Panangmatmat iti Lubong
Anamongan Dagiti Unitarian ti Panagkallaysa Dagiti Homoseksual
Ipadamag ti Christian Century a ti Unitarian Church ti kaunaan a denominasion idiay E.U. nga opisial a manganamong iti panagkallaysa dagiti agkasekso. Nagbubutosan dagiti delegado a tumabtabuno iti tinawen a kombension ti narelihiosuan a grupo nga “iwaragawag ti kinapateg ti panagasawa ti asinoman a tattao a nagkinnarin iti maysa ken maysa.” Kuna ti narelihiosuan a magasin nga “iti sidong dagiti paglintegan ti iglesia, tunggal maysa kadagiti 1,040 a kongregasion ti iglesia ti makaikeddeng a mismo no anamonganna ti panagkallaysa dagiti bakla ken tomboy a pareha ken no aramidenna dagiti kasta a kallaysa.”
Nasakbay a Panangammo iti Sekso ti Maladaga
Sigun iti magasin a Popular Science, “posible itan nga ammuen a nasakbay ti sekso ti maladaga babaen ti panamaglalasin iti semilia ti ama, tangay ti kita ti semilia ti mangikeddeng iti sekso.” Umuna, makoloran ti semilia iti fluorescent a maris. Kalpasanna, ti laser beam ti mausar a mangammo iti X (babai) a semilia manipud iti Y (lalaki) a semilia. Basaen ti computer ti naggidiatan, ket ti maysa nga alikamen iti laboratorio a kaaduanna a ‘mausar iti panagsukimat iti dara ti mangted iti positibo nga electric charge iti X a semilia ken negatibo a charge iti Y a semilia. Mapaglasin no kuan ti semilia babaen ti panangusar kadagiti terminal ti kasungani nga electric charge tapno maatrakar ida.’ Sigun iti sientipiko a damo a nangpataud iti pamay-an agpaay iti industria dagiti ayup, ti panamaglalasin ket agarup 90 a porsiento ti kinaumisona. Kalpasanna, mausar ti napili a semilia a mangpertilisado kadagiti selula ti itlog, ket “maiserrek iti aanakan dagiti sikog ti matarigagayan a sekso.” Agingga ita, nupay kasta, maymaysa pay la a tao ti naipasngay manipud itoy a proseso.
Makadangran a Panagsao ti Ubing
Masansan a maibilang a makaay-ayo dagiti damo a panagregget ti ubbing nga agsao, ket adu a nagannak ti mangsungbat a sidudungngo iti bukodda nga inuubingan a panagsao. Daytoy, nupay kasta, ti mamagpeggad iti irarang-ay ti panagsao dagiti ubbing, kuna ti espesialista iti panagsao idiay Brazil a ni Eliane Regina Carrasco iti magasin a Veja. No uliten dagiti nagannak ti kamali a balikas ti ubing, “pabilgen[na] ti saan nga umiso a padron ti panagsao,” kuna ni Carrasco. Kunana a mabalin a daytoy ti pakaigapuan dagiti parikut iti panagsao. Kunana pay a maapektaranna met ti pannakirelasion ti ubing iti kagimongan. “Masansan nga iputputong dagita nga ubbing ti bagida, managbabain, ken saan a natalged ti panagriknada iti bagida, a liklikanda dagiti kasasaad a pakaisaranganda [iti pannakauyaw].” Ipaganetget ni Carrasco a normal para kadagiti babassit nga ubbing ti di umiso a panangibalikasda iti sasao, ket saan a kasapulan a korehiren ida a kanayon. Ngem napateg a kasarita ida iti umiso ken laglagipen a “nasariritda ken makabael nga agsursuro.”
Ikagkagumaan ti China a Kissayan ti Pannakamulit ti Danum
“Nakaro a parikut idiay China ti pannakamulit ti danum, ket naganat a pamuspusan ti panangkissay iti pannakamulit ti danum,” kuna ti maysa a pannakangiwat para iti National Environmental Protection Agency ti China. Ipadamag ti magasin a China Today a mangar-aramid ngarud ti gobierno ti China kadagiti pamuspusan a mangkissay iti pannakamulit iti danum kadagiti nakaro unay ti pannakamulitna a karayan ken dan-aw ti China. Kas pagarigan, tapno makontrol ti rugit a sumrek iti maysa kadagiti nakaro unay ti pannakamulitna a karayan ti pagilian, ti Huaihe, “sinerraan [ti gobierno] ti 999 a babassit a paktoria a pagaramidan iti papel iti tanap ti Huaihe.” Mapattapatta a 154 milion a tattao ti agnanaed iti tanap ti Huaihe, a maysa kadagiti kangrunaan a rehion a mangpatpataud iti binukel ken enerhia ti China.
