Iturongyo ti Biagyo Itan!
TI SIENTIPIKO a panagsirarak iti kababalin ken pakatignayan ti tao ginunggonaannatayo iti adu a wagas. Nalabit natulongantayo a mangsaranget iti sakit babaen iti ad-adda a nauneg a pannakaawat iti dayta. Maigiddan iti dayta, nainsiriban ti agannad no maipapan kadagiti makagargari a teoria, nangnangruna dagidiay kasla mangkontra kadagiti naipasdeken a naimbag a prinsipio.
Maipapan iti tema a genetics ken kababalin, tumaud ti salsaludsod: Mabalin kadi a baybay-antayo dagiti rebbengentayo ken di awaten nga adda basoltayo gapu kadagiti tignaytayo? Mabalin kadi nga aglisitayo wenno pabasolentay pay ti maysa a tao wenno maysa a banag gapu iti aniaman a di umiso a pangngeddeng wenno biddut, ket iti kasta makikadua kadagiti umad-adu a bilang iti daytoy kaputotan ti “saan a siak”? Saan la ketdi. Situtulok ti kaaduan a tattao a mangbigbig ken mangawat iti dayaw iti aniaman a balligi iti biag, gapuna apay a saan a kasta met a situtulok nga awatenda ti sungsungbatanda kadagiti biddutda?
Gapuna, mabalin nga imtuodentayo, Ania ti ibaga ti Sao ti Dios, ti Nasantuan a Biblia, maipapan iti no asino wenno ania ti mangiturturong iti biagtayo ita?
Ania ti Panangmatmat ti Biblia?
Ti umuna a banag a masapul a bigbigentayo ket amintayo naipasngay iti basol a natawid kadagiti immuna a nagannaktayo, da Adan ken Eva. (Salmo 51:5) Mainayon pay, agbibiagtayo iti naisangsangayan a tiempo, a naawagan “ti maudi nga al-aldaw,” a mapadasan dagiti tattao ti “napeggad a tiempo a narigat a pakilangenan.” (2 Timoteo 3:1) Daytoy ipamatmatna nga, iti gagangay a panagsao, mapasanguantayo iti ad-adu a parikut iti panangiturong iti biagtayo ngem kadagiti ammatayo idi.
Nupay kasta, amin a tattao siwayawayada nga agpili, a makaaramid kadagiti bukodda a personal a pili. Gapu iti dayta maiturongda ti biagda. Kasta nanipud idi immuna a tiempo, ken makita iti sasao ni Josue iti nasion ti Israel: “Agpilikayo ita nga aldaw no siasino ti pagserbianyonto.”—Josue 24:15.
Bigbigen ti Biblia a naitapuaken ni Satanas a Diablo manipud langit ket ita, nangnangruna ngem idi, nakarkaro ti panangikagumaanna a mangimpluensia iti intero a puli ti sangatauan iti dakes. Ibagana met kadatayo nga uray idi kaaldawan ni apostol Juan, ti intero a lubong adda iti pannakabalin daydiay nadangkes. (1 Juan 5:19; Apocalipsis 12:9, 12) Nupay kasta, no kasano a ti Mannakabalin-amin a Dios saanna a kontrolen ti tunggal tignaytayo wenno ikeddeng ti pagtungpalantayo nga isu laengen ti makaammo, saantay koma nga ipabasol a direkta ken ni Satanas ti tunggal bidduttayo wenno nakapaayantayo. Ti natimbeng a Nainkasuratan a kinapudno isu ti “tunggal maysa masuot babaen ti pananggargari ken panangsulbog ti bukodna a derrep. Kalpasanna ti derrep, inton naiyinawen, agipasngay iti basol.” (Santiago 1:14, 15) Insurat ni apostol Pablo dagitoy a napaltiingan a sasao: “Dikay paiyaw-awan: Ti Dios saan a maysa a marabrabak. Ta aniaman nga imulmula ti maysa a tao, daytoyto met ti apitenna.”—Galacia 6:7.
Isu a ni Jehova a Dios pagsungbatennatayo a sinaggaysa kadagiti tignaytayo. Masapul a naannadtayo a ditay ilisi ti bagitayo gapu iti pakabuklan dagiti gene-tayo ken dagiti natawidtayo a kinaimperpekto. Pinagsungbat ti Dios ti naranggas, homoseksual a komunidad ti kadaanan a Sodoma ken Gomorra kadagiti dakes nga ar-aramidda. Nalawag a dina imbilang dagiti umili kas nakakaasi, daksanggasat a parparsua a gapu iti naipagarup a pagkapuyan dagiti gene, dida malapdan ti panagbalin a dakes. Kasta met laeng, dagiti tattao a nagbiag idi kaaldawan ni Noe addaanda kadagiti adu a dakes nga impluensia iti aglawlawda; nupay kasta, masapul nga agpilida, maysa a personal a pangngeddeng, tapno makalasatda iti Layus a mabiiten a mapasamak. Sumagmamano ti nangaramid iti umiso a panagpili. Kaaduan ti saan.
Patalgedan ti Hebreo a propeta a ni Ezequiel a masapul ti personal a panangkontrol tapno maikaritayo iti anamong ti Dios: “Ngem no sika pakdaaram ti managdakdakes, ket isu dinto agbalbaliw iti kinadakesna, wenno iti dakes a dalanna, isu matayto iti kinadangkesna, ngem sika maispalmo ti kararuam.”—Ezequiel 3:19.
