Sangalubongan a Gobierno—Ti Kadi Naciones Unidas ti Sungbat?
NAGUN-ODAN ti Naciones Unidas ti napabaro a panagtalek ken panagrayo ti lubong iti kallabes a tawtawen. Iti minilion ti pangababaan a “NU” iparangna dagiti ladawan ti kinatured: dagiti nakakallugong iti asul a tropa a simamaingel nga agturturong kadagiti nariribuk a paset ti lubong tapno ipasdekda ti talna, dagiti mangsaranay a mangipaay iti taraon kadagiti matmatayen iti bisin a nagkamang idiay Africa, ken napasnek a lallaki ken babbai a naimpusuan a mangikagkagumaan a mangipasdek iti maysa a baro a lubong nga urnos.
Sigun iti siam a bulan nga imbestigasion nga indauluan ti The Washington Post, a naipadamag iti International Herald Tribune, ti kinapudno iti likudan ti ladawan ti kinatured ket “maysa a nasaknap, saan a matengngel a turay ti sumagmamano a tao, nga abusado ken imperpekto a mangdadael iti nasayaat a panggepna.” Ti panagadal a naibatay iti rinibo a panid dagiti dokumento ken interbiu kadagiti madama ken dati nga opisial ti NU, ti nangwaknit iti sumaganad a ladawan.
Tulong Idiay Africa: Nangipaay ti NU iti binilion a doliar iti agkasapulan unay iti tulong nga Africa, maysa a kontinente nga agsagsagaba iti gubat, bisin, kinapanglaw, ken sakit. Adun a biag ti naispal.
Kaskasdi, rinibo a biag ken minilion a doliar ti napukaw gapu iti saan a nasayaat a panangiwanwan, kinaliway, ken, masansan, kinakusit. Nangipaay ti NU iti mangsaranay a tulong iti sinaplit-bisin a Somalia, a sadiay adu a tao ti matmatay iti kada aldaw. Ngem inadaw ti Tribune ni Aryeh Neier, executive director ti Human Rights Watch a kunkunana: “Ti Naciones Unidas ken ti nadumaduma nga organisasionna ket kasta unay ti kinaliway ken kinakapuyda a gistay awan man la ti pasetda iti panangep-ep iti nakalkaldaang a kasasaad ti Somalia.”
Nangakusar pay met ti padamag a dadduma nga opisial ti NU ti naikumplot iti panangsuitik iti tulong a taraon, panangtakaw kadagiti naasi a tulong, panangsaur tapno makagun-od iti kasapulan ken serbisio, ilegal a panangsukat iti kuarta, ken panangtengngel iti panangsukat iti kuarta. Napaneknekan dagiti imbestigador ti NU nga adu ti kasta a panangsaur iti pito a pagilian ti Africa.
Panangtaginayon iti Talna: Ti panangtaginayon iti talna ti kangrunaan a kalat ti NU, nupay no kadagidi tawen sipud ti pannakaipasdekna idi 1945, ginasut dagiti nakaro a panagraranget, ket 20 milion a tattao ti natayen iti gubat. Ngem nanipud idi 1987, indaulo ti NU ti 13 a mangtaginayon iti talna a ganuat, ad-adu ngem iti intero a pakasaritaanna kasakbayanna.
Nupay mabalin a kunaen ti dadduma a ti gatad dagitoy a ganuat ket nasaysayaat ngem ti nakaro a bunga ti gubat, adut’ agreklamo a limbes unayen dagiti bambanag. Kas pangarigan, nagpaut dagiti ganuat ti panangtaginayon iti talna iti pinulpullo a tawen, a naggatad iti ginasut a milion a doliar idinto ta awan met nagmamaayan dagiti negosasion. Ti mangtaginayon-talna a mision ti NU idiay Cambodia ti nangibadyet iti nasurok a $1 a milion para kadagiti set ti TV ken VCR nga agpaay kadagiti tropa ken $600,000 pay para kadagiti suskripsion ti magasin ken periodiko.
Panagbalbaliw: Adda nasaknap a panagkalikagum iti panagbalbaliw iti uneg ti NU, ngem nagduduma dagiti kapanunotan no aniat’ rumbeng a mabalbaliwan. Kalikaguman dagiti napanglaw a pagilian nga adda dakdakkel a pasetda iti panagaramid kadagiti pangngeddeng ken kayatda a parang-ayen dagiti programa para iti ekonomia ken kagimongan. Kayat a kissayan dagiti nabaknang a pagilian dagitoy a programa ken pagpatinggaen ti kinakusit, di nasayaat a panangiwanwan, ken panangsayang.
Kinuna ti maysa a nangato nga opisial ti NU: “Tapno talaga nga adda panagbalbaliw, masapul nga aramidem ti imposible iti turay ti sumagmamano a tao: Masapul a dalusam ti disso. Tapno makaaramid iti pagsayaatan, masapul nga ikkatem ti 45 a tawen dagiti barnacle, ket adu unay dagita a barnacle.”
Nupay patien dagiti Kristiano a kasapulan ti maymaysa a turay a mangaywan kadagiti ganuat ti sangatauan, dida patien a ti Naciones Unidas ti sungbat. Imbes ketdi, in-inanamaenda ti Pagarian ti Dios, ti gobierno nga insuro ni Jesus nga ikararag dagiti pasurotna.—Mateo 6:10.