“Sungbat iti Kararagko”
Sumungbat dagiti Managbasa iti Serie ti Alkoholismo
DAYTAT’ ebkas a nangngeganmi manipud kadagiti managbasa iti isuamin a lubong: “Sinungbatan ni Jehova dagiti kararagko.” Iti daytoy, tuktukoyen dagiti managbasa ti serie dagiti artikulo a nagparang iti Mayo 22, 1992, a ruar a napauluan “Tulong Agpaay kadagiti Alkoholiko ken kadagiti Pamiliada.”
Dagitoy a naibatay-Biblia nga artikulo impakitana no kasano a ti alkoholismo lapunosenna ti intero a pamilia. Masansan dagiti assawa ken annak makikaduada iti alkoholiko a mangilibak nga isut’ addaan iti parikut a panaginum. Dagitoy ken dagiti dadduma mabalin a mangusarda kadagiti di epektibo a pamay-an a mangbalbaliw iti alkoholiko—ngem mabalin a pakpakaruenda laeng ti pannakaadiktona. Ngarud dagiti miembro ti pamilia masapul a maawatanda ti kasasaad ti alkoholismo, ket naited dagiti espisipiko a singasing a tumulong kadakuada a lumapsut iti makadangran a panangtengngelna. Naiturong met ti impormasion kadagiti nataenganen nga annak dagiti alkoholiko tapno tulongan ida a mangilasin—ken mangagas—kadagiti sakit ti nakemda. Awan duadua ngarud, a dagitoy nga artikulo tinignayda dagiti naragsakan a managbasa a sumungbat!
Nagsurat ti maysa a babai: “Idi nakitak ti akkub, limmamiis ti intero a bagik. Iti napalabas a nakatawen ket kagudua, masakitak unay. Idi Disiembre, nangrugi dagiti nakaro a panagdandanag ken panaglidlidayko. Pinadakkelnak ti maysa nga alkoholiko nga ama ket nariknak a minamaag ti pananglagip iti napalabas. Idi naawatko ti magasinyo, binasak dayta a naulit-ulit. Iti damdamo unay, naawatak ti bagik.”
Dinosdosena a managbasa ti nangiyebkas iti kasta met laeng a rikna. Maysa a 16-años nga addaan iti alkoholiko nga ama ti nangawag kadagiti artikulo a ti pangrugian iti panagimbagna. Kuna ti sabali pay a managbasa: “Agbasbasaakon iti Agriingkayo! nanipud idi 1969, ket pulos nga awan ti kasta a nakaro nga epekto ti impormasion kaniak. Kalpasan ti adu a tawen a pannakapaay, nariknak a pinaayko pay ni Jehova. Aniat’ dakes kaniak? Nagasawaak iti maysa met laeng nga alkoholiko a nangparigat ken nangibabain kaniak nga impagarupko a pinanawakon ket nangipasngayak kadagiti lima nga annak iti maysa nga alkoholiko nga aglawlaw. Diak maipaay ti natalged a rikna a kasapulanda. Linawlawagannak ti Mayo 22 nga Agriingkayo! ti dalan nga agpaay kaniak! Naimbag laengen ta tinulongannak ni Jehova a makaawat iti lappedko.”
Awan duadua, tinulongan dagiti artikulo dagiti adu a managbasa iti naespirituan. “Nagsagabaak iti nawatiwat a tiempo gapu ta diak inyaplikar dagiti prinsipio ti Biblia,” inamin ti maysa a babai manipud Japan. “Nagkararagak iti Dios a tulongannak a mangbaliw iti personalidadko. Sumagmamano nga aldaw kalpasanna, naawatko daytoy a magasin. Insuronak kadagiti makagapu iti kababalinko ket inikkannak iti tured a mangurnos kadagiti bambanag.”
Tinulongan dagiti artikulo dagiti dadduma a managbasa a mangparmek iti panangilibak. “Maysaak met a biktima iti alkoholiko nga ama,” kuna ti maysa a babai a taga Canada. “Ngem idi laeng nabasak ti artikuloyo a naipaganetget kaniak no ania ti parikutko. Dimmakkelak a mangiliblibak nga adda parikut idiay pagtaengan. Itatta nangalaakon iti addang babaen ti pannakisarita iti maysa a nataengan a Kristiano a kabsat a babai. Nasdaawak a nakangngeg a maysa met nga alkoholiko ti amana.”
Para kadagiti dadduma, nabang-aranda kadagiti rikna a panangiputputong. “Makaagas kaniak ti panangbasa kadagitoy nga artikulo,” kinuna ti maysa a managbasa, “agsipud ta mariknakon nga adda Kristiano a kakabsat a lallaki ken babbai a kas met kaniak dagiti riknada ken maawatandak.”
Adu kadagiti managbasa ti makalua pay bayat ti panangbasada kadagiti artikulo. “Idi nakitakon ti paulo, nagsangitakon,” impudno ti maysa a babai. “Maysa nga alkoholiko ni tatangko, a kas ti asawak. Diak nabigbig no kasano a nagdakkel ti paset ti alkoholismo iti panangdadael iti kinaubingko. Dinadaelna ti panagasawak, ket dandani dinadaelnak. Agsangsangitak gapu ta adda siray ti lawag a nanglawag kadagiti saludsodko iti isuamin a panagbiagko, kas iti ‘Apay a kankanayon a mariknak nga awan ti mamaayko? Apay a mabutengak unay nga agtalek? Ania daytoy a kinakawaw a mariknak?’”
