Panang-retrato​—No Kasano nga Aramiden a Siuumiso

Manmano a banag ti ad-adda a maipatpateg ngem kadagiti retrato dagiti ing-ingungoten a gagayyem ken miembro ti pamilia. Ngamin, saan laeng a basta retrato ti maysa a de-kalidad a ladawan; daytat’ ladawan a nairanta a mangala iti mismo a personalidad ti maysa a tao!

Ti parikut isut’ kinangina dagiti propesional a ladawan​—saan a kabaelan ti dadduma kadatayo. Ket no padasem a retratuen ti bagim, matakuatamto inton agangay nga ad-adu nga amang ti nairaman iti basta panangipokus ken panangretrato. Ti makagapu ket ti nasayaat a ladawan iramanna saan laeng a ti maretrato no di pay ket ti lawag, ti aglawlaw, ti lugar, ti posision, ti ekspresion ti rupa, ken ti kolor.

Nupay kasta, no adda kameram ken situtulokka nga agsursuro iti sumagmamano a kangrunaan a pamay-an, makaay-ayo dagiti maretratom. Kasano? Tapno masungbatan, mangyimtuodtayo iti sumagmamano a saludsod iti maysa a propesional a retratista a nasurok a sangapulo a tawenen ti kapadasanna iti daytoy a tay-ak.

• Umuna iti amin, ania ti sekreto ti panangpaisem iti maysa a tao iti kamera? Siguraduem a mayat ti rikrikna ti retratuem nga agparetrato! Panunotem, kas pagarigan, a kayatmo a retratuen ti maysa a balasitang. No nabannog ken mabisin, saanto unay a napintas ti pannakaretratona. Malaksid pay, mangpataudto iti tension iti rupa ken matmatana ti pannakabannog, a makadadael iti retrato. Isu a paregtaem a rumidep pay laeng sa agmeriendanto bassit sakbay a mangrugi ti panagretrato.

Makatulong met no kasaritam ti tao. Agbalinka nga optimistiko ken naragsak. Pagrelaksem babaen ti pannakipatang, ngem dika ikagumaan a pagpaggaaken. Daytoy ti mangpasingkit iti matmata ken mamaglabbaga iti rupa. Padasem a retratuen ti nadumaduma nga ekspresion ti rupa. No ad-adut’ maretratom, nasaysayaat ti gundawaymo a maretrato ti kasayaatan a pakabigbigan dayta a tao.

• Ti ngay panagkawkawes ken panagay-ayus? No inggrupo ti agparetrato, matarigagayan ti panagbabagay dagiti kolor. No, kas pagarigan, retratuem ti maysa a pamilia, isingasingmo nga agkawesda iti agkakabagay a kolor. Wenno nalabit, pagkawesem ida iti agpapareho a kolor. Ngem laglagipem a nasaysayaat ti itsura ti tattao a nalukmeg kadagiti natayengteng a kolor, ken nakusnaw a kolor kadagiti nakuttong a tattao.

Masapul met nga ikkam iti atension dagiti detalye: Diretso kadi ti panagplastar ti kawes, a manmano laeng ti kunesna? Diretso met laeng kadi ti plastar ti kurbata? Naurnos met laeng kadi ti buok? Mabalin a saan a makita ti matam ti nakuso a buok, ngem makitanto ti kamera! No babai ti retratuem, mayat met laeng kadi ti pannakameyk-apna?

• Dagiti ngay nakaanteohos a tattao? Gapu iti repleksion, mabalin a problema daytoy. Umuna, kitaem ti viewfinder-mo tapno makitam no adda aniaman a di matarigagayan a repleksion. No adda, medio pagdumogem nga in-inut ti ulo ti retratuem agingga nga umakar wenno mapukaw ti repleksion manipud iti tengnga ti mata. No dadduma, makatulong no medio agdumog ti retratuem​—ngem agannadka a di agparang a doble ti timidna!

• Napateg kadi no ania ti agparang iti aglawlaw? La ketdi! Ti okupado nga aglawlaw a pakakitaan kadagiti kable ti koriente, kalsada, wenno lugan ti mangdadaelto laeng iti retrato. Isu a kitaem ti aglawlaw a mabalin a mangpasayaat wenno mangpapintas iti retratuem, kas iti maysa a kayo, sinabsabongan a mulmula, kayo nga inaladan, wenno uray pay ti sikigan ti maysa a daan a kamarin.

• Kasano ngay no agretratoka iti uneg ti balay wenno pasdek? Mabalin a patugawem ti retratuem iti silia wenno sofa iti sanguanan ti napusyaw ti kolorna a diding wenno masetas. Partikular a makapainteres a retratuen ti tao a madama nga agtartrabaho wenno mangar-aramid iti apisionna, a ti pagtrabahuan a lamisaan, silia, wenno pagdait a material ti adda iti aglawlawna.​—Kitaem ti retrato 1.

• Kasano ngay no dika makasarak iti napintas nga aglawlaw? Pakusnawem ti aglawlaw. Nasaysayaat daytoy no agretratoka iti ruar a mabalinmo nga ikabil ti retratuem iti medio pangadaywen manipud iti aglawlaw. Maaramidmo daytoy babaen ti panangibagaymo iti f-stop, wenno ti kadakkel ti lens aperture. Ti nababbaba a numero ti f-stop, kas iti f5.6, ti mamaglitnawto iti retratuem ngem mangpakusnaw iti aglawlaw.​—Kitaem ti retrato 1.

