Makaunget ti Klero nga Anglicano iti Pannakaordin ti Babbai
BABAEN TI KORESPONSAL TI AGRIINGKAYO! IDIAY BRITANIA
IDI Nobiembre 1992, impaalagad ti General Synod of the Church of England ti maysa a singasing a maordinan dagiti babbai kas papadi. Kas resultana, agarup 150 a nakaunget a klero nga Anglicano ti nangyanunsio iti gandatda nga aglusulos iti 1995. Adu kadakuada ti agpanggep a sumrek iti Iglesia Katolika Romana. Kayat ti maysa a nangato ti saadna a klero nga alaen ti intero a parokiana—agraman ti simbaan a mismo! Ninamnama ti The Sunday Times ti Londres a ti pannakaordin ti umuna a grupo (a naangay met laeng idi Marso 1994) ket “kontrobersial unay a seremonia iti 450 tawen a pakasaritaan ti Church of England.”
Apay a nakapungtot dagiti adu a klero? Dadduma basta patienda a saan a maiparbeng kadagiti babbai ti agtakem kas papadi. Pagamkan ti dadduma a ti desision ti synod ti mangdadael iti nabiit pay a panagregget a mamagkaykaysa iti Church of England ken dagiti Katoliko ken Orthodox a relihion. Kinapudnona, inwaragawag ti maysa a pannakangiwat ti Vatican nga ibilang a mismo ti papa ti pammilin ti Church of England kas “nabatad a lapped ti tunggal namnama ti panagkaykaysa.”
Nupay kasta, kaskasdi a mabalin pay laeng a bumotos ti tunggal parokia ti Church of England tapno malapdan ti panagtakem dagiti babbai a papadi. Mabalinda pay laeng nga ilaksid ti obispoda sa ipatugaw ti agdaldaliasat a klero nga isunto ti “mangaywan kas pastor kadagidiay agkedked nga umawat iti dayta manipud kadagiti babbai a papadi,” sigun iti New York Times.
Anian a nagpaiduma iti balakad ni Pablo kadagiti immuna-siglo a Kristiano a “rebbeng nga agsaokayo amin a sangsangkatunos, ket awan koma dagiti panaglalasin kadakayo, no di ket naan-anay nga agkaykaysakayo koma iti isu met laeng a panunot ken iti isu met laeng a wagas ti panagpampanunot.” (1 Corinto 1:10) Bayat a bumarbara ti supiat, mangar-aramiden ti adu a kameng ti parokia iti bukodda a pangngeddeng. “Kasla awanen nabati pay ditoy a mamati iti Church of England,” kinuna ti maysa a babai. “Adda la rag-o ken pannakabang-arko no umikkatakon [iti Church of England].”