Ti Panagpadispensar ti Simbaan Ibutaktakna ti Nakaro a Panagsisina
“IPUDNOK iti saklangyo ken iti saklang ti Apo saan laeng a ti bukodko a basol ken kinadakes . . . no di ket—kas pannakabagi—pagreggetak met nga aramiden daytoy iti biang ti Dutch Reformed Church.” Ni Propesor Willie Jonker, maysa a kangrunaan a ministro ti Dutch Reformed, indatagna daytoy a makapakellaat a panagpadispensar iti publiko iti sango ti nasional a kumperensia dagiti simbaan idi Nobiembre 6, 1990, idiay Rustenburg, Sud Africa. Ket ania dagiti basol a tinukoy ni Jonker? Dagiti panangirurumen a naaramid iti “napolitikaan, sosial, ekonomiko, ken organisasional a pakasangalan ti simbaan” gapu iti panaglalasin a pagalagadan ti Sud Africa.
“Mariknak a nawayaak a mangaramid itoy,” intuloy ti propesor, “gapu ta impakaammo ti Dutch Reformed Church iti kallabes a konsiliona a ti panaglalasin ket maysa a basol, ket impudnonan ti basolna.” Nupay kasta, ti nasaknap a tignay maigapu iti panagpadispensar ni Jonker imbatadna nga adu kadagiti pasurot ti simbaan ti sumupiat iti ibagbaga ti simbaanda maipapan iti panaglalasin.
Ti makagapu iti panagsusuppiat ti Dutch Reformed Church ti Sud Africa, a dagiti kamengna ket ngangnganida puraw nga Afrikano amin, ket nabayagen a naisinggalutda iti panaglalasin.
Nupay kasta, idi Oktubre 1986 ti konsilio ti simbaan nangaramid iti dramatiko a panagbaliw iti pagalagadanna babaen panangipakaammona a ti pannakikameng iti simbaan ket silulukat kadagiti amin a rasa ken nagkamali ti simbaan iti panangpadasna nga aramaten ti Biblia tapno ikalinteganna ti pagalagadan iti panaglalasin. Maysa pay, idi 1990 impakaammo ti konsilio a ti simbaan “rebbeng a nasapsapa komat’ nabatad nga iyaadayona iti daytoy a panangmatmat” ken “bigbigenna ken ipudnona ti pannakapaayna a nangaramid iti kasta.”
Ti panagpadispensar ni Jonker pinataudnat’ panagsusuppiat, nga ibutbutaktakna ti maysa a nakaro a pannakabingaybingay ti kapanunotan ti simbaan no maipapan iti panaglalasin. La ketdi, ti awang kasla dumanon kadagiti amin a tukad ti simbaan, manipud iti laigo agingga kadagiti dati a manangidaulo kadagiti dadakkel a konsilio. Iti sungbatna iti panagpadispensar ni Jonker, ni Willie Potgieter, maysa a ministro ti Dutch Reformed, nariknana a “kurang ti konsiderasion ti bigla a panangaramid iti kasta a banag.” Kunana a ngangngani kagudua ti kongregasionna kaskadi a matmatanda pay laeng ti panaglalasin kas maysa nga epektibo a Nakristianuan a pagsurotan.
Maawatan unay, adu a kameng ti Dutch Reformed Church ti napaladingit gapu itoy a di panagkaykaysa. Kadagiti sao ti maysa a di napagustuan a kameng a nagsurat iti maysa a pagiwarnakan ti Johannesburg, a Beeld: “Panawenen a . . . nagparintumengtayo ken nagkiddawtayo iti pammakawan maigapu iti managbasol a panagsisinatayo ken amin dagiti nakaro a bambanag a sawentayo maipapan iti maysa ken maysa.”
Ti kasta a panagtutunos ket kasla di maaramid, nupay kasta; ket saan met a ti Dutch Reformed Church laeng ti simbaan idiay Sud Africa a mabalin a masaplit kadagita a pannakabingaybingay. Ti panagsusubang dagitoy a makunkuna a Kristiano ket pudno a naiduma manipud iti ayat ken panagkaykaysa a kuna ni Jesus a mangsaguday kadagiti pudno a pasurotna.—Juan 17:20, 21, 26; idiligyo ti 1 Corinto 1:10.