Dagiti Matmatay a Baknad ti Korales—Sungsungbatan Kadi ti Tattao?
IMPADAMAG ti 1992 International Symposium on Coral Reefs a direkta wenno saan a direkta a tao ti makinggapuanan iti ipapatay ti 5 agingga iti 10 a porsiento dagiti nabiag a baknad ti lubong sa sabali pay nga 60 a porsiento ti mabalin a mapukaw iti sumaganad a 20 agingga iti 40 a tawen. Sigun ken ni Clive Wilkinson ti Australian Institute of Marine Science, dagiti laeng baknad iti adayo a luglugar ti medio nalungpo. Kinuna ti periodiko nga USA Today a dagiti lugar nga addaan nadadael a “baknad iramanna ti Japan, Taiwan, Pilipinas, Indonesia, Singapore, Sri Lanka, ken India iti Asia; Kenya, Tanzania, Mozambique, ken Madagascar iti Africa; ken ti Dominican Republic, Haiti, Cuba, Jamaica, Trinidad ken Tobago, ken Florida kadagiti America. Nadumaduma dagiti makagapu iti pannakadadael, ngem ti adu unay nga agindeg kadagiti kosta, ken ti nakaro a pannakabalbaliw dagiti kosta dagiti makagapu a sungsungbatan ti amin.”
Kadawyan nga agbiag dagiti baknad ti korales iti danum ti baybay kadagiti temperatura a nagbaetan ti 25 ken 29 degrees Celsius, agpannuray iti lugarda. Ngem bassit laeng ti nagdumaan ti makapapatay a temperatura ken ti temperatura ti nalungpo a korales. Mabalin a makapapatay ti maysa wenno dua a degrees a ngatuen ti kadawyan a kangatuan a bara ti kalgaw. Nupay mailasin ti nadumaduma a makagapu para iti ipupuraw ti korales ken ti ipapatayna inton agangay, atapen ti adu a sientista a mabalin a ti panagbara ti daga ti padapada a makagapu iti sangalubongan. Impadamag ti magasin a Scientific American daytoy a konklusion: “Maibagay dagiti report idi 1987 maipapan iti ipupuraw dagiti korales iti kumarkaro a pannakaseknan maipapan iti panagbara ti daga. Saan ngarud a pakasdaawan, a nagtengan ti sumagmamano a sientista ken dadduma a managpaliiw ti konklusion nga agserbi dagiti baknad ti korales kas ti kanario iti pagminasan iti karbon—ti damo a mangipamatmat iti ingangato ti temperatura iti taaw ti daga. Nupay agparang a ti bumarbara a temperatura ti lokal a danum iti baybay ti makagapu iti ipupuraw, ti pananginaig itoy nga epekto iti panagbara ti daga saan nga isu ti maudin a pakaigapuanna ita a tiempo.”
Kinuna ti U.S.News & World Report: “Patalgedan dagiti nabiit pay a panagadal idiay Caribbean ti pagarup a dagiti taaw a saan a normal ti kinabarada ti nakaigapuan ti ipupuraw dagiti korales.” Maup-upay nga inladawan ni Thomas J. Goreau, a mangidadaulo iti Global Coral Reef Alliance, ti kasasaad dagiti baknad iti pannakapugipog dagiti napuskol a kabakiran iti Amazon. “Addanto pay laeng sumagmamano a napupuskol a kabakiran a mabati iti limapulo a tawen,” kinunana, “ngem iti kapartak ti ipapatay ita dagiti baknad ti korales, awandanton iti kasta a kabayag.”