Dagiti “Nasantuan” a Terorista
Iti panagregget a “mangipasdek manen iti bagina kas ti nailian nga iglesia,” ti Orthodox Church ti Romania ket “nangilungalong iti nasikap a kampania a manglais iti dadduma a denominasion,” kuna ti pagiwarnak a Compass Direct iti artikulo ni Willy Fautré. Kuna pay ni Fautré: Nangbuangay “dagiti agkakangato a lider ken lokal a papadi ti iglesia Orthodox iti Romania” iti sumagmamano a grupo a “mangbutbuteng kadagiti narelihiosuan a minoridad ken ipaidam kadakuada dagiti kangrunaan a narelihiosuan a kalintegan.” Iti panangawagna kadagiti ebanghelikal a brodkaster iti radio kas “manangumsi iti pammati dagiti inapotayo,” nagsurat ti arsobispo ti Suceava ken Rădăuţi iti presidente ti gunglo a mangtartarawidwid kadagiti maibrodkas iti radio ken telebision iti Romania, a kunkunana, “Ipakpakaasimi a pasardengenyo ida wenno limitaranyo ti panangibrodkasda, agsipud ta mangibabainda unay ken sibabatad a mangkomkomberteda iti mismo a pagiliantayo.”
Ad-adda nga Agpegpeggad Dagiti Mamalia Ngem Kadagiti Tumatayab
“Ad-adda nga agngangabit a maungaw dagiti mamalia ngem kadagiti tumatayab,” kuna ti magasin a New Scientist. Ipalgak dagitoy a natakuatan, a naibatay kadagiti bilang nga inruar ti World Conservation Union’s Red List, a nupay agngangabit a maungaw ti 11 a porsiento kadagiti kita ti tumatayab iti sangalubongan, agpegpeggad itan ti 25 a porsiento iti amin a kita ti mamalia. Dagiti primate ti grupo a kangrunaan nga agpegpeggad, nga agngangabit a maungawton ti 46 a porsiento kadagiti kakikitada. Ti sumaganad ket dagiti insectivore babaen ti 36 a porsiento, a sarunuen dagiti alingo ken antelope iti 33 a porsiento. Ti kannaway ti kangrunaan a grupo dagiti tumatayab nga agpegpeggad, nga agngangabit a maungaw ti 26 a porsiento kadagiti kakikitada. Maysa a rason iti nakarkaro nga ibabassit dagiti mamalia ket, saan a kas kadagiti tumatayab, marigatanda nga umakar iti sabali a lugar no mapukawen ti pagnaedanda.
Tumulong ti Programa a Panagbasa a Mangkissay iti Krimen
Idiay Bradford, Inglatera, dramatiko dagiti resulta ti ponponduan ti gobierno a programa a nadisenio a mangpasayaat iti abilidad dagiti ages-eskuela nga agbasa, kuna ti periodiko ti Britania a The Independent. Saan laeng a timmulong ti programa iti panagbasa a mangpasayaat iti kinasigo nga agbasa no di pay ket napadayawan dayta a tumultulong a mangkissay iti krimen! “Nakitamin ti direkta a pannakainaig ti bilang dagiti agtutubo nga agtakaw iti balbalay kadagiti bulakbol,” kuna ni John Watson, panguluen ti Better Reading Partnership. “No makabasa dagiti ubbing, ad-adda a paginteresanda ti mapaspasamak idiay eskuelaan ken saanda unay nga agbalin a bulakbol. Gapu ta awanda kadagiti kalsada, saanda a magargari nga agtakaw kadagiti balay.”
