Manipud Managbasatayo

Industria ti Tabako Makaiwanwan ken makaisuro dagiti serye a “Panangpapatay iti Minilion Tapno Agbirok iti Minilion.” (Mayo 22, 1995) Makapasidduker ti impinta ni Vincent van Gogh iti akkub (“Bangabanga nga Addaan Sigarilio”)! Nalabit umdaston daytoy a ladawan a mamagsardeng iti dadduma a tattao nga agsigarilio wenno mangupay man la koma iti dadduma a mangirugi.

M. B., Estados Unidos

Tangay agtartrabahoak iti American Cancer Society, magagaranak a mangbasa kadagitoy nga artikulo. Nangipatulodak ti kopia iti maysa a babai a mangidadaulo iti lokal a sanga ti gunglo ti tobacco-free coalition. Dayawenna ti kalidad ti pannakaisurat ken panagsirarak ket nagkiddaw iti 35 a kopia para kadagiti katrabahuanna.

J. O., Estados Unidos

Gistay tallo a bulan nga insardengmin ken ni lakayko ti agsigarilio, ngem makasigsigarilioak pay laeng. Kalpasanna, nabasak daytoy nga artikulo, ket impaamirisna kaniak a makasabidong unay ti dadduma a ramen ti sigarilio nga uray la ilegalen ti mangibasura kadakuada iti daga a paggabur! Daytoy ti nangpabileg kaniak a guraen ti dakes.

L. T., Sud Africa

Agsagsagaba iti Lupus Pagyamanan unay iti impormasion maipapan ti lupus iti artikulo nga “Itan ni Laengen Mia ken ni Jehova.” (Pebrero 22, 1995) Agtawenak iti 18, ket agsagsagabaak iti daytoy a sakit iti agarup dua a tawenen. Makaparegta a maammuan no kasano a ti panagsagaba ti an-anduran dagiti sabsabali a kakabsat a lallaki ken babbai iti nadumaduma a paset ti lubong ken makita no kasano a ti Namarsua kadatayo kanayon a siaayat a badbadangannakami.

J. A. Y., Italia

Problema a Nagannak Ikarkararagko idi ti artikulo nga umasping iti “Agimtuod Dagiti Agtutubo . . . Kasanon No Agbiddut ti Nagannakko?” (Mayo 22, 1995) Anian a leddaang ken pannakasairko idi nailaksid ni nanangko manipud iti kongregasion Kristiano! Gistay insardengko ti agpayunir, ti amin tiempo a panagebanghelio. Pinabilegnak ti artikulo nga ‘itrabahok ti bukodko a pannakaisalakan buyogen ti buteng ken panagpigerger’ imbes nga agdanagak iti napalalo iti relasion ni Nanang ken ni Jehova. (Filipos 2:12) Pagyamanan unay.

J. P., Pilipinas

Maysaak a bautisado a Kristiano, ngem natakuatak a nagrigat a pagraeman ti amak nga inaldaw a nabartek no agawid. Agsangsangitak bayat a binasak daytoy nga artikulo. Ita ta nabasakon, nakissayan dagiti negatibo a rikna ken kapanunotak ken ni tatangko, sa nataltalgeden ti riknak.

N. M., Japan

Christian Science Ti artikulo a “Dagiti Seminar a Mangpasayaat iti Relasion Dagiti Doktor ken Dagiti Saksi ni Jehova” (Marso 22, 1995) ti naglaon iti komento maipapan iti panangtaming ti Christian Science iti sakit. Tapno makapagkikinnaawatan ti pammatitayo, kayatko nga ipasigurado kadagiti managbasayo a no agpannurayda iti naespirituan a panagpaimbag, ipateg ken saluadan dagiti Christian Scientist ti natauan a biag kas iti patienmi nga impakita ni Kristo Jesus nga aramidenmi. Iyilustrar ti maysa a rekord maipapan kadagiti mapasingkedan a panangpaimbag a naipablaak kadagiti pagiwarnakmi iti nasuroken a maysa a siglo a ti panagdayaw iti Dios, saan a kinamartir, ti motibomi. Ti agtutunos a resultana isut’ espiritual, moral, ken pisikal a kinasalun-at.

M. V. W., Manager, Committees on Publication, The First Church of Christ, Scientist, Estados Unidos

Pagyamanan kadagitoy a komento. Ti panggepmi a nangadaw iti sasao ti maysa a doktor isut’ panangitampok iti kinapudno nga awaten dagiti Saksi ni Jehova ti medikal a panangagas. Nupay pagraemanmi ti kalintegan ti dadduma a patien ti kayatda a patien, aktual nga imbaga ni Jesu-Kristo a “dagiti tattao a nasalun-at dida kasapulan ti mangngagas, no di ket dagiti masaksakit.” (Mateo 9:12) Ket idi nadakamat ni Pablo ‘dagiti masansan a panagsaksakit’ ni Timoteo, saan a nangisingasing iti naespirituan a panangagas no di ket nangitukon iti kadawyan a pangagas. (1 Timoteo 5:23) Maikontra ngarud ti panangmatmat ti Biblia maipapan iti panangagas kadagiti sursuro ti Christian Science.​—ED.