Sangalubongan a Pannakadadael—Adu ti Makagapu
Iti igid ti Kosta ti Pacifico ti Makintengnga nga America, natay ti agingga iti 95 a porsiento kadagiti korales idi 1983. Rimsua dagiti umasping ngem saan unay a makadadael nga ipupuraw iti isu met la a tiempo iti makintengnga ken makinlaud a Pacifico. Ti nakaro nga ipupuraw ti nangapektar iti Great Barrier Reef ti Australia ken dagiti lugar iti Pacifico ken dagiti taaw ti India. Impadamag met ti Thailand, Indonesia, ken ti Galápagos Islands ti pannakadadael. Kalpasanna, napasamak ti nasaknap nga ipupuraw iti asideg ti Bahamas, Colombia, Jamaica ken Puerto Rico, agraman makin-abagatan a Texas ken Florida, E.U.A.
Rumrumsua ti sangalubongan a padron ti pannakadadael dagiti baknad. Kinuna ti Natural History: “Iti relatibo nga ababa a tiempo a pannakaadal dagiti ecosystem ti baknad, awan a pulos ti nakita nga ipupuraw iti nabiit pay a kasasaad. Ineksamen ni Peter Glynn, biologo idiay University of Miami, ti 400-tawenna a korales iti nakarot’ ipupurawna a makindaya a Pacifico ket awan nasarakanna a pammaneknek dagiti umasping a didigra iti napalabas. Ipamatmat ti nakaro nga ipupuraw a ti pangkaaduan nga ibabara kabayatan ti dekada 1980 ti mabalin nga addaan makapadakes nga epekto kadagiti baknad ti korales ken mabalin a mangipakauna iti masakbayan dagiti baknad no ti panagbara ti daga ti mangituggod iti nabarbara pay a temperatura. Nakalkaldaang ta ti panagbara ti daga ken pannakadadael ti aglawlaw ti gistay addanto latta ken ad-addanto a kumaro, a kumaronto ti kasansan ti sangalubongan a siklo ti ipupuraw.”
Impaganetget ti U.S.News & World Report no ania ti sabalinto pay a makagapu: “Ti iyiingpis ti ozone layer, a mangsalinong kadagiti sibibiag a parsua manipud kadagiti makadadael a silnag nga ultraviolet, ti mabalin a manungsungbat met iti nabiit pay nga ipapatay dagiti baknad.”
Kadagiti lugar iti kosta, a pagindegan ti nasurok a kagudua iti populasion ti lubong, ti kinairesponsable ti tao ti nangdangran kadagiti baknad ti korales. Natakuatan ti maysa a panagadal manipud iti World Conservation Union ken ti United Nations Environment Programme a dinangran wenno dinadael ti tattao dagiti adu a baknad iti 93 a pagilian. Adu a rumangrang-ay a lugar ti mangyanud a direkta kadagiti saan a nadis-impekta a rugitda iti taaw, a pakamulitanna.
Mapukpukan tapno mapagbalin a tabla ken pagsungrod dagiti bakawan, nga agbiag iti apgad ken mangsagat kadagiti rugit. Maakas ken maala dagiti baknad tapno mausar kas materiales a pagbangon. Idiay Sri Lanka ken India, dagiti intero a seksion ti baknad ti nabegbeg tapno agbalin a semento. Dagiti dadakkel ken babassit a barko ti mangitinnag iti sinipete kadagiti baknad wenno balegbegenda ida nga isut’ mangmekmek kadakuada.
Inladawan ti magasin a National Geographic ti napasamak idiay John Pennekamp Coral Reef State Park sadi Florida: “Dagiti barkoda ti mangmulit iti danum ken amin nga adda dita babaen kadagiti produkto ti petroleo ken rugit. Dagiti baknad ti buraken dagiti di nalaing nga opereytor. Rugitanda ti baybay kadagiti tasa a plastik a foam, aluminum a lata, sarming, bag a plastik, botelia, ken kinilkilometro a nagpipinnulipol a kitang. Saan a mayanud dagitoy tedda—gistay di madadael.”
[Picture Credit Line iti panid 16]
Impaay ti Australian International Public Relations
[Picture Credit Line iti panid 17]
Impaay ti Bahamas Ministry of Tourism