Ti Olimpiada ken Kinapanglaw
“Ti bilang dagiti medalia nga inabak ti dadduma a pagilian iti Olimpiada ken ti kantidad ti kuarta a naipuonan kadagiti pasilidad ken ragup a panangisponsor kadagiti ay-ayam ti nangpataud kadagiti saludsod maipapan iti panangipamuspusan ti lubong a pagpatinggaen ti kinapanglaw,” kuna ti ENI Bulletin, ti Switzerland. “Di kaipapanan daytoy a ditay rumbeng a selebraran ti kinaekselente wenno padayawan ti naisangsangayan a kinalaing ti kinasigo ken panagibtur ti tao,” kuna ni Greg Foot, manipud iti ahensia a World Vision ti Australia. “Ngem,” kunana pay, a “rumbeng nga iyimtuodtayo no umiso met laeng dagiti ipangpangrunatayo no mangbusbostayo iti adu unay iti pannakapasayaat ti taraon dagiti kalaingan nga atletatayo idinto ta minilion kadagiti kaarrubatayo ti awan man la umdas a taraonda tapno adda pigsada a magna.” Mapattapatta a kabayatan ti dua a lawas ti Olimpiada a naangay idiay Atlanta, 490,000 nga ubbing iti sangalubongan ti natay gapu iti bisin ken malapdan koma a saksakit.
Bumaybayag a Panagkape
Talaga nga agbiahe ti dadduma nga empleado tapno agkape no katengngaan ti agsapa. Kinapudnona, adu ti pumanawen a mamimpinsan iti pagtrabahuan. Kadagiti kapeteria a mangidasar kadagiti naimas a kape, agdardaras dagiti trabahador a rummuar iti opisina tapno mangala iti paboritoda a kape. Kas resultana, “ti tiempo ti panagkape agbalinen a tiempo ti panaglibas tapno agkape,” kuna ti The Wall Street Journal. Ngem madanagan dagiti nangyempleo maipapan iti kawatiwat ti biahe a mapan kadagiti lokal a pagkapean. Iti panagregget a sumraen ti iyaadu dagiti rummuar nga agkape, kuna ti Journal, dadduma a negosio ti mangsumsumra iti nakayugalian babaen ti panangikabildan iti bukodda a pagtemplaan iti kape.
Mangpataud-Pudot a Mula
Natakuatan ti dua a managsirarak a taga Australia nga adda nakaskasdaaw nga abilidad dagiti sabong ti lotus a mangkontrol iti bukodda a temperatura. Itay napalabas, dagiti laeng nabara ti darada nga animal ti naipagarup nga addaan itoy nga abilidad. Iti panagtrabahoda iti Adelaide Botanic Gardens, nangikabit da Dr. Roger Seymour ken Dr. Paul Schultze-Motel kadagiti sensor kadagiti aguk-ukrad a sabong ti lotus tapno irekord ti temperaturada ken dadduma a pakabigbiganda. Aniat’ natakuatanda? Uray pay no bimmaba ti temperatura ti angin iti 50 a degree, ti temperatura dagiti sabong ti lotus ti nagtalinaed iti nagbaetan ti 86 ken 95 a degree Fahrenheit. Awan pay nasarakan dagiti managsirarak a mangilawlawag itoy a pasamak. Nupay kasta, sigun iti The New York Times, kinuna ni Dr. Hanna Skubatz, maysa a biokemiko ti mula idiay University of Washington, E.U.A., a “kinapudnona, nalabit adu ti mangpatpataud iti pudot [kadagiti mula], narigat la ngamin nga ammuen.”
Bigbigen Dagiti Ebanghelikal ti Pagkurkuranganda
“Mapukpukaw ti ebanghelikal a lubong ita ti kinamatalekna iti Biblia, moral a pagalagadan ken kinaregta a mangasaba,” kuna ti “Cambridge Declaration of the Alliance of Confessing Evangelicals.” Nagtaudan daytoy nasagibar a pammabalaw? Iti ngata karibal a grupo ti iglesia? Saan, naggapu kadagiti ebanghelikal a mismo. Ti dokumento ket inruar ti nasurok a 100 a lider dagiti ebanghelikal a nagtataripnong itay nabiit idiay Cambridge, Massachusetts. Binigbig dagiti mannurat iti dokumento nga isuda ken dagiti papanguluen ti relihion rumbeng “a pagbabawyanda ti kinatulokda nga agpadominar kadagiti kadawyan a kababalin ti nalatak a kultura.” Binigbig pay ti dokumento nga “adda dakdakkel nga impluensia dagiti mangagas a pamay-an, estratehia iti panaglako, ken ti pangawis ti lubong ti paglinglingayan iti kayat ti iglesia, no kasano ti panagandarna ken no ania ti itukonna, ngem ti impluensia ti Sao ti Dios.”