Ti Sinagaba ni Maggy ken ti Naiparabur Kaniak
Martes, Mayo 2, 1995, ti pannakaipasngay ti balasangko ken ti pannakatay ni baketko. Nakalkaldaang ta pulos a saan a nakita ni Maggy ti rupa ti maladagana. Segsegaak ti panangyam-ammokto ken ni Tamara ken ni nanangna inton mapagungar.
KALPASAN ti 16 a tawen ti panagasawami, ni baketko a Maggy, ket pinakaammuan ti doktorna nga adda kanser ti susona ken sumagmamano laengen a bulan nga agbiag. Lima a tawenen ti napalabas sipud idi. Naimbag ta nabalinan pay laeng ni Maggy ti agbiag a talaga a normal iti unos dagiti maudi a tawen ti biagna. Idi laengen maudi a gistay dinan maanduran ti ut-ot.
Gapu iti kinakaro ti kanserna, imbaga dagiti doktor a bassit ti gundawayna nga agsikog. Isu a madarepdepyo ti pannakakellaatmi idi a kabayatan ti kadawyan a panagpa-ultrasound a mangeksamen iti panagramaram dagiti tumor a nagkanseren, nakitada ti maladaga iti aanakanna! Babai dayta. Uppat ket kagudua a bulan a masikog ni Maggy. Napnuan rag-o iti pananginanama nga agbalin met laengen nga ina.
Inaramid amin ni Maggy ti kabaelanna tapno masigurado a maipasngay a sisasalun-at ti maladaga. Inannadanna ti kanenna, ken uray pay kabayatan ti maudi a dua a lawas ti biagna, a napalalon ti ut-ot, sa la nagtomaren kadagiti pangep-ep idi din makaitured.
Naparaburan iti Nasalun-at a Maladaga
Idi Sabado, Abril 29, napigsat’ panagkibbayo ti barukong ni Maggy ket kinunana: “Iti panagkunak, matayakon.” Addaak iti sibayna iti intero nga arinunos ti lawas. Kalpasan ti iyaawagko iti doktor iti Lunes, dagus nga impanko iti ospital idiay Montreal, Canada, a saan unay nga adayo iti balaymi idiay St. Jérôme.
Iti agarup alas 5:30 kabigatanna, adda nars a limmabas iti ruangan ti siled ni Maggy ket nadlawna a madanagan. Agparang a naatake ti pusona. Dagus a naayaban ti maysa a doktor iti kaarruba a siled. Nupay natay ni Maggy, naispal ti medikal a timpuyog ti anakmi. Naipasngay ni Tamara a dua ket kagudua a bulan ti kurang a bulanna ken 1.1 laeng a kilo ti kadagsenna.
Tangay nababa ti blood count ni Tamara, kayat nga iyalisonan dagiti doktor iti dara. Nupay kasta, naparegtada a mangusar iti sintetiko a hormone nga erythropoietin kas sandi. Kastat’ inaramidda, ket idi napaneknekan a naballigi ti pannakausar daytoy a produkto a mangpangato iti blood count-na, kinuna ti maysa a nars: “Apay a dida usaren dayta iti amin a maladaga?”
Adda dadduma pay a sakit ni Tamara a nainaig iti di nadanonan a pannakaipasngayna, ngem naagasan amin dagitoy. Kinapudnona, idi ineksamen ti maysa a neurologo a ni Dr. Watters, imbagana iti nars: “Iti panagkunak, di umiso ti maladaga nga impaeksamenmo kaniak; iti panagkitak kenkuana naan-anay a nasalun-at.”
Panangsango ken Patay ken Panangdaer Kalpasanna
Nagrigat kaniak a makita ni Maggy a matay. Nakapimpiman ti panagriknak. Nagrigat nga iyestoria ti pannakatay ni Maggy. Ngem naaramidak dayta idi immay dagiti Kristiano a kakabsatko idiay ospital. Nagin-inut a naep-ep ti saem idi kanayon nga iyestoriak dayta. No adda mabasak nga artikulo iti Pagwanawanan wenno Agriingkayo! a nangnangruna a mangapektar kaniak, ilasinko dayta iti bassit a personal a benneg iti librariak sa iruarko ken basaek no mariknak a kasapulan.
