Panangited—Gubuayan iti Rag-o

Babaen ti koresponsal ti Agriingkayo! idiay Alemania

ASINOT’ di mangtagiragsak iti panangawat iti makaay-ayo a sagut? Anian a makapabileg-puso ti pannakaammo nga adda mangipatpateg kadakayo! Makapnek met, nupay kasta, ti rag-o iti panangited. Kinapudnona, sigun ken Jesus, ti namunganay iti Kinakristiano, “naragragsak ti mangted ngem ti umawat.”—Aramid 20:35.

Ipadamag ti Biblia dagiti adu a paspasamak a panangited, uray pay ti aglaplapusanan a panangited. Idi ti reina ti Sheba nakitana a mismo ti kinasirib ni Ari Salomon, “nangited iti ari ti sangagasut ket duapulo a talento a balitok ken rekrekado a nagwadwad ken napateg a batbato.” (1 Ar-ari 10:10) Ti laeng balitok ket aggataden iti nasurok a 46 milion a doliar iti moderno a gatadna! Ket ti Faraon iti Egipto nangipaay iti maysa kadagiti annakna a babbai iti sagut nga intero a siudad!—1 Ar-ari 9:16.

Ngem saan a masapul a nangina dagiti sagut tapno gubuayan iti rag-o. Mabalin a malagipyo ti naasi a Samaritano iti ilustrasion ni Jesus, a natignay a timmulong iti padana a tao nga agkasapulan. (Lucas 10:30-37) Wenno ti kongregasion Kristiano idiay Corinto a nangipatulod ti “naparabur a sagut” kadagiti agkasapulan a kakabsatda idiay Jerusalem.—1 Corinto 16:3.

Nupay kasta, nalabit ti kasayaatan a naammuan pay laeng a panangited a nadakamat iti Biblia isut’ panangited dagiti astrologo—pagaammo unay a kas dagiti mamasirib—a nangiyeg kadagiti sagut iti ubing a Jesus. Adu a tattao ti mangibatay iti ugalida a panangited kadagiti sagut iti tiempo ti Krismas iti daytoy nga okasion.—Mateo 2:2-11.

Ti Ngay Panangited iti Krismas?

Awan duadua, adu ti mangtagtagiragsak a makiraman iti awaganda nga espiritu ti Krismas—ti espiritu ti panangited. Dadduma kadakuada ti agplano nga umuna, a pagragsakanda ti mangsapul kadagiti naisangsangayan a sagut ken mangsapul kadagiti maitutop a kard a pangkablaaw. Ti naud-udi, pagarupek, damo a nagparang idi 1840’s idiay Inglatera, nupay no mapagsusuppiatan ti nangiyam-ammo kadakuada. Ngem sagut man dayta wenno kard, adut’ maragsakan iti pannakatakkuat iti naisangsangayan a banag agpaay iti naisangsangayan a tao.

Iti kasumbangirna, di mailibak nga adu a Mangmangted iti Krismas ti saan a kas kadagiti tao a nailadawan iti immuna a parapo. Napaliiw ti maysa nga Aleman a makinkukua iti tiendaan maipapan kadagiti managgatang iti Krismas: “No umad-adanitayo iti Rabii ti Krismas, ad-adda nga agnerbios dagiti tao. Kamaudiananna, basta gumatangdan iti aniaman a makitada.”

Ti pannakilinnetlet kadagiti napuspusek a department store iti makaibus-tiempo a panangsapul kadagiti maitutop a sagut ti mangpadayamudom kadagiti managgatang gapu iti bannog, panagap-apura, ken rigat. Sigun iti maysa a diario iti Austria, tunggal maikatlo a suki agreklamo maipapan “ti panagap-apura,” a kunaenna a mabang-aranto “apaman a malpasen ti kasta unay a panagdandanag.” Ket dagiti Aleman a tin-edyer, idi napagsaludsodanda no kasano ti riknada maipapan iti Krismas, simmungbatda babaen kadagiti komento a kas iti, “Riribukennak,” “Dika ammo no aniat’ itedmo,” ken, “Nagastos unay dayta.”

Nalawag saan a marikna ti tunggal maysa a “naragragsak ti panangited” a sinarita ni Jesus. Awan duadua ti nangnangruna a makagapu ket kasta unayen ti pannakaikomersio ti Krismas, isu a pakarurodan dagiti adu. Sigun iti The World Book Encyclopedia, “agingga iti kakapat iti tinawen a paglakuan dagiti adu a tiendaan ti agtaud iti tiempo ti Krismas.” Nalawagen a ti “Jingle Bells” a kaaduanna a pagay-ayat a denggen ti lubong ti komersio ti toktokaren ti cash register no mangirekord ti naglakuan.

Nalawag, ti panangited iti Krismas masansan a di makapataud iti rag-o nga iyeg koma ti panangited. “Kaamakko ti Krismas,” impudno ti maysa a babai a Katoliko.

Awan duadua a ti pannakaitutop ti panangited iti Krismas ket mapagduaduaan. Umiso kadi?