Pagballigiento Kadi ti Baro a Katekismo Dagiti Kasasaad?
Babaen ti koresponsal ti Agriingkayo! idiay Italia
“MAYSA a Katekismo Agpaay iti Tawen 2000,” “Ti Listaan Dagiti Baro a Basol,” “Baro a Ladawan ti Iglesia”—dagitoy dagiti nabiit pay a paulo dagiti damdamag iti pagiwarnak nga Italiano maipapan iti baro a Catechism of the Catholic Church, a naipablaaken iti Aleman, Español, Italiano, ken Pranses. Idiay Italia ti naglakuan iti katekismo ngimmato agingga iti 110,000 a kopia iti nakurang pay a tallo a lawas. Siempre, iti maysa a pagilian a Katoliko a dandani 58 milion a tattao, dayta a bilang ket saan unay a nangato. Maysa a mannurat nga Italiano ti nagkuna nga asinoman a gumatang iti dayta “a mangsapsapul laeng iti katalogo dagiti baro a basol” ket “maupayto.”
Opisial nga imparang ni Papa Juan Paulo II, idi Disiembre 7, 1992, ti 450-panid a libro nga inawaganna a “nakagupgopan ti Katoliko a pammati ken moral.” Nasurok nga innem a tawen a panangulit-ulit a panangisurat, a buyogen ti adu a pammabalaw manipud iti ummong dagiti Katoliko sakbay a napataud daytoy a tomo. Gagangay, dayta isaknapna ti misterio ti Kakristianuan “iti Kasasantuan a Trinidad . . . , ti kangrunaan a misterio iti pammati.” Kunaenna met a “tunggal naespirituan a kararua ket pinarsua a direkta ti Dios . . . , ket saan a matay dayta.” (Idiligyo ti 1 Corinto 15:28; Mateo 24:36; kitaenyo pay ti Ezequiel 18:4, 20.) Ngem apay a nasken ti baro a katekismo?
Maysa nga eskolar a Katoliko nagsurat: “Adu a katekismo nga impablaak dagiti sentro ti diocesis agpaay iti katekismo ti apurado unay, napno kadagiti biddut a sursuro ken panaglablabes.” Ngem dagitoy nausaren iti adu a tawtawen a nangdoktrina kadagiti matalek a Katoliko. Kinuna ti publikasion a Katoliko a La Civiltà Cattolica a ti baro a teksto isut’ mangipaay iti “maysa a napateg a tulong a mangipanamnama iti panagkaykaysa ti pammati,” a nagunggonen kadagiti nabiit pay a dekada. Kinuna ti papa a mismo: “Narigat a makita ti rinang-ayan nga iyegto daytoy a katekismo. Nupay kasta, . . . dayta mabalin a maysanto a napateg, nabunga nga instrumento agpaay iti naun-uneg a pannakaammo ken maysa a mapagtalkan a naespirituan ken moral a pannakapabaro.”
Kastanto ngata ti pagbanaganna? Daytoyto kadi a katekismo ti mamagkaykaysa kadagiti Katoliko? Dagitoy a pannakabingbingay ket nalawag a makita iti panagtignay dagiti Katoliko iti sangalubongan kadagiti isyu a kas iti aborsion, panglapped iti sikog, liberation theology, ken ti pannakipaset kadagiti makuna a nainkalintegan a gubgubat (uray no agbanag dayta iti panangpapatay dagiti Katoliko kadagiti Katoliko). Iti natantan-ok a kasasaad, adda di panangikankano ken panaglalasin dagiti nabilbileg itan nga Opus Dei, a tultulongan ti papa ken adu a dadakkel impluensiana a miembro ti herarkia, ken dagiti Jesuita, nga itan saanen a pabpaboran ti papa.
Daytoyto kadi a katekismo ti mangbalbaliw iti puspuso ken kababalin dagiti rinibo nga Italiano a papangulo ti politika ken negosio a nabiit pay a nairaman iti kinadakes ken eskandalo? Ngem kasanonto ngata ti kauneg ti pudno a panangapektar daytoy a pagalagadan iti kababalin dagiti natatan-ok nga agtuturay iti Italia? No di agballigi a mangbalbaliw iti kababalin dagiti agtuturay, apay koma a maimpluensiaan ti gagangay a Katoliko? Yantangay adda 450 a panid ti tomo—ken saan met a pagay-ayat ti kaaduan a tattao ti panagbasbasa—mainanamanto kadi ti napaut nga epekto [dayta] iti kababalin?