Ti Pananggun-od iti Material a Kinarang-ay
BABAEN TI KORESPONSAL TI AGRIINGKAYO! IDIAY TAIWAN
‘SAAN a magatang ti kuarta ti kinaragsak!’ Nupay ad-adda nga umanamong ti kaaduan a tattao iti dayta a sasao, adu kadakuada ti kaskasdi nga awan sardayna a manggunggun-od iti material a kinabaknang kas pamay-an ti naragragsak a biag. Ket apay a saan? Ta, kasla ti solusion ti nagadu a parikut ti sangatauan agpannuray iti material a balligi ken kinarang-ay.
Panunotenyo laengen nga anian a nagpaiduma a lubong dayta no tagiragsaken ti tunggal lalaki, babai, ken ubing ti narangrang-ay a namaterialan a panagbiag! Awanton dagiti pakaibabainan ken panagsagaba ti minilion nga agindeg kadagiti iskuater iti lubong. Awanto metten ti parikut iti kinaawan pagtaengan a mangsapsaplit itan iti tunggal nasion, nabaknang ken napanglaw.
Ket ti ngay naimbag a salun-at, a napateg unay iti kinaragsak? Nupay no napartak ti panagrang-ay ti medikal a siensia, umad-adu a tattao ti makasarsarak a dida kabaelan ti ipaayna a medikal a panangaywan. Iti kasumbangirna, ti bisin ken malnutrision kaskasdi nga inaldaw pay laeng a mapaspasaran ti minilion. No nasaknapen ti kinarang-ay iti sangalubongan, tunggal maysa addaan koman iti gundaway nga agbiag a sisasalun-at, ket iti kasta naragragsak ti panagbiag—saan kadi?
Magunggonaan pay ti daga a mismo. Kasano? Madaddadael itan ti aglawlaw ti daga babaen kadagiti makapapatay a mangmulit, a dadduma ti pinataud ti pananguram kadagiti sungrod nga agtaud iti daga (kas iti karbon, krudo, ken gas). Kaskasdi, maysa a naibaga a rason no apay a saan a maus-usar ti teknolohia a mangusar iti nadaldalus a kita ti enerhia ket nakanginngina dayta. Ti pannakadadael dagiti natutudo a kabakiran, maysa pay a nakaro a pagpeggadan ti ekolohia, ket maipabasol met a nangnangruna iti bambanag a mangapektar iti ekonomia.
Nupay saan met a dakes ti pananggun-od ken panangtagiragsak iti material a bambanag a mismo, maipanamnamana kadi ti kinaragsak? Kasano koma ti panangipategtayo iti dayta? Ti kadi kinarang-ay ti material ti solusion a mangiturong iti nasaysayaat a lubong?
Yantangay ti irarang-ay iti material ti kasla mangsolbar iti adu a parikuttayo ken kissayanna ti adu unay a panagsagaba, saan a nakaskasdaaw a dagiti tattao nabayagen nga innaigda ti kinabaknang iti kinaragsak. Kas pagarigan, nupay gagangay a dagiti taga Laud kablaawanda ti maysa ken maysa babaen iti “Naragsak a Baro a Tawen!” iti Aldaw ti Baro a Tawen, dagiti Insik, bayat ti pangrugian ti Baro a Tawen a lunar, gagangayen a kunaenda “Kung hsi fa tsai” iti maysa ken maysa, a mangnamnama a ‘bumaknangda!’ Wen, di mailibak nga agbibiagtayo iti maysa a lubong a sadiay nalabes ti panangipangruna dagiti tattao iti pananggun-od iti material a kinarang-ay, no saan nga isut’ kangrunaan nga ipangpangrunada. Ti balligi wenno di panagballigi ket masansan a marukod babaen iti material a kinabaknang ti maysa a tao.