Manipud Managbasatayo

Tulong Agpaay iti Dandanin Matay Yantangay maysaak a nars nga agtartrabaho iti maysa a pagpaagasan iti puso iti ospital, ti artikuloyo iti Agriingkayo! a “Tulong Agpaay iti Dandanin Matay” (Oktubre 22, 1991) pinaginteresnak. Nupay kasta, mariknak a masapul a makorehir ti bassit a biddut, ta kunayo: ‘Adu a dodoktor ti nagkuna a nainkalintegan ti di panangipaay iti sustansia ken kadagiti pluido a kasapulan iti dadduma a dandanin matay, din maimbagan, wenno naan-anayen nga awan puotna a pasiente.’ Ipanamnamak kadakayo a kinaranggas ken nasaem unay ti di panangipaay iti sustansia ken dagiti pluido a kasapulan ti agsakit a tao. Babaen iti personal a kapaliiwak, kunaek a daytoy pataudenna ti ad-adu pay a panagsagaba.

M. S., Francia

Naadaw dagiti sasao a mapagduaduaan manipud iti “The New England Journal of Medicine” ket iparangarangna ti kapanunotan dagiti adu a dodoktor. Patien dagiti doktor nga adu a pasiente a nakarot’ pannakadadael ti utekda ti din makarikna iti ut-ot ken panagsagaba. Kasta met, ti panangipaay iti sustansia ken dagiti pluido a kasapulan sapulenna ti kinasigo iti moderno a medisina ken mangipaay kadagiti di pakabang-aran ken peggad a bukodna. Patien ti dadduma a dodoktor nga iti dadduma a kasasaad, ad-adu dagita a peggad ngem dagiti gunggona. Iti aniaman a kaso, dagiti indibidual a Kristiano masapul a mangaramidda iti pangngeddeng a buyogen iti konsiensiada no maipapan kadagita a nasaem ken emosional nga isyu.—ED.

Duapulo a tawen ti napalabasen inkeddengko ti di mangipaay iti sustansia a pagbiag iti maysa-aldaw-nga-anakko a lalaki. Isut’ naipasngay a di nadanonan ket saanen nga agan-andar ti utekna. Siak a mismo ti nangpaltot idiay pagtaengan, ta dikam nakapan idiay ospital iti umiso a tiempo. Diak mailawlawag ti rigat ken basol nga inik-ikutak iti adu a tawtawen. Ngem babaen ti panangbasak kadagiti artikuloyo, nabang-aranakon iti 20-tawen a pakadagsenak.

S. M., Estados Unidos

Dagiti Kumbension Idiay Makindaya nga Europa Natignayak iti kasta unay iti serie nga “Agrag-o dagiti Managayat iti Nadiosan a Wayawaya Idiay Makindaya nga Europa.” (Disiembre 22, 1991) Gaput’ napadakkelak kas maysa a Saksi ni Jehova, agannayasak a mangtagtagibassit kadagiti maaw-awattayo a naespirituan a taraon. Ngem ad-adda nga inapresiarko ti pribilehiok a pasetnak ti kasta a nakaskasdaaw nga organisasion idi naammuak no kasano ti panangawat dagiti Saksi idiay Makindaya nga Europa iti damdamo unay iti pagsasaoda kadagiti publikasion nga adda kadatayon iti sumagmamano a tawen.

T. O., Japan

Panagbasa Agtawenak iti 13. Ti artikulo nga “Agbasa Tapno Palawaen ti Pannakaammoyo” (Hulio 22, 1991) isut’ apag-isu a kasapulak. Idi managsagsaggaysa a sao ti basaek iti maminsan. Masansan nga agpasiar ti panunotko, a mamagbalin a nasken ti panangbasak manen iti material tapno maawatak. Dakkel ti naitulong dagiti nagsayaatan a palagipyo.

A. K., Poland

Panangpalinteg kadagiti Kriminal Adda anakko iti pagbaludan nga umaw-awat iti suskripsion iti Agriingkayo!, ket sipapasnek nga inkarkararagko dagiti artikulo a mabalin a mangdanon iti pusona. Inapresiarko unay dagiti artikulo a “Ti Pannakabalin ti Kinapudno a Mamaglinteg” (Hulio 22, 1991) ken “Maysaak a Nasigo a Mannanakaw.” (Setiembre 8, 1991) Binasak ida a buyogen dagiti lulua gapu iti kasta unay a panagyaman iti Dios, nga “agtarigagay a ti isuamin makagteng iti panagbabawi.” (2 Pedro 3:9) Mainanama, a dumtengto ti aldaw a kastanto ti aramiden ti anakko.

A. F., Estados Unidos

Cricket Ti cricket ket maysa kadagiti pagay-ayatmi unay a paglinglingayan ditoy Caribbean. Ngem pudno a nasdaawak a nakakita iti artikulo a “Cricket wenno Baseball—Aniat’ Nagdumaanda?” (Nobiembre 8, 1991) Pulos a diak inar-arapaap a makita ti kasta nga artikulo iti magasin! Daytat’ makaipaay iti nagadu nga impormasion, ket babaen laeng ti panangusarko itoy nga artikulo, nakaipaimaak ti adu a kopia ti Agriingkayo! kadagiti sabsabali.

J. D., Jamaica