Panagbiahe ti Bus a Mapan Idiay Tengnga ti Australia
Babaen ti koresponsal ti Agriingkayo! idiay Australia
NAPADASANYO kadin ti nagbarangay iti napnuan-buaya a karayan? Tinagiragsakyo kadin ti nagkanta iti naslag a rabii, iti lugar a rinibo a kilometro ti kaadayona iti sibilisasion? Nakatabunokayo kadin kadagiti Nakristianuan a gimong kabayatan ti panagbiahe iti maysa a highway iti 100 kilometro iti kada oras? Dagita a kapadasan ket pangarigan laeng kadagiti tinagiragsak dagiti ginasut a delegado manipud nagduduma a lugar a nagbiahe iti bus tapno tabunuan ti kumbension distrito dagiti Saksi ni Jehova sadi Alice Springs idiay nakapudpudot a tengnga ti Australia.
“Ti sao a ‘panagbiahe’ ket maitutop,” kinuna ti maysa a delegado, “yantangay naturogkami iti kalnaawan kadagiti sagduduat’ malaonda a tolda. Idi nakagtengkamin idiay Alice Springs, awan pay tallo a minuto ngem nabangonmin dagiti toldami! Daytat’ kas iti fast-forward a panagbuya iti video: Sumardeng dagiti bus, ket ti maysa a nagparadaan ti kellaat a rimmusingan ti pinulpullo a babassit a tolda.”
Maaw-awatkayo Idiay “Alice”
Ti Alice Springs (“Alice” ti pangawag dagiti agtataeng sadiay) ket maysa a narang-ay a baresbes iti maysa a nabara a disierto. Ag-23,000 ti populasionna ken masarakan iti abagatan ti katengngaan a kontinente ti Australia. Maysa daytan a sentro ti turismo a ti kangrunaan a pangawisna isu dagiti Katutubo ti Australia ken ti naisalsalumina nga arteda.
Nupay kasta, kadagiti Saksi, ti tallo-aldaw a kumbension ti tampok ti intero a biahe. Iti dadduma kadakuada, daytat’ gundaway para iti adu a naragsak a panaglalangen manen. Ti maysa a tasa ti napudot a tsa ti maysa a pagilasinan ti kinamanagpadagus dagiti taga-aw-away idiay Australia, ket ti kumbension ti nangbiag iti daytoy a kaugalian babaen iti naisalsalumina a pagrepreskuan a tolda nga addaan billy-tea ken damper. Ti billy tea ket kadawyan a tsa a maiyanger iti ngimmisiten a kapitera nga awagan[da] iti billy. No dadduma, ti sanga ti kayo a eucalyptus wenno gum ti pangkiwarda bayat a maipisok dagiti bulong ti tsa iti billy. Maiparabaw iti billy ti maysa a sanga ti eucalyptus tapno saan a maasukan ti tsa.
Ti damper ket kadaywan a kita ti tinapay. Immalsa nga arina, danum ken asin laeng dagiti ramenna. No kalutluto, maiw-iwa ti damper iti napuskol sa mapalamanan a naimbag iti mantekilia ken tagapulot. Ti tolda nga addaan billy tea ken damper ket nagbalin a maysa kadagiti kangrunaan a pagayuyangan idiay lugar ti kumbension.
Simamatalek a Panagserbi Nupay Naiputputong
Buklen ti 72 a Saksi ti Kongregasion ti Alice Springs ken ay-aywananda ti 200,000 kilometro kuadrado. Ti Darwin agarup 1,800 kilometro iti amianan, ket ti Adelaide nganngani 1,600 kilometro iti abagatan. Nasdaaw dagiti simmarungkar a delegado iti damo a pannakakitada iti kinarigat ti panagbiag idiay away gapu iti kinaadayo, kinadagaang, kinatapuk, ken ti pannakaiputong.
Maysa a kasayaatan a pangarigan isut’ ili ti Jabiru a pagminasan iti uranium. Maymaysa ti Saksi sadiay ket 260 kilometro ti kaadayona iti kaasitgan a kongregasion. Kaskasdi, ti pannakaiputong saanna a pinakapuy ti espiritualidadna. Ti itatabunona idiay kumbension ti nangparegta iti adu. Kasta met, uppat nga estudiante ti Biblia a nairaman kadagiti 26 a nabautisaran iti daytoy a kumbension ti nagbiahe manipud iti Jilkmingan, iti adayo a komunidad dagiti Katutubo, idiay deppaar ti Arnhem Land iti Northern Territory.
