Panangparang-ay Iti Abilidadtayo Iti Ministerio​—Panangasaba Babaen ti Kamera Wenno Intercom

NO APAY A NAPATEG: Gapu ta rumangrang-ay ti teknolohia ken umad-adu ti krimen, umad-adu metten ti agus-usar iti CCTV camera ken intercom iti balayda. Mabalin nga agnerbiostayo a mangikasaba iti naimbag a damag iti saantayo a makitkita ngem makitkitanatayo. Dagiti sumaganad a palagip tulongannatayo a situtured a mangasaba babaen ti kamera wenno intercom.

NO KASANO NGA ARAMIDEN:

• Agbalin a positibo. Adu a bumalay nga addaan iti CCTV camera wenno intercom ti mayat a makisarita kadatayo

• Laglagipem a dadduma a kamera ti mangrugin nga agrekord sakbay pay a talmegam ti intercom ket mabalin a kitkitaen ken dengdenggennakan ti bumalay apaman a nakaasidegkan iti ridaw

• No sumungbat ti bumalay, agsaoka iti intercom wenno iti kamera a kasla makisarsaritaka a personal kenkuana. Agisem ken agkompaska a kas iti gagangay. Ibagam ti planom nga ibaga kenkuana no makasaritam koma iti personal. Saanka unay nga umasideg iti kamera. No saan a sumungbat ti bumalay, saanka a mangibati iti mensahe

• No nalpasen ti saritaanyo, laglagipem a mabalin a palpaliiwen wenno dengdengennakayo pay laeng ti bumalay