Komunidad a Nakakadang
Babaen ti koresponsal ti Agriingkayo! idiay Benin
“MAYSA ti Ganvié kadagiti kangrunaan a pakaallukoyan dagiti turista idiay Benin,” kuna ti maysa a giya iti panagpasiar idiay Laud nga Africa. Kuna ti sabali pay: “Kinayawan ti Ganvié dagiti Africano a mismo; makitam dagiti Africano a turista a kas ti kaadu dagiti taga laud.”
Talaga a naisangsangayan ti Ganvié. Daytat’ purok ti 15,000 nga agindeg a nabangon kadagiti kadangkadang iti ngatuen ti dandanum ti Lake Nokoué, amianan ti Cotonou, Benin. Awan bisikleta, kotse, pagnaan iti igid ti kalsada, wenno kalsada idiay Ganvié. No kayat dagiti agindeg ti mapan iti eskuelaan, tiendaan, klinika ti salun-at, balay ti kaarruba, wenno sadinoman pay, agluganda iti bilog a naaramid manipud iti kayo nga iroko.
Kaaduan a pamilia ti addaan sumagmamano a bilog—maysa para ken ni Tatang, maysa para ken ni Nanang, ken no dadduma maysa para kadagiti annak. Nasapa a masursuruan dagiti annak nga aggaud. No agtawenen iti lima, kabaelanen ti maysa nga ubing nga iturong ti bilog a bukbukodna. Di agbayag, natalged unayen nga agtakder iti bilog tapno isaruag ti bassit nga iket a pagdaklis. Pagay-ayat ti dadduma nga ubbing ti agpabuya kadagiti sangaili babaen ti panagbalinsuekda kadagiti bilogda.
Iti tumtumpaw a tiendaan ti Ganvié, dagiti negosiante, a kaaduanna babbai, ti agtugaw kadagiti bilogda agraman dagiti tagilakoda a nagtutuon iti sanguananda—rekrekado, prutas, lames, agas, pagsungrod, serbesa, ken uray pay radio. Babaen kadagiti dadakkel a kallugong a naaramid iti garami a mangsalinong kadakuada iti init ti tropiko, lakuanda ti dadduma a manggaud iti bilogda sadiay tapno gumatang. No dadduma babbalasitang dagiti aglako. Dikay maallilaw iti edadda! Nasapada a nakasursuro iti nasaririt nga arte ti panagtinnawar iti panaglako.
Bayat a dagiti babbai ti aggatang ken aglako idiay tiendaan, dagiti lallaki met ti para-kalap, wenno tapno naek-eksakto, para-taraken iti lames. Ti panagkalapda iramanna ti panangitugkel iti ginasut a sanga iti napitak a lansad ti dan-aw, a mangpataud iti napuskol a kabakiran ti sangsanga. Agaaripuno dagiti lames tapno kanenda dagiti marunrunoten a sanga. Kalpasan ti sumagmamano nga aldaw, agsublin dagiti lallaki nga ikuyogda dagiti iketda tapno agkalap.
Nagbalin a Pakaallukoyan Dagiti Turista ti Dati a Paglemlemmengan
Saan a kanayon idi nga “Umili iti Danum” dagiti Toffinu iti Ganvié, kas iti pakabigbiganda itan. Idi kattapog ti maika-18 a siglo, nagkamangda kadagiti dan-aw ken aluguog tapno malibasanda ti panangidadanes ti kabangibang a pagarian dagiti Africano. Kuna dagiti iskolar nga iyanninaw ti nagan a Ganvié daytoy a historia, tangay iti pagsasao a Toffin, ti sao a gan mabalin a maipatarus kas “naisalakankami” ket “komunidad” ti kaipapanan ti sao a vie. Isu a ti nagan daytoy a kabesera dagiti ili iti dan-aw ti mabalbalin metten a maipatarus a “ti komunidad ti umili a nakasarak met laengen iti talna.”
Epektibo idi nga estratehia ti panangsapul iti paglibasan kadagiti naaluguog a rehion iti aglikmut ti Lake Nokoué, tangay dagiti narelihiosuan a patpatien dagiti agbimbinnusor idi a pagarian ti saan a nangipalubos iti asinoman a soldado a makigasanggasat iti danum wenno kadagiti lugar a lalayusen. Isu a nangipaay ti dan-aw iti pagbiagan ken pagkamangan manipud iti kabusor. Kasla di maipagpagarup a daytoy a nalataken a komunidad, a sarsarungkaranen ti nagadu a turista babaen kadagiti de-motor a bilog, ti maysa idi a lugar a paglemlemmengan.