No Kasano a Maispalto ti Atmosperatayo
SITUTULOKTO kadi dagiti tattao a sumardeng a mangpunno iti tangatangtayo iti rugit? Kastoyto kadi ti pannakaispal ti atmosperatayo?
Saan. Ti panangispal iti napateg nga atmosperatayo ket saan nga agpannuray iti panagtulnog ti tao kadagiti kasapulan a manglapped iti polusion. Imbes ketdi, ti pannakibiang Daydiay a mangikut iti katan-okan nga autoridad ti mangyegto saan laeng a ti maysa a nadalusanen nga atmospera no di ket ti maysa a nadalus pay a daga.
Ti panangipateg ti Namarsua iti dagatayo ken ti biag nga adda iti dayta ket naipakita babaen kadagiti nakaskasdaaw a pamay-an ti panangdiseniona iti dayta. Inaramidna dayta nga agpaut iti awan inggana, uray pay iti agnanayon.—Salmo 104:5, 24.
Dagiti Probision a Mangtaginayon
Ti atmospera, kas pagarigan, ket naparsua iti pamay-an a tarimaanen ken dalusanna ti bagina met laeng. Usigenyo ti ozone iti makinngato nga atmospera. Ti mangsalaknib nga ozone ket sisisirib a naaramid tapno agsepenna ti radiasion ti ultraviolet a mabalin a makapapatay kadagiti tao ditoy daga. Maigiddato iti dayta, palubosanna a sumarut ti di makapapatay a lawag a kasapulan ti naindagaan a biag.
Naammuantayo nga immun-una a ti mangsalaknib nga ozone ket kasta unay ti pannakadadaelna babaen kadagiti inaramid-tao a chlorofluorocarbon, nga agpangato iti makinngato nga atmospera. Kasano a masukatan ti manglinged a salaknib nga ozone? Nakaskasdaaw, dinisenio ti Namarsua dayta tapno tarimaanenna ti bagina met laeng. Wen, kanayon a maparsua ti ozone iti makinngato nga atmospera—kinapudnona, babaen kadagidiay met laeng makadangran a silnag ti init a sagaten ti ozone! Gapuna, kagiddan met la dayta a tiempo a napartak a panangdadael ti panangmulit ti tao iti ozone, dadduma nga ozone ket masuksukatanda.
Umasping dayta iti makimbaba nga atmospera, a sadiay masarakan ti kaaduan iti nasurok a 5 quadrilion a tonelada nga angin. Dagiti gagangay a siklo sipapartak a dalusanna daytoy nga angin kadagiti mangmulit a banag iti nakaskasdaaw a pamay-an. Agkomento ti The World Book Encyclopedia: “Isaknap ti angin dagiti mangmulit, ket ti tudo ken niebe ugasanna ida nga ipadaga.”
Nalawag ngarud, no isardeng ti tattao ti panangmulit iti angin, wenno kissayanna ti kasta unay a panangmulit, di agbayag nasam-itton ken makapasalibukag ti angin iti sadinoman. Kaskasdi, ti nadakamat nga immuna a libro ilasinna ti parikut, nga ilawlawagna: “Kadagiti adu a lugar, naparpartak ti pannakaikabil dagiti mangmulit iti angin ngem ti panangikkat ti panniempo kadakuada.”
Kasano ngarud, a mapasardengto ti inaagum a panangmulit ti tao iti atmospera?
Asidegen ti Nadalusan a Daga
Ti laeng Dios a mismo ti mangpasardengto iti polusion, inton isut’ makibiang. Ipadto ti Biblia a ‘yegna ti pannakadadael dagidiay mangdaddadael iti daga.’ (Apocalipsis 11:18) Dinanto ipalubos dagiti naagum a tattao nga agtultuloy nga awan inggana a mangmulit itoy napintas a daga ken ti mangtaginayon-biag nga atmosperana. Ikarina: “Dagiti agaramid iti dakes magessatdanto; ngem dagidiay nga agpannuray ken Jehova, tawidendanto ti daga.”—Salmo 37:9.
Kasano a mayeg ti panungpalan kadagitoy amin a managdakdakes? Daytanto ket babaen ti nailangitan a gobierno ti Dios, ti Pagarianna, isu a mangsukatto kadagiti di maitutop a gobierno ti tattao. Ikari ti Biblia: “Ti Dios ti langit mamangonto ti maysa a pagarian a kaanoman dinto madadael. Ket ti pagarian a mismo . . . burakennanto ken ibusennanto amin dagitoy a pagpagarian, ket isu agtalinaedto iti agnanayon.” (Daniel 2:44) Daytoy a gobierno ti Pagarian ti Dios isu daydiay insuro ni Jesus nga ikararag dagiti pasurotna: “Umay koma ti pagariam. Maaramid koma ti pagayatam, kas sadi langit, kasta met iti rabaw ti daga.”—Mateo 6:10.
Ti pagayatan ti Dios agpaay iti dagatayo ket iturayan koma ti Pagarianna dagiti tattao ket iti kasta tagiragsakenda ti biag iti maysa a di namulitan nga aglawlaw. Dayta ti gapuna no apay a determinado ti Dios a “mangyeg ti pannakadadael kadagidiay mangdaddadael iti daga.” (Apocalipsis 11:18) Anian a nagtan-okto dayta a panangisalakan!
Panunotenyo laengen ti panagbiag iti maysa a daga nga awanan kadagiti amin a polusion nga imbunton dagiti naagum a tattao iti dayta! Iti dayta a tiempo, ti napateg nga atmosperatayo maisublinton iti nasalun-at a kasasaad. Mapasamakto daytoy inton matungpalen ti kari ti Biblia: “Adtoy! Ti tolda ti Dios adda iti sangatauan, ket isu makipagnaedto kadakuada, ket isudanto dagiti tattaona. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten ti panagleddaang wenno panagsangit wenno ut-ot. Dagiti immuna a bambanag naglabasdan.”—Apocalipsis 21:3, 4; 2 Pedro 3:13.
Aniat’ masapul nga aramidenyo tapno makalasat a sumrek iti nalinteg a baro a lubong nga ikari ti Dios? Masapul nga ammuen ken surotenyo dagiti sursuro daydiay nga imbaon ti Dios ditoy daga kas pannakabagina. (Juan 3:16; 7:29) Daytoy, ni Jesu-Kristo, kinunana iti kararagna iti Dios: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.”—Juan 17:3.
[Ladawan iti panid 10]
Asidegen ti maysa a nadalus, di namulitan a paraiso a daga