Manipud Managbasatayo

Ti Kinaawan Hustisia ti Kriminal Kayatko nga iraman kadakayo no kasanot’ panangusarko iti daan nga isyu ti Agriingkayo! Tinutokanda iti paltog ti balasangko idi kayatda a takawen ti kotsena bayat ti kaaddana iti dayta. Naidarum ti mannanakaw, ngem iti darum a panangusarna iti paltog a mangbutbuteng kenkuana, saan a naipalubos ti panangusar iti ebidensia. Maup-upay a napalubusanak nga agsao a mangibagi iti balasangko idi pannakasentensiana. Iti napalabas, naiparna a nasarakak ti artikulo nga “Adda Aya Pagimbagan ti Krimen?” (Agosto 8, 1985) Babaen iti panangusarko iti material nga adda iti kahon a napauluan “Ti Kinaawan Hustisia iti Kriminal a Sistema,” imbagak iti korte a “ti kriminal adda pagpilianna​—agaramid iti krimen wenno saan. Ti biktima awan ti pagpilianna.” Naibalud ti mannanakaw, nga immawat iti maitutop a sentensia.

D. M., Estados Unidos

Naliway a Nagannak Pagyamanan unay iti artikulo nga “Agimtuod Dagiti Agtutubo . . . Apay a Didak Ikankano Dagiti Dadakkelko?” (Nobiembre 8, 1992) Agar-arubos ti luak bayat a basbasaek dayta. Dua a bulan itan ti napalabas, mariknak a nabaybay-anak, isu a nagrebeldeak. Nalabit makapungtot ken nasaktanak unay idi. Pinagpanunotnak a talaga ti artikulo maipapan iti napasamak. Pagyamanan iti panangisakityo kadakami nga agtutubo babaen ti panangipaay iti daytoy napateg nga impormasion.

N. C., Estados Unidos

Ti artikulo ginutugotna ti puso ti sangapulot’ tawenna a balasitangko. Kas agsolsolo a nagannak, ikagkagumaak unay, ngem awan pigsa ken anusko a mangsaranget kadagiti inaldaw a pakarigatan. Kalpasan ti panangilawlawagko iti impormasion kenkuana, nasaysayaat ti pannakaawatnan iti masansan a marikriknak. Nagsinnangitkam a dua, ken nabigbigna a talaga nga isut’ dungdunguek.

C. L., Estados Unidos

Iti Tapaw ti Europa Kayatko ti agyaman iti artikulo nga “Iti Tapaw ti Europa Babaen iti Riles.” (Disiembre 8, 1992) Pinaregtanak a sarungkaran ti Jungfraujoch, iti asideg ti Interlaken, Switzerland. Iti kangato a 3,454 metro manipud iti patas ti baybay, maapresiarko a naimbag ti kinapintas ti aramid ti Dios ken ti kinaranga dagiti bambantay a dagiti tapawdat’ napno iti niebe.

P. L., Italia

Musika Agtawenak iti 12. Ti artikulo nga “Agimtuod Dagiti Agtutubo . . . Aniat’ Naalas iti Pagay-ayatko a Musika?” ket makatulong unay. (Pebrero 8, 1993) Diak met maiddep ti pagay-ayatko a musika, nga uray la dumngegak bayat nga agad-adalak. Addaanak met iti sumagmamano naalas a compact disc, ket mamin-adun a makirupirak kadagiti nagannakko gapu kadagitoy. Idi nabasak no kasano a ti panagdengngeg iti musika impluensiaannak, mariknak a kasla naduyok iti immuko ti pusok. Pampanunotek ti panangibelleng iti aniaman a naalas a disc. Pagyamanan unay.

M. H., Japan

Nasarakak a naisangsangayan unay ti artikulo. Nakaskasdaaw no kasano a dagiti adu nga agtutubo palubosanda ti bagbagida a makiraman kadagiti rebelioso a kankanta ken estilo ti panagkawkawes. Dagitoy nga artikulo ket pudno a salaknib kadakami nga agtutubo a Kristiano.

M. M., Italia

Saan a nasayaat ti panangiparang ti artikulo iti musika a rap. Mamin-adu a makibarkadaak iti dadduma nga agtutubo, ket ag-rap-kami. Pudno, addada kanta a naalas ti lirikoda. Ngem ti en heneral a panangisalaysay maipapan iti rap ket di umiso.

B. R., Alemania

Saan a naan-anay a kinondenar ti artikulo ti rap kas maysa a kita ti musika. Imbes ketdi, namakdaar dayta maibusor iti pannakainaig iti aniaman a kita ti musika a di maitunos ti intero a mensahe ken kaipapananna kadagiti pagalagadan ti Biblia. Nalawag nga ipakita ti pammaneknek a ti musika a rap saanna a masurot daytoy a banag.​—ED.