Manipud Managbasatayo
Siensia Nakapagsuratak tapno padayawan iti innem-pasetna a seryeyo a “Siensia—Ti Agtultuloy a Panangsapul ti Sangatauan iti Kinapudno.” (Abril 8 agingga ti Hunio 22, 1993) Awan idumduma ken makaisuro dagiti artikuloyo. Kas maysa a sientista, nasdaawak a nakaammo no kasano a dagiti Griego a pilosopo a kas kada Aristotle, Plato, ken dadduma, naimpluensiaanda ti sientipiko a kapanunotan.
O. O., Estados Unidos
Iti maikanem a paset ti seryeyo (Hunio 22, 1993), kinunayo: “Biang ti siensia ti kasta unay a pannakadadael ti aglawlaw.” Saan a ti siensia ti mapabasol iti di umiso a pannakausar dagiti pinartuatna. Ti mapabasol ket dagiti gobierno a nangipakat kadagiti lausen a legal a pamay-an a mangtarawidwid iti pannakausar ti teknolohia.
C. C. R., Estados Unidos
Ti serye saanna a panggep a pabasolen dagiti sientista laeng kadagiti parikut ti aglawlaw ti daga. Kinapudnona, nabatad a kinuna ti sakbayna a sentensia a ti siensia ket basta ‘timmulong a nangpataud’ kadagita a parikut. Impakita dagiti napalabas nga artikulo ti serye a dagiti sientista ket mapabasol a kadua dagiti politiko, negosiante, ken managgatang.—ED.
Naiputputong Pagyamanan iti pakasaritaan ti biag ni Pepita Abernathy, “Makagunggona a Biag Nupay Naiputputong.” (Pebrero 22, 1993) Pinagarubosna dagiti luak. Kanayon a marigatanak a mangasaba kadagiti gagayyem wenno kadagiti teritoria nga awan unay ti mangipakita iti interes. Ngem nangasaba ni Pepita Abernathy iti nadumaduma a paset ti lubong uray no dina ammo ti pagsasaoda! Ita, simmayaaten ti kababalinko iti trabaho a panangasaba.
J. W., Estados Unidos
Musika Kalkalpasko a binasa ti serye a “Moderno a Musika—Di Makadangran a Pagraragsakan?” (Hunio 8, 1993) Idi addaak iti high school, pagay-ayatko ti musika a heavy-metal. Dagiti dakes nga ugali ken rebelioso a kababalinko ti imbunga dagiti kapanunotan a naipanayag iti daytoy naalas, sinasairo-ti-unina a musika. Ngem iti ad-adda nga iyaadanik ken Jehova, ad-addan a kagurak uray pay ti uni dayta a musika!
L. K., Estados Unidos
Inikkandakami nga agtutubo iti nasayaat a balakad a naibasar iti kabaruan ken mapagtalkan a gubuayan. Ipagarup ti dadduma a mayat latta ti musika la ketdi no saan a heavy metal wenno rap, nupay itantandudona ti imoralidad, kinaranggas, ken ti panangusar kadagiti droga. Sinumra dagitoy nga artikulo daytoy biddut a kapanunotan. Ammomi itan no kasano ti agbalin nga ad-adda a napili iti musikami.
F. M., Italia
Nabiit pay a nailaksid ti barok manipud ti kongregasion Kristiano. Inkagumaak a pasardengen iti panangdengngegna iti musika a rap—nakirinnason kenkuana, impakita kenkuana dagiti prinsipio ti Biblia, inranud dagiti artikulo kenkuana maipapan ti suheto. Ngem intultuloyna ti nalimed a panangdengngegna iti rap, a pagarupna a di makadangran dayta kenkuana. Nupay kasta, nakaaramid kadagiti dakes a naitandudo iti daytoy a musika. Talaga a maladingitanak iti pannakailaksid ti barok. Manginanamaak nga amin a Kristiano a nagannak ipategdanto daytoy nga impormasion babaen ti panangibasa ken panangiyadalda iti dayta kadagiti annakda.
G. C., Estados Unidos
Saanyo laeng nga inlawlawag dagiti kita ti musika a masapul a liklikan, ngem pinatalgedanyo dagiti inlanadyo kadagiti di masumra, ngem naalumamay ken naayat a panagrason. Mariknami ti kasta unay a tarigagayyo a mangtulong kadagiti agtutubo nga adaywan daytoy talaga a nadangkes a lubong.
B. V., Francia