Manipud Managbasatayo
Kasuno a Kinaina Iti artikuloyo a “Kasuno a Kinaina—Agpaay Aya Kadagiti Kristiano?” (Marso 8, 1993), inadawyo ti Levitico 18:20 a kunana: “Dikanto ited ti semiliam iti asawa ti padam a tao.” Nupay kasta, sisisimple a kunaen ti King James Version: “Ket sika dikanto kaidda a kaabig ti asawa ti padam a tao.” Umasping met laeng iti dayta ti The New English Bible ken New American Standard Bible. Balbaliwanyo dagiti Kasuratan. Ania ti orihinal a kuna ti Sao ti Dios?
S. S., Estados Unidos
Sabali ti panangipatarus ti kaaduan a patarus iti daytoy a bersikulo. Ti “New World Translation” impaulogna dayta iti literal, kas met laeng ti “The NIV Interlinear Hebrew-English Old Testament” ken ti “The Interlinear Hebrew/Greek English Bible.” Ti naud-udi impaulogna daytoy a bersikulo: “Ket dikanto ited ti semiliam iti asawa ti kaarrubam.”—ED.
Lulua Kasta unay ti pannakaallukoyko iti artikulo nga “Apay Agluatayo?” (Setiembre 22, 1992) Kayatko idi a maammuan no apay nga agsangittayo ken no aniat’ maaramidan dagiti lua. Gapu iti daytoy nagsayaat ti pannakaisuratna nga artikulo, naawatak met laengen. Tinignaynak nga agyaman iti kasta unay ken Jehova iti naisangsangayan a panangparsuana kadatayo.
F. G., Portugal
Panagadal iti Pagtaengan Pagyamanan unay iti artikulo a “Panagadal iti Pagtaengan—Agpaay Aya Kadatayo?” (Abril 8, 1993) Madama nga isursurok ditoy balay ti dua kadagiti uppat nga annakko. Namin-adun nga ibagbaga ti dadduma a nalabes unay ti panangsalaknibko kadagiti annakko. Maapresiar unay ti neutral a takderyo iti daytoy a banag.
B. W., Estados Unidos
Pakasaritaan ti Biag Kadagiti amin a nabasak, nalabit ti kapadasan ni Marlene Pavlow a “Ti Iyaadani iti Dios Tinulongannak nga Agibtur” (Marso 22, 1993), ti makaparegta unay. Magustuak ti napudno ken nabatad a panangdeskribirna iti biagna. Gapu ta kasta met laeng dagiti parikutko, mariknak a naisinggalutak ken Marlene. Pagyamanan kadagiti nagsayaat nga artikulo agpaay kadagiti nanumo a tattao a kas kadakami. Maragsakanak nga adda gayam namnama no addada sabsabali nga addaan rag-o ken rigat a kas kadakami.
R. H., Estados Unidos
Diak pay nakabasa iti artikulo a nakaallukoy unay kaniak. Dineskribirna ti biagko a mismo iti sao por sao. Talaga a daytat’ kasapulak!
K. B., New Zealand
Pananglinglingay Nagsuratak tapno komendarankayo iti artikulo a “Kayatyo Aya a Linglingayen Dagiti Gagayyemyo?” (Abril 22, 1993) Kas maysa nga agdadamo a musiko, nagunggonaanak unay iti dayta. Masansan nga awisendak dagiti gagayyemko a mangparagsak kadagiti sosial a panagtataripnong babaen ti panagtokar ken panagkanta. Talaga nga ekselente dagiti singasingyo maipapan iti panangpasayaat ti panagpabuya ken panangiraman kadagiti tumabuno iti panagpabuya!
P. S. S. M., Brazil
Taraken Iti artikulo a “Tarigagayan Kadi ti Anakyo ti Taraken?” (Enero 22, 1993), kinunayo: “Dagiti taraken a pusa impektaranda ti agarup 3,300 a dandani agpasngay nga inna iti tinawen a toxoplasmosis, nga agbanag iti 15-porsiento nga ipapatay dagiti kayyanak.” Sigun iti maysa a mapagtalkan a gubuayan, bassit unay ti posibilidad ti pannakaiyakar daytoy a sakit. Saan ngata nga aglablabes met ti panangipakdaaryo kadagiti peggad ti panagtaraken iti pusa?
K. T., Japan
Ti nadakamatyo a sasao ket naadaw manipud iti “U.S.News & World Report.” Nupay bassit laeng kadagiti masikog ti inimpektaran dagiti pusa, kaskasdi a mamakdaar ti “Wellness Letter” nga impablaak ti University of California idiay Berkeley kadagiti masikog maibusor iti “kinadekket unay iti pusa.” Naimbag ta saan a pulos a maiyakar ti sakit babaen ti panangsagid iti pusa. Kuna ti “Wellness Letter”: “Masansan a maiyakar ti sakit no maiggananyo dagiti ibleng ti pusa, kas koma no agibellengkayo iti ibleng ti pusa.”—ED.