Propesion ti Maysa a Doktor
AGARUP pito a tawen ti napalabasen, ni Dai Suzuki, sangapulo-ti-tawenna a lalaki, natay gapu iti aksidente ti lugan. Inakusar ti media dagiti nagannak ni Dai iti kinaliway ta nagkitakitda a mayalisonan ti dara ti anakda, gaput’ panagtulnogda kadagiti prinsipio iti Biblia. Saksi ni Jehova dagiti nagannak ni Dai. Kalpasan iti imbestigasion ti polis, naduktalan nga awan ti panagliway iti biang dagiti nagannak.
Dagiti Saksi ni Jehova idiay Japan ken iti sadinoman apresiarenda ti panangikagumaan dagiti doktor a mangisalakan ti biag ket situtulokda a makitinnulong kadagiti mangngagas. Aprobetsarenda dagiti moderno a medisina ken awatenda ti medikal a pannakaagas, malaksid ti panangyalison ti dara. Ngem no ti panangagas apektaranna ti kinasungdoda kadagiti prinsipio ti Biblia, ipangagda ti Dios. (Aramid 4:19) Mangted ti Biblia iti nalawag a bilin: “Adaywanyo . . . ti dara.”—Aramid 15:29.
Gapuna, imbes nga ikompromisoda ti pammatida kadagiti bilin ti Dios, pilien dagiti Saksi ni Jehova dagiti panangagas a di mangusar ti panangyalison ti dara. Pudno, ti pannakasapul kadagita a sandi a panangagas mabalin a mangipaay ti karit kadagidiay mangngagas. Ngem umad-adu a doktor ken administrador ti ospital ti mangsapsapul kadagiti pamay-an tapno maawatda dagiti kalikagum dagiti Saksi ni Jehova. Kas pangarigan, maysa a pagiwarnak idiay Japan, ti Mainichi Shimbun, kinunana nga iti napalabas “dadduma nga ospital ti manglaplapped ti panagpadara inggat’ mabalin ken situtulokda a mangopera nga awan ti dara.”
Dinakamat ti artikulo nga iti Ageo Kosei Hospital, sibaballigi a naaramid ti 14 nga operasion kadagiti Saksi ni Jehova nga awan ti panangyalison ti dara iti nagbaetan ti 1989 ken Enero 1992. Impaganetget ti ospital ti naipakammo a pammalubos. Ti pagalagadanna isut’ pannakitungtong kadagiti pasiente a Saksi maipapan iti manamnama a kaadu ti agsayasay a dara ken dagiti peggad a nairaman iti awan-darana a pannakaopera. Apaman a maawat ti naisurat a dokumento a pammalubos manipud ti pasiente, dagiti doktor aramidenda ti operasion a di agusar ti panangyalison ti dara.
Aniat’ nangtignay iti daytoy nga ospital a mangawat kadagiti pasiente a Saksi ken raemenda daydiay pilida a panangagas, nupay dida naawat kadagiti dadduma nga ospital? Sigun iti Mainichi Shimbun, ilawlawag ni Toshihiko Ogane, direktor ti ospital: “Ti propesion ti maysa a doktor ti mangobligar kenkuana a mangraem iti kalintegan ti pasiente a mangaramid ti ultimo a pangngeddeng ken aramidenna ti kasayaatan a kabaelanna a makitinnulong a mangagas iti sakit. Iti kasta nga opinion, nakapatpateg ti naipakaammo a pammalubos.”
“Iti biang dagiti Saksi ni Jehova,” kuna pay ti pagiwarnak, “nakaipasdekdan kadagiti hospital liaison committee iti 53 a siudad iti intero a pagilian maipaay kadagiti manamatida. Ti panggep dagitoy a komite isut’ pannakiinnuman kadagiti ospital a mangaramid iti operasion a di agusar ti dara.” Kas banagna, adu kadagiti ospital ti unibersidad ken medikal nga institusion ti situtuloken a mangipalubos iti panagpili dagiti Saksi iti pannakaagasda.
Ita, nasuroken a 1,800 a dodoktor ti Japan ket nasurok a 24,000 iti sangalubongan ti makitinnulong kadagiti Saksi babaen ti panangted kadakuada kadagiti sandi iti panangyalison ti dara. Nasurok a 800 a hospital liaison committee ti nakiumanen kadagiti dodoktor a mangpanunot a ti “propesion ti maysa a doktor” rebbeng a raemenna ti kalintegan ti pasiente nga agpili.