Manipud Managbasatayo

Panangkidnap Agyamanak iti artikulo a “No Agtignayka a Simamaag, Papatayenka.” (Nobiembre 22, 1991) Maysaak met a biktima iti panagtakaw isu a nakatengngelak iti kotsek. Ammo ti nangkidnap kaniak a maysaak a Saksi ni Jehova ta kankanayon nga aw-awagak a sipipigsa ti nagan ni Jehova. Nagasat ta, diak nagsagaba iti pisikal a pannakaabuso malaksid ti limteg a pungnguapungnguan gapu iti pannakaparautko ken ti sumagmamano a piglat gapu iti pannakaipurruakko iti estribo. Nagkalmaak ket nabaelak ti rimmuar iti estribo babaen iti makinlikud a tugaw ti kotsek. Naipadamag ti pasamak ken ti pannakabista. Impabiang ti abogadok, dagiti kaarrubak, gagayyemko, ken ti pamiliak ti pannakaruarko ken ni Jehova.

E. M., Estados Unidos

Saan nga ikarkari ti Biblia ti namilagruan a pannakasalaknib ti ili ti Dios itatta. Nupay kasta, maitutop laeng ti mangiyebkas iti panagyaman iti Dios no ti maysa a Kristiano ket naispal manipud iti mamagpeggad-biag a kasasaad. (1 Tesalonica 5:18)—ED.

Kape Ti artikuloyo a “Parikut iti Kape” (Abril 22, 1991) kinunana a ti tsa, cocoa, ken dagiti inumen a cola addaanda iti caffeine. Mabalin a pudno daytoy iti tsa ken cola, ngem saan iti cocoa. Ti cocoa addaan iti theobromine, a naiduma iti caffeine. Ti maysa a tasa a cocoa mabalin a mangipaay iti bileg, ngem ti makagapu iti dayta isut’ asukarna.

E. B., Israel

Ti theobromine ket maysa a kemikal nga addaan iti ramen a mangapektar iti bagi nga umasping iti caffeine. Sigun iti “The Encyclopedia Americana,” ti bukel ti cocoa ‘addaan iti 3% a theobromine ken bassit a caffeine.’ Kuna ti “Compton’s Encyclopedia” a kadagiti “dadduma a sensitibo a tattao ti theobromine [iti tsokolate] mabalin a mamataud iti isu met laeng nga epekto a kas iti caffeine.”—ED.

Pakdaar ti Bagi Agbakbakasion ti doktorko idi pagarupko nga addaanak iti bassit laeng a parikut iti salun-at. Diak inkankano dagiti pagilasinan a pakdaar agingga idi naawatko ti artikulo a “Panangipangag ti Pakdaar ti Bagi.” (Oktubre 8, 1991) Kas naisingasing, nagpakitaak iti doktor, ket natakkuatan nga adda kanserko. Agsipud ta impangagko ti pakdaar ti bagik, daytat’ naammuan a dagus ken naagasan.

S. S., Estados Unidos

Cricket Agyamanak ti kasta unay iti nagsayaatan a deskripsion iti ay-ayam a cricket iti artikulo a “Cricket wenno Baseball—Aniat’ Nagdumaanda?” (Nobiembre 8, 1991) Daytat’ makaay-ayo a pagbaliwan manipud iti masansan a makaallilaw a pannakailadawan ti cricket kadagiti pakalaglagipan a naggapu ditoy a pagilian. Agpaay a pakagunggonaan dagiti Briton, nalabit addanto aldaw a maaddaantayo ti maysa nga artikulo a mangipaay iti nalawag a deskripsion iti ay-ayam a baseball. Saan a kas iti football ti America, ti ay-ayam di pay naawatan a pulos ditoy.

A. E., Inglatera

Panangbomba ti Terorista Nabasak ti artikulo a “Nalasatanmi ti Bomba ti Mammapatay.” (Enero 8, 1992) Agpayso, diak ammo ti ibagak! Pudno a daytat’ pagwadan iti panagibtur. Ti pammati ni Sue Schulz ken ti determinasionna maipapan iti isyu ti panangyalison iti dara nakapatpategda; kasta met ti pamay-an ti panangiyebkas ti asawana, ni Peter, iti ayatna ken ni Sue iti baet dagiti pisikal a pakapilawan a gapuanan ti pannakabomba. Sigurado a saan laeng a sisiak ti naragsakan itoy nga artikulo!

G. J. S., Brazil

Radon Yantangay ti trabahok isut’ panangsukat iti radon kadagiti pagtaengan, ti artikulo a “Radon—Peggad iti Pagtaenganyo?” (Oktubre 22, 1991) ti nangnangruna a nangpainteres kaniak. Nadakamatyo nga apektaran ti radon ti bara dagiti mannigarilio nga ad-adda ngem dagiti saan nga agsigarilio. Napateg met a dakamaten a ti asuk ti sigarilio paaduenna dagiti partikulo ti tapuk a kaptan dagiti produkto a radioaktibo, wenno “annak.” Daytoy pakaruenna ti peggad iti salun-at para kadagiti saan nga agsigarilio iti napnot’-asuk nga aglawlaw.

O. B., Alemania