Panangsuitik Gapu iti Relihion
NO MAKLAATKA ken ladingitem dagiti panangsuitik a nadakamaten, dika agmaymaysa. Ngem adda dakdakes pay a kita ti panangsuitik—maigapu iti relihion. Maysa kadagiti gagangay unay ket mainaig iti pammati a ti kararua agbiag kalpasan ti ipapatay ket dagiti sibibiag magunggonaanda dagiti natayen. Minilion a napasnek a tattao iti intero a lubong ti naiturong a mamati a babaen iti panagbayad iti dakkel a gatad ti kuarta, matulongan wenno mapatalnada dagiti natayen nga inay-ayatda.
Itatta, iti dadduma a pagilian, adda baro a pamay-an daytoy nabayagen a panangallilaw. Nabiit pay idiay Japan, kas pagarigan, dagiti lallaki ken babbai a papadi a Budista nga agkunkuna nga addaanda iti naespirituan a pannakabalin naarestoda gapu ta nasuspetsa a sinuitikda dagiti pasurot iti ginasgasut a milion a yen. Dagidiay naaresto impakaammoda ti serbisio a panangagas ken konsultasion. Dagiti napan iramanna dagiti uppat nga agtagibalay a nangibagaanda a rirriribuken ida dagiti espiritu ti natayen nga annakda. “Nakiddaw ngarud kadagiti babbai nga agbayadda iti nagupgop a 10 milion a yen [$80,000, E.U.] para kadagiti serbisio a panglaglagip,” kinuna ti Mainichi Daily News. Maysa a 64-anyos a baket ti nangyawat iti nasurok a 6.65 milion a yen (agarup $53,000). Ti babai nagkonsulta kadagiti padi maipapan iti salun-at ti anakna. “Imbagada kano iti babbai nga agsagabanto iti kinadaksanggasat malaksid no mangaramid iti naisangsangayan a serbisio a manglaglagip iti kararua dagiti inapona ken tapno mapaksiat dagiti espiritu,” kinuna ti The Daily Yomiuri.
Ti umiso a pannakaammo iti Biblia naispalna koma dagitoy a di agsussuspetsa a tattao iti pannakasuitik. Pagminarenna a matay ti kararua. (Ezequiel 18:4) Dagiti natay “dida ammo ti aniaman,” kuna ti Eclesiastes 9:5. Gapuna dagiti natay saanda a madangran dagiti sibibiag. Ket dagiti sibibiag saanda met a magunggonaan dagiti natay.
Dagiti Adu a Parupa ti Panangsuitik ti Relihion
Gapu iti bukodda a kinaagum, dadduma ti agbalin a biktima dagiti relihioso nga estapador. Idiay Australia maysa a pagassawaan nga agkunkuna nga addaanda iti naisangsangayan a pannakabalin a napakuyogan iti abilidad a mangbendision iti kuarta tapno umadu dayta ti inyawatan ti maysa a lalaki nga agngayangay nga umadu ti kuartana a $100,000. Naibaga iti lalaki nga ikahonna ti kuarta sana iyawat dayta kadakuada tapno “masantipikar.” Impan ti agassawa ti kahon iti sumaganad a kuarto tapno bendisionan dayta bayat ti panagurayna. Idi nagsublida, insublida ti kahon, a pinakdaaranda nga iti aniaman a kasasaad dina luklukatan ti kahon agingga iti tawen 2000. No ngay lukatanna? Naibaga kenkuana a “madadael ti mahika, ket mabulsek, agurot ti buokna, agkanser, ken matay iti istrok.” Kalpasan ti dua a lawas, nupay kasta, nagsuspetsa ti lalaki ket linukatanna ti kahon. Nasdaaw! Napno dayta iti rigrigis a papel. Pinabasolna ti bagina, kinuna ti periodiko a nangipadamag iti insidente, ket naiparparna met, “nangrugin a nagkalbo.”
Idiay Italia adda baro a pamay-an ti panangsuitik ti relihion: Dadduma a papadi ti inallilawen dagiti estapador nga agpammarang a debotado a Katoliko. Ginundawayan dagiti suitik ti tradision dagiti Katoliko a panagbayad iti Pamisa para iti tao a natay. Kasano nga aramidenda dayta? Ilawlawag ti Katoliko a magasin a Famiglia Cristiana nga itukon dagiti manangallilaw ti nasaksakbay a panangbayadda iti sangadosena a Pamisa babaen iti bugos a tseke a nangatngato ngem ti gatad a makiddaw para iti Pamisa. Allilawenda ti nalaka a maallilaw a padi nga itedna ti supli. Alaen dagiti suitik ti kuarta, ket ti padi alaenna ti tseke nga awan ti pondona!
Idiay Estados Unidos, masansan a nalikmut dagiti lallakay ken babbaket kadagiti relihioso a kulto nga agbirbirok kadagiti baro a miembro a mangpunno kadagiti kahonda iti donasion. “Iti intero a nasion, tungtungpalen dagiti kulto ti napateg a paglintegan a kinasigo a mangallilaw: Mapanka kadagiti addaan kuarta,” insurat ti magasin a Modern Maturity. “Kas subad, itukonda ti isuamin, manipud salun-at agingga kadagiti politikal a panagbalbaliw agingga iti pagarian ti langit.” Maysa a nalaing a mangikeddeng iti motibo dagiti tattao ti naadaw nga agkunkuna: “Dagiti lallakay ken babbaket ti pagbagasan ti kulto.”
Mabalin a nagdakkel ti gatad ti kuarta a nairaman. “Ammok ti adu a kaso a pimmanglawen dagiti tattao,” kinuna ti maysa nga abogado ti New York a nangtamingen iti adu a kaso ti kulto. “Ammok ti adu a nadumaduma a kaso dagiti tattao, nga awanan ti aniaman no di ti tsekeda iti Social Security, a nakiddaw a mangted iti innem numerona a donasion.” Kinunana pay: “Makapaupay—kadagiti indibidual a mismo ken kadagiti pamiliada.”
Gapuna agannadka! Okupado dagiti suitik. Dagiti manangallilaw nga agtartarimaan iti balay, ti panangallillaw ti telemarketing, ken ti panangsuitik gapu iti relihion ket sumagmamano laeng a pagarigan no kasano ti panagandarda. Imposible nga ibinsabinsa dagiti amin a pamay-anda, ta kanayon nga adda baro a pangallilawda. Ngem ti naiparangen ditoy awan duadua a pagalertuennaka nga agannad, ket nalabit dayta ti kasayaatan a depensam. (Kitaem ti kahon iti panid 8 a “No Kasano a Liklikan ti Masuitik.”) Maitutop unay ti pakdaar ti kadaanan a proverbio ti Biblia: “Ti nanengneng patienna ti amin a sao; ngem ti manakem a tao matmatanna a nalaing ti papananna.”—Proverbio 14:15.
[Dagiti ladawan iti panid 10]
Mamati ti minilion a tattao a babaen ti panagbayadda iti kuarta matulongan wenno mapatalnada dagiti natay nga inay-ayatda