Manipud Managbasatayo
Panangsaranget iti Ipapatay Itay napalabas a tawen, ti patpatgek a manong, a 18 laeng ti tawenna, ti natay iti maysa nga aksidente iti dalan. Mailadawanyo ti kasta unay a panangapresiarko kadagiti serie iti artikulo a “No Matay ti Inay-ayat.” (Hulio 22, 1992) Nangnangruna nga inapresiarko ti kapanunotan a ti maysa a saan mangipakita iti nalaus a ladingit ket saan a di-maseknan wenno di manangipateg. Gapu iti kinamanagragragsakko, diak ipadlaw no naladingitak. Dadduma ti naaddaan ti saan nga umiso a panangipapan kaniak. Nupay addaan dagiti Kristiano ti namnama iti panagungar, kaskasdi a kasapulanda ti nadungngo a pannakaawat dagiti kakaduada.
L. R., Italia
Gangannaet Kanayon nga ipatpategko ti napintas, makakayaw a ladawan dagiti akkub ti magasinyo. Nupay kasta, naallukoyak a nangnangruna iti akkub ti Mayo 8, 1992 nga isyu, “Arayat! Gangannaetkami.” Bayat ti idadakkelko, masansan a naimatangak ti panagilem kadagiti gangannaet—dagiti pananglais iti rasa ken kinaranggas. Malagipko pay nga adda nagkuna ken ni tatangko a rebbeng nga isut’ agsublin iti naggapuanna. Ngem ti kinaagpaysuanna, dakami a North American Indians ti kaunaan a nagnaed ditoy! Papananmi ngay? Mangnamnamaak a no mabasanto dagiti tattao daytoy nga artikulo a buyogen ti pannakaawat, maapresiardanto nga amin a tattao ket padapada iti imatang ti Dios.
T. B., Canada
Kinakattigid Kas kattigid ken managbasa ti Agriingkayo!, kablaawankayo iti nagsayaat a pannakaiparang ti suheto iti artikuloyo a “Kinakattigid—Pagdaksan wenno Pagimbagan?” (Hunio 8, 1992) Nupay kasta, mabalin kadi nga ilawlawagyo kaniak no apay nga ibilang ti Biblia ti “kinakattigid” a saan a naanamongan?
S. J. M., New Zealand
“Ti Dios ket saan a mangidumduma,” isu a sigurado a saanna nga idumduma dagiti kannigid a tattao. (Aramid 10:34) Ti panangusar ti Biblia iti kannawan kas ti dasig ti pannakaanamong agparang a namunganay iti kinapudno a kaaduan a tattao ket kannawan. Ti kannawan nga ima ngarud ket agserbi kas maitutop a simbolo ti maiparbeng a pannakabalin wenno pannakaanamong. Ket maitutop a ti kannigid nga ima tuktukoyenna ti kasunganina. Nupay kasta, maaramid laeng daytoy iti piguratibo a kaipapanan ken saan a nairanta a pangtagibassit kadagiti tao a kattigid.—ED.
Panagbalin a Naiduma Talaga a kayatko ti agyaman unay kadakayo iti artikulo a “Kasano a Maaddaanak ti Tured nga Agbalin a Naiduma?” (Hunio 22, 1992) Pagay-ayat dagiti kaklasek dagiti ragragsak ken paggugustoda unay dagiti kabaruanan nga uso. Saan a nasayaat ti pannakilangenda kaniak. Mapilitak unay a diak pulos naaddaan ti tured nga iyebkas ti bukodko a kapanunotan. Tinulongannak ti artikulo a mangparmek ti butengko. Babaen ti tulong ni Jehova, iti sumaruno a gundaway, nabaelak nga inlawlawag ti kapanunotak. Awanen unay ti pannakapilit. Pagyamanan unay.
M. E., Alemania
Daytoy nga artikulo ti kasapulan unay dagiti ages-eskuela a kas kadakami. Iti nabayag a tiempo, inkagumaak a di nangpataud iti riribuk, ken di agbalin a naisalsalumina. Nakaad-adu dagiti sulisog, ket diak pulos nabalinan ti nangipaay ti panangsaksi. Ngem iti rugrugi iti maikadua a tawenko iti high school, inyam-ammok ti bagik iti klase babaen ti panangikunak: “Maysaak kadagiti Saksi ni Jehova. Ti pagay-ayatko nga aramiden isut’ panagadal iti Biblia.” Idi naikunak dayta, diak makaisao wenno makaaramiden kadagiti banag a pagduaduaan. Kaskasdi a pudno a karit ti panangasabak kadagiti gayyemko idiay eskuelaan, ket diak kayat ti agbalin a naiduma. Ngem maysa nga aldaw, maysa a balasitang ti nagkuna a kayatna a tuladen ti wagas ti panagbiagko ken ti prinsipiok. Daytoy ti nangtignay iti panunotko nga agbalbaliw. Ita nabigbigko a saan a siak ti naiduma—dagiti ketdi dadduma a tattao. Ti panagserbi iti Dios ket normal!
M. A., Japan