Daddumat’ nakarikna a dagiti artikulo sinungbatanda dagiti kankanayon a saludsod. Kinuna ti maysa nga agtutubo a lalaki manipud Finland: “Masmasdaawak iti riknak, ta diak makapagtalek kadagiti tao wenno makaipakita iti kinabara.” “Ti impormasion ti apag-isu a kasapulak,” umanamong ti maysa a babai. “Dagiti pada a Kristiano masansan a komendarandakami iti panangipakita iti nasayaat nga ulidan kas maysa a pamilia. Uray pay dagiti kaarrubami dayawendakami. Kaskasdi, iti sidong dagitoy amin a balligi, namin-adun a nariknak, nga adda dakes a mapaspasamak kaniak. No dadduma mariknak a nakabasolak ken nababa ti panagraemko iti bagik, ngem diak pulos maawatan no apay. Tinulongannak dagiti artikulo a mangmatmat kadagiti adu a bambanag iti natimtimbeng a pamay-an. Nangrugin a maimbagan dagiti sakit ti nakemko.”
Masansan a makarikna dagiti nataengan nga annak dagiti alkoholiko iti pannakabasol. Panunotenyo, nupay kasta, ti insurat ti maysa a managbasa idiay Japan: “No maluen ti nabartek nga amak ni nanangko, nasakit ti nakemko ken makigtotak. Kanayon a maulaw ken agsarwaak pay! Kunaenna, ‘No baybay-am ti Biblia, sumardengak nga aginum.’ Nupay kasta, daytoy nga artikulo insuronak a dagiti alkoholiko padasenda nga ipabasol ti panaginumda kadagiti dadduma ket saantay koma a maallilaw iti dayta! Mariknak a kasla nawayawayaanak.” Nagsurat ti maysa a managbasa manipud Brazil: “No aginum ni tatangko, kanayon a pabasolennakami. Namin-ano a daras a mariknak a nakabasolak. Impakita dagiti artikulo kaniak a saan a ni nanangko wenno siak ti makimbasol.”
Dagiti naayat a Kristiano a panglakayen ket napateg a gubuayan iti tulong. (Isaias 32:2) Dagiti artikulo maipapan iti alkoholismo nairantada a tumulong kadagiti manangaywan iti kongregasion a mangtaming a siepektibo kadagita a parikut. (Isaias 50:4) Malagip ti maysa a Kristiano a babai: “Agtomtomarak iti pangpakalma iti adu a tawtawen; dinawat ti doktorko nga agpabalakadak iti maysa a propesional. Ngem mabainak a mangisarita kadagiti parikutko iti maysa a gangannaet. Inayabak dagiti panglakayen, ket babaen iti pannakisaritak kadakuada, agraman ti asawak, naiyebkasko ti buteng, pungtot, pannakapaay, ken rikrikna a nabaybay-anak.”
Masansan a kasapulan ti tulong ti propesional a mangrisot kadagiti isyu a pinataud ti alkoholismo. Nupay saan a nangirekomendar dagiti artikulo iti aniaman a kita iti panangagas, adu a managbasa ti nangisalaysay kadagiti kapadasanda a mismo. “Rinugian ti asawak ti maysa a programa ti panagagas,” insalaysay ti maysa a babai. “Daytat’ pangrugian laeng iti tallo a tawen a panangikagumaanmi a dua. Rinugianmi ti linawas a napinget a panagagas. Mabalin nga imposible koma ti panagar-arikapmi a rummuar a bukodmi iti kasta nga emosional a kinasipnget.” Innayon pay ti maysa a babai nga Aleman nga agtartrabaho iti maysa a klinika dagiti agsakit iti pannakaadikto: “Kasta unay ti panagyamanmi iti panangitudoyo a dagiti tao a mangsangsango kadagiti parikut ken mangsapul iti tulong isuda dagiti nabileg—saan a dagiti manglapped wenno mangtagibassit kadagiti bambanag. Nalawag nga impakitayo a saan a maibabain ti maysa a tao no sapulenna ti tulong.”
Nupay makaparagsak a mapaliiw daytoy a nagsayaat a sungbat kadagiti artikulo, pagaammotayo a ti panagimbag dagiti sakit ti nakem iti alkoholismo ket napaut ken masansan a narigat. Ikarkararagantayo dagidiay a, babaen iti tulong ni Jehova a Dios, ib-ibturanda dagitoy a serioso nga isyu. Kinuna ti maysa a managbasa: “Dimmakkelak a kadua ti maysa nga alkoholiko nga ama. Nupay no siraragsak nga agserserbiak ken ni Jehova, madlaw pay laeng dagiti sakit ti nakem. Babaen iti tulong ni Jehova, adun ti nagimbagak, ngem umanamongak a ti naan-anay a pannakaagas dumtengto iti baro a lubong ni Jehova.”—Isaias 65:17.