Manipud Managbasatayo
PMS Masapul nga iyebkasko ti naimpusuan a panagyamanko kadakayo iti panangipablaakyo iti artikulo a “Premenstrual Syndrome—Sarsarita Wenno Pudno?” (Agosto 8, 1995) Inkararagkon ti kasta nga artikulo, ta diak maawatan idi no apay nga addaanak kadagiti makapaleddaang a rikna iti kada bulan. Iti panangbasbasak iti artikulo, nabang-aranak unay; maamirisko itan a saan a maigapu iti naespirituan a kinakapuy ti parikutko.
Y. E., Jamaica
Nabayagen nga agsagsagabaak iti PMS, ngem kanayon a diak ikankano dayta ta ammok a maanusak pay met laeng. Daytoy nga artikulo ti timmulong kaniak a mangamiris nga agpayso a parikut ti PMS, banag a maikari a pagsasaritaan.
Y. M., England
Iti agarup 12 a tawen, ti PMS-ko ti agpayso a nangpataud iti leddaang iti anakko ken ni lakayko. Naan-anay nga inlawlawag daytoy nga artikulo ti marikriknak a sintomas! Ti nangnangruna a nangparagsak kaniak isut’ reaksion ni lakayko a saan a Saksi, a masansan nga umsienna ti Agriingkayo! Nangipakita iti dakkel nga interes iti artikulo ket kinunana, ‘Maragsakanak ta adda kadatayo daytoy nga artikulo.’
K. O., Japan
Pannakikamalala Pagyamanan unay iti artikulo a “Ti Panangmatmat ti Biblia: Pannakikamalala—Pakawanen Wenno Di Pakawanen?” (Agosto 8, 1995) Kalpasan ti adu a tawen a dakes a pannakatrato, nakagun-odak iti Nainkasuratan a diborsio manipud ken lakayko. Kaskasdi, dadduma a tattao ti nangiparikna a basolko ti panangaramidko iti kasta, ket adun a tawen a rumbeng a labanak daytoy a rikna. Impagarupko payen no inlaksidnakon ni Jehova. Nupay kasta, daytoy nga artikulo ti nangyebkas iti adu kadagiti riknak, ket pinaregtanak unay.
A. K., Czech Republic
Maskara Dagiti Africano Makailawlawag unay ti artikuloyo a “Ti Panggep iti Likudan ti Maskara” (Agosto 8, 1995). Imbagayo sadiay a di koma maaddaan dagiti pudno a Kristiano kadagita a maskara. Ngem kasano ngayen dagiti maskara a napataud kas rekuerdo laeng wenno saanda pulos a nausar agpaay kadagiti narelihiosuan a panggep?
J. A., Estados Unidos
Espesipiko nga insalaysay ti artikulomi dagiti maskara a naaramid agpaay kadagiti narelihiosuan a panggep. Bigbigenmi nga “adda dakkel a naggidiatan dagiti maskara a maus-usar iti panagdayaw ken dagiti replika a naukit agpaay iti pangturista nga industria.” Kadagiti lugar idiay Laud, mabalin a pulos nga awanan iti narelihiosuan a kaipapanan dagita a maskara a napataud gapu iti komersio no di ket mabalin a kaaduanna, mamatmatan kas arte a pangdekorasion. Rumbeng ngarud a mangaramid ti tunggal indibidual a Kristiano iti personal a pangngeddeng no i-display-da dagita a maskara, bayat a laglagipenda ti epekto ti panangaramid iti kasta iti konsiensia ti sabsabali. (1 Corinto 10:29)—ED.
Rhinoceros Kayatko nga iyebkas ti panagyaman ken panangpadayawko iti abilidadyo a pagbalinen a nakaay-ayat ti simple nga impormasion—uray iti kas kaniak a pulos a saan a nairuam a mangayat iti panagbasa. Kabasbasak “Ti Ayup nga Addaan Matartarigagayan a Sara.” (Agosto 8, 1995) Masansan a rugiak a basaen dagiti artikulo a kas iti daytoy agsipud ta masapul nga aramidek dayta. Idi agangay, nupay kasta, kanayon a masdaawak a makaparagsakda gayam a basaen!
J. M., Estados Unidos
Pakasaritaan ni Celeste Jones Sangapulo ket pito a tawenen a basbasaek dagiti magasinyo. Kalpasan ti panangbasak iti kapadasan ni Celeste Jones iti artikulo a “No Kasano a Nagunggonaanak iti Panangtaripato ti Dios” (Hunio 22, 1995), masapul nga agsuratak ket iyebkasko ti panangapresiarko.
M. M., Colombia
Pimmusay ni Celeste Jones idi Oktubre 27, 1995. Sakbay a natay, nakaawat iti adu a surat manipud kadagiti managbasa iti intero a lubong nga agyamyamanda kenkuana iti panangiranudna iti kapadasanna.—ED.