Ti Kasayaatan a Tulong a Magun-odan
Siempre, datay amin kasapulantayo ti tulong tapno maaramidtayo ti personal a panangkontrol iti inaldaw a panagbiagtayo, ket para iti adu kadatayo, talaga a karit daytoy. Ngem saantay a maupay. Nupay no dagiti natawidtayo a managbasol a pagannayasan saan a maawat iti Dios, no kayattayo a balbaliwan ti kababalintayo, mangipaayto kadatayo iti kasayaatan a tulong a magun-odan—ti nasantuan nga espirituna ken ti naipaltiing a kinapudno. Nupay mabalin nga adda aniaman a naisigud a kababalintayo gapu iti gene ken aniaman nga impluensia iti ruar a mangapektar kadatayo, mabalintay nga ‘uksoben ti daan a personalidad agraman dagiti aramidna, ket kawesan[tay ti bagbagitayo] iti baro a personalidad, a babaen ti umiso a pannakaammo mapabpabaro maitunos iti ladawan Daydiay namarsua iti dayta.’—Colosas 3:9, 10.
Adu a Kristiano iti kongregasion ti Corinto ti nangaramid kadagiti nakadidillaw a panagbalbaliw iti kababalinda. Ibaga ti naipaltiing a rekord kadatayo: “Uray dagiti mannakiabig, wenno dagiti managrukbab iti didiosen, wenno dagiti mannakikamalala, wenno dagiti lallaki a maipaay kadagiti di nainkasigudan a panggep, wenno dagiti lallaki a makikaidda kadagiti lallaki, wenno dagiti mannanakaw, wenno dagiti naagum a tattao, wenno dagiti managbarbartek, wenno dagiti manangrabngis, wenno dagiti manangkikil didanto tawiden ti pagarian ti Dios. Ket kaskasdi a kasta idi ti sumagmamano kadakayo. Ngem naugasankayon a nadalus, ngem nasantipikarkayon, ngem naideklarakayon a nalinteg iti nagan ni Apotayo a Jesu-Kristo ken babaen iti espiritu ti Diostayo.”—1 Corinto 6:9-11.
Isu a no makidangdangadangtayo kadagiti kinaimperpektotayo, ditay koma sumuko kadakuada. Adu a moderno-aldaw a Kristiano ti nangpanekneken iti dayta babaen iti tulong ni Jehova, nabaelanda ti ‘nagbalbaliw babaen ti panangpabaroda iti panunotda, tapno mapaneknekanda iti bagbagida ti naimbag ken makaay-ayo ken perpekto a pagayatan ti Dios.’ Tartaraonanda ti isipda iti aniaman kadagiti bambanag a napudno, nalinteg, nadalus, maay-ayat, naimbag a kababalin, ken nadayaw; ken ‘itultuloy[da] nga imutektekan dagitoy a bambanag.’ Mangmanganda kadagiti natangken a naespirituan a taraon ket babaen iti panangusarda iti dayta sanayenda ti pannakabalin ti pannakaawatda a mangilasin agpadpada iti umiso ken di umiso.—Roma 12:2; Filipos 4:8; Hebreo 5:14.
Makapabileg-puso a maammuan dagiti panangikagumaanda, dagiti temporario a pannakapaayda, ken ti panagballigida kamaudiananna babaen ti tulong ti nasantuan nga espiritu ti Dios. Ipanamnama ti Dios kadatayo a ti panangbalbaliw iti kababalintayo masansan a ramanenna ti puso ken ti tarigagayna: “Ta ti sirib sumrekto dita pusom, ket ti pannakaammo makaay-ayonto ita kararuam, ti kinaannad salluadannakanto; ti pannakaawat igaganakanto; tapno ilisidaka iti dalan ti dakes.”—Proverbio 2:10-12.
Ngarud, no kayatyo nga aramiden a kalatyo ti biag nga agnanayon—ti biag nga awanan kadagiti pakariribukan iti dakes a lubong ken awanan kadagiti mangpakapuy a kinaimperpekto—‘ikagumaanyo’ a kontrolen ti biagyo itan ken paidalan iti nailangitan a sirib. (Lucas 13:24) Gundawayanyo ti tulong ti nasantuan nga espiritu ni Jehova tapno mapataudyo ti bunga a panagteppel. Pagbalinenyo a tarigagay ti pusoyo ti mangitunos iti biagyo kadagiti linteg ti Dios, ken ipangag ti balakad a: “Kangrunaan iti amin a masaluadan, saluadam ti pusom, ta kenkuana ti gubuayan ti biag.” (Proverbio 4:23, NW) Ti panangsalimetmet iti “pudpudno a biag” iti baro a lubong ti Dios—a sadiay korehirento ni Jehova a Dios dagiti amin a pagkurangan dagiti gene a maibatay iti pammati ti daton a subbot ni Jesu-Kristo—gunggonaanna ti amin a panangikagumaanyo a mangkontrol iti biagyo iti daytoy a lubong!—1 Timoteo 6:19; Juan 3:16.
[Ladawan iti panid 9]
Ti panagadal iti Biblia makaipaay ti bileg kadatayo a mangparmek kadagiti nakairuamantay unay a pagkapuyan
[Ladawan iti panid 9]
Makatulong kadatayo ti panagadal iti Biblia a mangsalimetmet kadagiti moral a pagalagadan ti Dios