• Adda kadi aniaman a singasing para iti komposision? Umuna iti amin, makatulong no iparabawmo ti kameram iti maysa a tripod; kalpasanna ad-addan a maipamaysam ti komposision. Kaaduanna, dagiti retrato ket intero, tallo-kakapat (manipud siket nga agpangato), wenno asideg a pannakaala (ulo ken abaga wenno ti laeng ulo). (Kitaem ti retrato 2.) Nasayaat a pangretrato ti aniaman a lens a nagbaetan ti 105 ken 150 milimetro. No saanmo a maibagay wenno mabaliwan ti lens ti kameram, padasem ti umasideg iti retratuem wenno agatras agingga a maalam ti ladawan a kayatmo. Nasayaat met gayam no ikuadrom ti retratuem tapno mapalubosan ti dadduma nga espasio iti ngatuen ti ulo, iti aglikmut ti sikigan, ken iti babaen ti saka. Iti daytoy a pamay-an, maliklikam ti pannakaputed ti ulo, dagiti saka, wenno takiag no kayatmonto nga ipadakkel ti retrato. Ngamin, no lallalomto a padakkelen, mabalin nga ad-adu ti mapukaw iti ladawan depende iti kadakkel ti maikuadro a retrato.

Maysa a makatulong a pagannurotan isut’ maawagan a pagannurotan dagiti kakatlo. Ramanen daytoy ti panangikabil iti kakatlo a distansia ti rupa wenno matmata ti retratuem manipud iti ngato, baba, wenno sikigan ti retrato. (Kitaem ti retrato 3.) Nupay kasta, no dadduma nasayaat no ti matmata ti adda iti tengnga ti retrato.

• Ti ngay posision ti retratuem? Pasanguem ti retratuem iti kamera iti nakarelaks a posision, nakatugaw man, nakatakder, wenno nakasadag, ngem medio nakasikig. No nagtimbukel unay ti rupa, medio pagsikigem ti ulo wenno bagi ti modelo tapno malawagan ti kagudua laeng ti rupa. Ti kagudua iti anniniwan rumbeng nga isut’ kaasitgan iti kamera. Daytoy ti kasla ad-adda a mangpaatiddog iti rupa. Iti kasumbangirna, no kayatmo nga agparang ti intero a rupa, siiinayad a pagpusiposem ti tao agingga a malawagan ti intero a rupa.

Iturongmo ti partikular nga atensionmo iti im-ima. Rumbeng a kasla nakarelaksda ken rumbeng nga iti posision a natural para iti retratuem, kas iti medio panagsadag ti timid wenno maysa a pingping. No nakatakder ti tao, liklikam ti kadawyan unay a kamali a diretso unay a postura ti takiag a nakatudo dagiti ima iti baba. Nasaysayaat a nakaiggem ti im-ima iti aniaman wenno nakasadag iti natural a postura.

• Adda kadi aniaman a singasing iti panangretrato iti dua a tao? Padasem a pagtingigen ti uloda iti maysa ken maysa. Nasaysayaat no liklikam nga agpadada iti katayag. Mabalinmo a padasen nga ipuesto ida tapno ti mata ti maysa ti kabinnatog ti agong ti kaabayna.​—Kitaem ti retrato 4.

• Pagsasaritaantayo ti maipapan iti lawag. Ania nga oras iti aldaw ti kasayaatan a panagparetrato iti ruar? Mumalmalem. Kadawyanna a naparpariir, ken saan unay a makasisirap ti lawag. Padasem a pagposisionen ti gayyemmo tapno ti lawag ti init ti agraniag iti maysa a bangir ti rupa, a ti laeng trianggulo ti lawag ti agparang iti sikigan ti rupa iti anniniwan. Daytoy ti manglapped iti panagduling ti maysa a tao. No kayatmo a retratuen laeng ti sikigan, iyakarmo ti posision ti kameram iti naanniniwanan a sikigan ti rupa. Siguraduem met gayam a malinongan ti lens ti kameram iti lawag ti init.

• Kasano ngay no nakaranraniag unay ti lawag? Padasem a pagpuestuen ti gayyemmo iti posision a malikudanna ti init.

• Saan kadi a mangparnuay dayta iti anniniwan iti rupana? Wen, ngem mabalinmo nga usaren ti flash-mo tapno mapunnuan dagiti naanniniwanan a lugar. Dadduma a kamera ti mangaramid iti daytoy nga automatiko. Ti sabali a solusion isut’ panagpatulongmo iti maysa a gayyem. Mabalin nga iggamanna ti reflector wenno dadakkel a pedaso ti puraw a cardboard ken mangiturong iti nagbakkug a lawag ti init iti rupa ti retratuem.

• Ti ngay lawag iti uneg ti balay wenno pasdek? Mabalinmo nga usaren ti natural a lawag babaen ti panangipuesto iti retratuem iti abay ti tawa. Ti naingpis a kurtina ti mabalin a mangkissay iti lawag. No kasapulan, mabalinmo nga usaren ti flash fill-in wenno cardboard reflector tapno malawagan dagiti lugar ti rupa a kaslattay nangisit unay.​—Kitaem ti retrato 5.

• Kasano ngay no awan ti umdas a lawag? Kadagita a kasasaad, masapul nga usarem ti flash-mo. Padasem nga ikabil ti retratuem iti lugar a puraw ti sikigan a diding. Isikigmo ti flash tapno agbakkug ti lawag iti bangir a diding. Babaen ti lawag nga aggapu iti sikigan, ad-addanto a makontrolmo no kasano kaadu ti lawag a mangsilnag iti rupa.

Agpayso a kasapulanto ti sumagmamano a panangpadas tapno magun-odan dagiti nasayaat a resulta. Ngem simple dagiti kangrunaan a prinsipio ti panangretrato. Babaen ti naannad a panagplano ken panagatension iti detalye, kabaelam ti mangparnuay iti nasayaat a retrato, uray pay babaen kadagiti kasimplean a kamera​—maysa nga ipatpategmo ken dagiti ing-ingungotem iti adu a tawen a dumteng!