Ti sabali pay a karit isut’ panagawid iti awan matataonan a balay. Nagrigat a daeran ti kinaliday. Sumken pay laeng daytoy a rikna, nupay talaga a magunggonaanak kadagiti makapabileg a Nakristianuan a panaglalangen. Nairuamkami ngamin idi ken ni Maggy nga agkadua a mangaramid iti amin a banag, ken pagsaritaanmi ti parikutko maipapan iti kinaliday. Kayatna a mangasawaak manen. Ngem, saan a kasta ti kinasimple dagiti bambanag.
Panangandingay Dagiti Pada a Kristiano
Diak ammo no ania ngatat’ napasamak no awan ti panangandingay ti Hospital Liaison Committee (HLC) dagiti Saksi ni Jehova. Iti agsapa nga ipapatay ni Maggy, adda idiay ospital ti maysa nga aduan-ammo a Saksi a kameng ti HLC ket impaayannak iti kasapulak a tulong.
Nasdaaw dagiti kameng ti ospital iti tulong a naawatko manipud iti kongregasion Kristiano idiay St. Jérôme agraman dadduma pay a kongregasion iti dayta a lugar. Iti rabii a nayanunsio ti ipapatay ni Maggy iti Nakristianuan a gimongmi, nasurok a 20 a patpatgen a gagayyem ti nagtignay babaen ti panangitukonda iti tulong. Talaga a kasta unay ti panangandingayda.
Nagsagana dagiti gagayyem iti taraonko; napno para iti adu a bulan ti freezer iti refrigerator-ko. Ti pamiliak ken dagiti Kristiano a kakabsatko ti nakaammo payen a nangpaadda kadagiti kawes ti balasangko. Nagadu ti insagutda kaniak nga uray la awanen ti umdas a siled a pangipempenak amin kadakuada.
Ragsak Ita ken Pangnamnamaan iti Masakbayan
Ni Tamara ti tumultulong kaniak a mangiliwliwag iti pukawko. Nagun-odannan ti naan-anay a panangdungngok. Iti kada aldaw a kablaawak iti naragsak a “naimbag a bigat,” umisem, mangrugin nga “agsao,” ken agkayaw-at a maragragsakan.
Kas kabbaro nga astronomo, segseggaak ti panangsaklotkonto ken ni Tamara ken ipakitak kenkuana babaen iti teleskopiok dagiti nailangitan a pagsidsiddaawan a pinarsua ti Naindaklan a Nangaramid kadatayo, ni Jehova. Talaga a pudno a gubuayan ti liwliwa ti panangmennamennak iti agnanayon a biag iti Paraiso ditoy daga. Ket ti pannakaammo a daytoy ti masakbayan ni Tamara ti ad-adda a pakaragsakak.—Salmo 37:9-11, 29.
No lagipek dagiti napasamak iti kallabes a lima a tawen, naan-anay a mailadawanko ida kas nagsaem ken naragsak. Adut’ nasursurok iti bagik ken maipapan iti biag a mismo. Segseggaak unay ti masakbayan inton, kas iti iladawan ti Biblia nga “awanton ni patay, awanto metten ti panagleddaang wenno panagsangit wenno ut-ot.”—Apocalipsis 21:3, 4.
Kalpasanna, inton panagungar, ni Maggy ket makaangeston iti nauneg nga awan ti ut-ot. Kangrunaan iti amin, nabileg ti namnamak ken ti tarigagayko nga addaakto sadiay a mangyam-ammo ken ni Tamara ken ni Maggy, tapno makitana ti balasitang nga inaywananna idi a naimbag.—Kas insalaysay ni Lorne Wilkins.
[Ladawan iti panid 26]
Dakam ken ni baketko
[Ladawan iti panid 26]
Ti anakmi a ni Tamara