Manipud Managbasatayo
Panangmatmat iti Lubong Agbalbalin nga ad-adda a makapainteres dagiti magasinyo. Salaysayenda amin a tema—kaudian a damag, sports, siensia, ken dadduma pay. Makapainteres unay ti “Panangmatmat iti Lubong.” Iti panagkunak, no naikugnal koma dagiti damag iti TV iti daytoy a benneg, ad-adda pay koma a makapainteres.
R. S., Italia
Talaga nga apresiarek dagiti topiko a naisalaysay iti “Panangmatmat iti Lubong.” Ti maysa a talaga a naan-anay a nakaallukoyak isut’ Abril 22, 1995 a ruar. “Aniat’ Mangpalatak Kadagiti Mannursuro?” ti topiko. Kinuna ti artikulo a saan unay a paborito dagiti estudiante ti mannursuro a mangted iti bassit laeng a homework, ngem kaykayatda dagiti mannursuro a nasingpet, nadungngo, ken di mangidumduma. Pudno dayta! Nagadun ti kapadasak kadagiti mannursuro a paboritoda dagiti nalatak nga estudiante tapno agbalinda a nalatak. Ngem inton agangay, saan nga agtalinaed a nalatak dagita a mannursuro. Pagyamanan manen iti daytoy nagpateg nga impormasion.
L. K., Estados Unidos
Dagiti Ulbod a Padles Pagyamanan kadagiti serye a “Dagiti Ulbod a Padles Wenno Pudno a Padto—Kasano a Mapagdumayo?” (Hunio 22, 1995) Nupay inaldaw nga inadalko ti Biblia iti 42 a tawen ken inkagumaak nga ikabesa dagiti impormasion maipapan iti pagilasinan ti maudi nga al-aldaw, makunak a ti nalawag a pannakasumaria amin dagiti teksto nga impaayyo itoy a tema ti talaga a nakatulong kaniak. Daytoy a tema pinagbalinyo a nalaka a tandaanan. Daytat’ nagsayaat a naespirituan a taraon!
M. B., Estados Unidos
Panagtakaw Agtawenak iti 13, ket problemak ti panagtakawko. Agtakawak iti kuarta, wenno mapanak iti tiendaan ket agtakawak iti bubble gum. Kayatkon nga isardeng, ngem awan ti nakatulong agingga a naawatko ti Hunio 22, 1995, nga Agriingkayo! ket linukibko ti artikulo ti “Agimtuod Dagiti Agtutubo . . . Panagtakaw—Apay a Saan?” Talaga nga inapektarannak dayta. Daytat’ timmulong kaniak nga agkararag ken ni Jehova ket ammok a siwawadwad a mapakawannak. Kayatko ti addanto iti Pagarian ti Dios, ket ammok nga awanto sadiay dagiti mannanakaw a tattao. Pagyamanan iti panangipablaakyo itoy nga artikulo.
J. A., Canada
Agtawenak iti 23 ket nakabaludak gapu iti panagtakaw. Nangrugi amin dayta iti panangduróg dagiti kapatadak. Kayatda nga adda mamaysaák, ket kimmaron ti kasasaad sipud idi. Agpayso unay ti artikulo. Manginanamaak nga ipangagto dagiti agtutubo ti balakad sakbay a naladawto unayen. Iti kasta, maliklikanda ti nagtungpalak—ti pagbaludan.
M. S., Estados Unidos
Pakasaritaan ti Biag Kabasbasak ti artikulo a “No Kasano a Nagunggonaanak iti Panangtaripato ti Dios.” (Hunio 22, 1995) Ti pannakabasak no kasano ti pannakamaltrato ni Celeste Jones babaen kadagiti miembro ti pamilia—ket kaskasdi a nataginayonna ti pammatina ken nakapagibtur—ti nangikariak iti bagik nga ikagumaak ti saanton nga agreklamo maipapan kadagiti problemak iti salun-atko.
J. P., Estados Unidos
Kas tao a medio saan unay a baldado a kas ken ni Celeste Jones, adda bassit turedko a kas iti turedna nga agtalinaed a matalek. Pagyamanan unay kadagidiay siuulimek a timmulong ken ni Celeste ken nangted kenkuana iti panangtaripato a kasapulan iti ministeriona.
W. R., Canada
Naabbukay ti riknak iti artikulo. Pinabilegna ti pammatik ken tinulongannak a mangamiris a ti kasayaatan a pamay-an a matulongantay dagiti kaarrubatayo isut’ panangasaba kadakuada iti amin a posible a pamay-an.
P. H. P., Nigeria
Natignay ken naparegtaak unay iti kapadasan ni Celeste. Bumakbaketakon ken mapadpadasakon amin a sakit ken ut-ot a kakuykuyog ti panagbaket, ngem ti kapadasanna ti nangted kaniak iti bileg nga agandur.
M. R., Jamaica