa [Juan Paulo II], ngem ti mision a mamarparegta kenkuana isut’ mangiturturong kenkuana iti sabali a direksion.”

Toy nabatad a panagkontra ti ekumenismo a pamarang ti Vatican ken ti ikakapetna kadagiti tradisional a konseptona ipalgakna a ti Iglesia ti Roma delikadot’ problemana. No sipapasnek a makiraman iti ekumenikal a ganuat para iti Nakristianuan a panagkaykaysa, masapul a tallikudanna ti ibagbagana nga is-isut’ pudno nga iglesia. No dina tallikudan dayta, masapul nga admitirenna a ti makunkuna nga ekumenismona ket taktikana laeng tapno mauyotanna dagiti iglesia nga Orthodox ken Protestante nga agsubli iti Katoliko a pangen.

Iti diretsa a panagsao, masapul nga admitiren ti Iglesia Katolika a palso dagiti insursurona iti adun a siglo wenno aginsisingpet laeng ti agdama a pannakiramanna iti ekumenikal a ganuat. Uray aniat’ pilienna, madukotan dagiti adu a napasnek a miembro dagiti iglesiat’ Kakristianuan. Agduaduada no maragpatto pay ti Nakristianuan a panagkaykaysa.

[Blurb iti panid 8]

‘Ti Dekrito iti Ekumenismo minarkaanna ti naan-anay nga iyeentra ti Iglesia Katolika Romana iti ekumenikal a ganuat’

[Ladawan iti panid 7]

Ti Vatican II insaadnat’ Iglesia Katolika iti delikado a problema

[Credit Line

UPI/Bettmann Newsphotos