Manipud Managbasatayo

Panagpakatawa Kayatko a yebkas ti panangapresiarko iti artikulo a “Paragsakenyo ti Biagyo.” (Mayo 22, 1994) Kanayon a managpakniak, masansan a gapu ta managpudpudot ti ulok. Idi nasursurok a paragsaken ti biagko, nagbalbaliw dagiti bambanag. Talaga a ti kinaparato “ti kaasitgan a distansia iti nagbaetan ti dua a tao.”

A. Q. G., Brazil

Kanser Nabiit pay nga inikkak ti doktor ni nanangko iti kopia ti Abril 8, 1994, a ruar maipapan iti “Kanser ti Suso​—Pagam-amkan ti Isuamin a Babbai.” Iti panid 10, dineskribiryo ti hydrazine sulfate kas maysa a “di makasabidong a droga.” Impakita ti doktor kadakami ti maysa a libro ti medisina a nangilista iti dayta kas makasabidong unay.

D. M., Francia

Tangay nabatad a pagsusupiatan ti sabidong daytoy a kemikal, nagbiddutkami iti panangawagmi iti droga a di makasabidong. Akuen ti maysa a panagadal dagiti managsirarak a Ruso a napaneknekan a makasabidong unay dayta idi naipakan ti adu a kantidad kadagiti utot ken marabutit. Nupay kasta, iti maysa a klinikal a panagadal iti kanser kadagiti pasiente a tattao a naaramid idiay UCLA Medical Center, ti sabidong ti hydrazine ket naipadamag a “kalalainganna” kadagiti 71 porsiento a pasiente a nangipadamag nga awan dagiti makasabidong nga epektona. Di pagduaduaan a masapul nga ad-adu pay ti maaramid a panagsirarak sakbay a naan-anay a matingiting dagiti peggad ken posible a pagimbagan daytoy a droga.​—ED.

Opera Kanayon a pampanunotek a nagsayaat dagiti artikuloyo, ket kanayon a mariknak a naisuratda a nangnangruna nga agpaay kaniak. Ngem diak impagarup nga agsuratkayo maipapan iti banag a pudno unay a pagay-ayatko, ti opera. Diak malapdan ti agsangit idi nakitak ti artikulo a “Maysa a Rabii Idiay Opera.” (Hulio 8, 1994) Pagyamanan unay.

S. S., Romania

Pakasaritaan ni Addie Nalawag a naisangsangayan ti artikulo a “Naladawen a Naammuan ni Addie ti Sungbat Ngem Saan Pay a Naladaw Unay” (Hulio 22, 1994)! Daytat’ kas ti panangbasa iti maysa a nobela, malaksid a talaga a pudno dayta a pakasaritaan. Naparegtaak idi naamirisko a ti kababagas ti pakasaritaanna ket ti kaeepektibuan a wagas a pangtulong iti padatay a tao isut’ panangasaba!

D. L., Italia

Kabasbasak ti pakasaritaan ti biag ni Addie Clinton Few, ket damo unay iti 19 a tawenen a panagbasbasak iti Agriingkayo! nga agsuratak tapno agyaman! Maysaak met a nangisit ken nagsagaba kadagiti pananglais ti manangilupitlupit a kagimongan iti unos ti biagko. Ngem naadalko a talaga a maseknan ni Jehova iti kasasaad dagiti amin a nangisit a tattao ket ti inkarina a baro a lubong ti mangilintegto iti amin a kinakillo.

L. N., Estados Unidos

Impakita ti artikulo ti laing ken kinaparatona a napakuyogan ti kinapakumbabana. Naglaing a talaga nga agestoria! Nasarakak ti paggibusan a makatukay unay iti rikna. Nakaluganak idi iti bus a pasaray makakatawa santo makasangit.

D. M., Estados Unidos

Nalukmeg Unay Nagustuak ti artikulo nga “Agimtuod Dagiti Agtutubo . . . Apay a Nalukmegak Unay?” (Abril 22, 1994) Masuronak a kanayon iti kinalukmegko, ngem kinuna ti artikulo a saan a ti makinruar a langam ti kitkitaen ni Jehova no di ket ti adda iti pusom. Pagyamanan.

N. C., Estados Unidos

Nupay saanak a talaga a nalukmeg, no dadduma kayatko a ti langak ket kas koma kadagiti modelo. No dadduma maldaanganak ken agsangitak lattan. Tinulongannak ti artikuloyo a makaawat a saan laeng a siak ti makarikna iti kastoy, ket makaliwliwa dayta.

R. M., Estados Unidos

Saanak a nalukmeg unay, ngem nabanegak a babai nga addaan narakab nga abaga. Sursuronendak dagiti kasinsin ken manongko. Apresiarek unay ti puntoyo a nupay nabanegak, di kaipapanan dayta a masapul nga agpakuttongak.

M. T., Estados Unidos