Ti World Council of Churches—Umanamongen a Maiduma
BAYAT ti Agosto 3 agingga iti 14, 1993, pinasangbay ti siudad ti Santiago, España, ti naisangsangayan a grupo dagiti peregrino. Indauluan ti siudad ti maysa a Sangalubongan a Kumperensia iti Pammati ken Urnos, nga inlungalong ti World Council of Churches. Ti kalat dagiti delegado ket nagdakkelan—pabilgen ti naitantan a panangikagumaan a mamagkaykaysa kadagiti iglesia ti Kakristianuan.
Ti kasasaad ket nalawag nga inladawan ni Desmond Tutu, Anglicano nga arsobispo manipud Sud Africa, a kas “sangalubongan a di panagtignay.” “Isawsawtayo dagiti ramay ti sakatayo iti danum, ngem awan turedtayo a tumapog iti dayta,” insennaayna.
Saan a nalaka ti itatapog iti sangalubongan a panagkaykaysa. Timmaud dagiti panagsisina kadagiti delegado uray pay bayat ti panglukat a seremonia idiay katedral ti Katoliko iti Santiago. Ti “Hymn to St. James,” a nakanta bayat ti serbisio, ket nababalaw a kas panangitan-ok iti sinigsiglon a panangraut dagiti Español a Katoliko kadagiti Judio, Muslim, ken Protestante, uray pay no pinaregta ti arsobispo ti Katoliko a ni Rouco dagiti nakipaset a ‘mangipakita iti napasnek a kababalin nga umasping kadagiti peregrino a taga Santiago ket sapulenda ti pannakitunos kadagiti Kristiano.’
Adda kadi aniaman a kapanunotan a mabalin nga agserbi a mamagtutunos kadagiti Katoliko, Orthodox, ken Protestante? Insingasing ti maysa a grupo dagiti nagsirarak a dagiti nadumaduma nga iglesia matmatanda ti Nicene Creed a “kas ti kangrunaan nga ebkas ti apostoliko a pammati.” Inanamaenda daytoy a kredo nga agserbinto “kas maysa a pamay-an a mangibanag iti panagkaykaysa ti pammati,” uray pay no adda “panagduduma ti panangyebkas.”
Ti “panagduduma ti panangyebkas” naiparangarang a mismo a naulit-ulit bayat ti kumperensia. Inyebkas dagiti delegado nga Orthodox ken Katoliko ti panangsupiatda iti nabiit pay a pangngeddeng ti Anglicano a nanganamong iti pannakaordin dagiti babbai. Ti sabali pay a pagsusupiatan isu ti panagsalisal dagiti iglesia nga Orthodox ken Katoliko kadagiti dati a Komunista a pagilian. Kinuna ni Arsobispo Iakovos iti Greek Orthodox Church a biddut ti agsarita iti “panagebanghelio manen kadagiti tao a nagbalinen a Kristiano iti sinigsiglon” ngem daksanggasat ta nagbiagda iti pinulpullo a tawen iti sidong ti awanan Dios a Komunista. Kinapudnona, kinondenar ti maysa a report ti kumperensia ti “proselitismo” a kas lapped iti panagkaykaysa, nupay talaga nga inaminna ti pannakasapul ti ‘nalawlawag a pannakaawat iti kinamisionero ti iglesia.’
Nalidem ti panangdeskribir ni Samuel B. Joshua, obispo iti Bombay, iti panagkaykaysa dagiti iglesia kas maysa a “nakasaysayaat a kapanunotan.” Kalpasan a napadasanna a personal dagiti parikut a nairaman iti panamagkaykaysa kadagiti innem a denominasion idiay India, kinunana a “dagiti pagimbaganna ket parparawpaw” ngem dagiti pakarigatan “nagbalindan a di maibturan.” Patienna a ti Nakristianuan a panagkaykaysa saan a mabalin a sapulen “sigun kadagiti doktrina ken urnos ti simbaan.”
Ngem ti kadi panagkaykaysa a di mangikankano kadagiti doktrina ket pudno a panagkaykaysa? Dagiti kadi relihion a kaskasdi a di ‘makaawat iti kinamisionero ti iglesia’ pudno a sursurotenda ni Kristo? Kinuna ni Pablo a dagiti pudno a pasurot ni Kristo rumbeng nga itultuloyda ti “agpanunot a sangsangkatunos.” (2 Corinto 13:11) Ti basta yaanamong a maiduma ket kasta unay ti kinakurangna iti kasta a pagalagadan.