Pagsilnagen Dagiti Delegado ti Lawagda
Idi nalpas ti kumbension, amin a bus ket nagpaamianan iti makinngato nga ungto ti kontinente ti Australia. Ti tampok a paset daytoy a biahe isut’ panagbarangay kadagiti nadalus, nalitnaw a danum ti Katherine Gorge sa nagturong iti nalatak a Kakadu National Park. Daytoy ti damo a nakakitaan dagiti biahero kadagiti atap a buaya. Nakaay-ayat, ngem medyo makapadanag! Sa, kalpasan ti naragsak a rabii idiay Darwin, ti kabisera a siudad ti Northern Territory, ti Mataranka Station ti simmaganad a nagsardengan dagiti bus, a nalatak kadagiti nalitnaw nga ubbog ken alogna a napalawlawan iti palma.
Nupay kasta, ti panagpasiar saanna a sininga dagiti naespirituan nga aramid. Dagiti bus nagbalinda a maiyakar-akar a Kingdom Hall. Napagsasaritaan iti kada aldaw ti maysa a teksto manipud Kasuratan ken dagiti naiyimprenta a komento, ket naangay ti kadawyan a linawas a gimong ti kongregasion kabayatan ti biahe. Maysa kadagiti driver ti bus a saan a Saksi ti naragsakan nga uray la natignay a gimmatang iti maysa nga extension cord, mikropono, ken plug a maikonektar iti stereo ti bus, tapno mangngegan a nalawag dagidiay agkomento kabayatan dagitoy a [gimong ken panagteksto].
Kabayatan ti panagpasiar, nagsakit ti maysa kadagiti biahero a baket ken kasapulan a maipan iti kaasitgan nga ospital. Nagbati ti maysa a gayyem a babai tapno mangaywan kenkuana, ngem nagbiahen dagiti bus. Dua aldaw kalpasanna, idi naimbagen, isu ken ti kaduana ti maldaangan ken masayangan a di nakapasiar iti nabatbati a paset ti panagbiahe. Ngem ti Nakristianuan nga ayat ti nangep-ep iti kinalidayda.
Naammuan ti dua a lokal a Saksi a piloto ti napasamak. Nagbiit dagiti pasamak. Di nagbayag, nakaluganen dagiti uppat iti maysa a bassit nga eroplano a nagpa-ili iti Porta Augusta tapno kamakamen dagiti bus. Uray la nga inyebkas ti maysa kadagiti biahero: “Napalaus ti ayat ken panangapresiarmi iti nakaskasdaaw a panagkakabsattayo!” Ngem saan laeng a daytoy. Idi simmangpet ti eroplano, dadduma kadagiti padada a delegado ti nagboluntario nga agkontribusion iti naggastuan dagiti piloto! Natignay ti driver ti bus iti daytoy nga ebkas ti naayat a panagkakabsat, a kinunana nga idi laeng a nakaimatang iti kasta.
“No lagipek ti tallo a lawas a panagpasiarmi idiay Alice Springs,” kinuna ti maysa kadagiti biahero, “naamirisko a kadagiti amin a kapadasak, dayta pay laeng ti makaparegta ken makapabileg iti pammati. Ti kangrunaan a nagraira isut’ espiritu ti kinamaymaysa a tinagiragsakmi amin. Saan a napateg no sadinot’ napananmi—ti pudno a napateg isut’ panagkaykaysa ti panunot ken espiritumi!”
[Mapa iti panid 18]
(Para iti aktual a pannakaurnosna, kitaem ti publikasion)
Makinlaud nga Australia
Northern Territory
Queensland
New South Wales
Makin-abagatan nga Australia
Victoria
Tasmania
Darwin
Perth
Alice Springs
Brisbane
Sydney
Adelaide
Melbourne
Hobart
Uluru (Ayers Rock)
Port Augusta
Kakadu National Park
[Ladawan iti panid 16, 17]
Dagiti Katutubo ket nairaman kadagidiay agur-uray nga agpabautisar iti kumbension distrito idiay Alice Springs
[Ladawan iti panid 17]
Pagapuyan agraman billy tea ken damper
[Ladawan iti panid 17]
Buaya nga agkakainitan idiay Kakadu National Park
Dagiti ruta ti bus a nagbiahe a nagturong ken naggapu iti kumbension idiay Alice Springs
Kadawyan a buya idiay
[Dagiti ladawan iti panid 18]
Ti Uluru (Ayers Rock) nga 470 kilometro iti makin-abagatan a laud ti Alice Springs
Kakadu National Park ti Northern Territory