Baro nga Armas Maibusor ti Malaria

KAS naipadamag iti Agriingkayo! a Mayo 8, 1993, agsubsubli ti malaria kas maysa a sangalubongan a saplit. Impadamag ti The New York Times (Marso 23, 1993) nga idi “napan a tawen, inrekord ti Brazil ti 560,000 a baro a kaso ti malaria.” Tinawen a 8,000 a taga Brazil ti matay iti malaria. Itan maysa nga imbestigador a taga Colombia, ni Dr. Manuel Elkin Patarroyo, addaanen iti naiduma a pamay-an ti panangagas​—maysa a sintetiko a kemikal a bakuna nga aggatad laeng ti 30 a sentimo para iti tallo a bakuna. “Nalaklaka pay ngem ti gatad ti maysa a Coca-Cola [idiay Colombia],” kinuna ni Dr. Patarroyo. Ita daytat’ napaneknekanen nga epektibo iti agarup 67 porsiento kadagiti agsakit a naagasan. Nupay saan a naan-anay a makaagas iti makapapatay a malaria, agparang a daytat’ maysa a dakkel nga irarang-ay iti pannakidangadang a mangbusor iti malaria.