Ilinteg ti European Court ti Maysa a Kamali

BABAEN TI KORESPONSAL TI AGRIINGKAYO! IDIAY GRECIA

INKAPILITAN ti serbisio militar idiay Grecia. Iti aniaman a tiempo, agarup 300 a Saksi ni Jehova ti maibalud gapu ta agkedkedda nga agserbi iti militar. Matmatan ida ti Amnesty International kas dagiti balud a maigapu iti konsiensiada ket masansan nga indagadagda kadagiti nagsasaruno a gobierno iti Grecia a ruk-atanda idan ken mangipaulogda iti linteg a mangipalubos kadakuada nga agtakem iti sibilian a serbisio a di mangdusa ti panggepna.

Idi 1988, naipaulog ti baro a linteg a mangapektar iti serbisio militar. Malaksid iti dadduma pay a banag, ipaannurot daytoy a “dagiti sumaganad ket di makipaset iti serbisio militar: . . . Dagiti nailista kas miembro ti serbisio militar a ministro iti relihion, monghe wenno agsansanay a monghe iti mabigbigbig a relihion, no kastat’ tarigagayanda.” Kanayon a simple ken nalaka ti di pannakipaset dagiti ministro ti relihion a Greek Orthodox Church [iti serbisio militar], nga awan ti aniaman a problema a mapasaranda wenno aniaman a kita ti panangabuso kadagiti kangrunaan a kalinteganda kas tao. Mabalin met kadi nga iyaplikar dayta iti relihion a minoria? Di nagbayag, nangipaay iti sungbat ti maysa a panangtingiting.

Naibalud a Maikontra iti Linteg

Maitunos itoy a linteg, idi arinunos ti 1989 ken kattapog ti 1990, da Dimitrios Tsirlis ken Timotheos Kouloumpas, a dinutokan ti Central a Kongregasion dagiti Kristiano a Saksi ni Jehova idiay Grecia kas ministro iti relihion, indatagda dagiti aplikasionda kadagiti mismo nga opisina a nangilista kadakuada kas miembro ti serbisio militar tapno dida makipaset iti serbisio militar. Inragpinda kadagiti aplikasionda ti sumagmamano a dokumento a mangipaneknek nga aktiboda a ministro ti relihion. Kas ninamnama, naibasura dagiti aplikasionda gapu kano ta dagiti Saksi ni Jehova ket saan a maibilang a “mabigbigbig a relihion.”

Nagreport da kabsat Tsirlis ken Kouloumpas kadagiti mismo a center a pakasansanayan dagiti agserbi ti militar ket naarestoda, a naakusarda iti isusukir iti autoridad, ken naibaludda. Kabayatanna, imbasura ti General Headquarters for National Defense dagiti apelasionda iti desision dagiti opisina a nangilista kadakuada kas miembro ti serbisio militar. Inusar dagiti autoridad iti militar ti argumento nga impakaammo kadakuada ti Mangtartarawidwid a Bagi ti Greek Orthodox Church a ti relihion dagiti Saksi ni Jehova ket saan a mabigbigbig a relihion! Sinupiat daytoy dagiti pagannurotan ti adu a sibil a korte a mangilanlanad a dagiti Saksi ni Jehova ket agpayso a mabigbigbig a relihion.

Natakkuatan ngarud dagiti korte militar a da Tsirlis ken Kouloumpas ket nakabasol iti isusukir iti autoridad ken sinentensiaanda ida iti uppat a tawen a pannakaibalud. Inyapelar ti dua a kakabsat dagitoy a desision iti Military Appeal Court, a namitlo a nangsuspender iti pannakausig ti apelasion gapu iti nadumaduma a rason. Nupay kasta, daytat’ nagkedked kada maibilin ti temporario a pannakaruk-at dagiti nagapelar iti pagbaludan, nupay ipalubos ti linteg ti Grecia ti kasta.

Kabayatanna, iti sabali pay a panangbista, winaswas ti Supreme Administrative Court dagiti desision ti General Headquarters for National Defense, gapu ta agpayso a mabigbigbig a relihion dagiti Saksi ni Jehova.

Kabayatan ti 15 a bulan a pannakaibalud da Tsirlis ken Kouloumpas idiay Avlona Military Prison, napasaranda ti nakaro a kinadangkok ken nakain-inanaka a pannakatrato a kaduada dagiti dadduma a naibalud a Saksi. Inrakurak ti maysa a damag iti dayta a tiempo “ti nakaar-ariek a kasasaad iti pagbaludan a pagnanaedan [dagiti Saksi ni Jehova], a dinakamatna ti bulok a karne ken ipus dagiti utot, a masansan a maipakan a kadua ti dadduma a taraon, ti panangkissay iti oras ti isasarungkar sigun iti kayat ti Administrasion, ti kinailet ti espasio gapu ta napusek ti selda iti nagadu a balud ken ti nakaro pay a pannakatrato dagita a balud a maigapu iti konsiensiada.”

Kamaudiananna, inabsuelto ti Military Appeal Court da Kabsat Tsirlis ken Kouloumpas ngem maigiddato nga imbilinda nga awan obligasion ti Gobierno a bayadan ti pannakaibaludda agsipud ta “daytoy a pannakaibalud ket gapu iti nakaro a kinaliway dagiti aplikante.” Nangpataud daytoy kadagiti natibker a saludsod iti ummong dagiti autoridad: Asino ti mapabasol iti nakaro a kinaliway? Dagiti Saksi wenno dagiti korte militar?

Dagus a naruk-atan dagiti kakabsat manipud pagbaludan ket naikkatda kamaudiananna iti militar gapu ta ministroda ti relihion. Idi naruk-atandan, inwaragawag ti Amnesty International nga inabrasana ti pannakaruk-at da Dimitrios Tsirlis ken Timotheos Kouloumpas ket inyebkasna ti pananginanama nga iti masakbayan, dagiti ministro a Saksi ni Jehova ket mabalin a din makipaset iti serbisio militar a maitunos kadagiti probision ti linteg ti Grecia. Ngem idi agangay, natungday daytoy a namnama.

Kanayon a Pannakaibalud

Adda sabali pay a nadutokan a ministro ti relihion dagiti Saksi ni Jehova a nagsagaba iti medio naiduma a rigat gapu iti isu met la a rason. Idi Setiembre 11, 1991, nagaplikar ni Anastasios Georgiadis a di makipaset iti serbisio militar iti umasping a pamay-an. Innem nga aldaw kalpasanna, impakaammo ti opisina a nangilista kenkuana kas miembro ti serbisio militar a naibasura ti aplikasionna, agsipud manen ta ti Mangtartarawidwid a Bagi ti Greek Orthodox Church dina akseptaren a dagiti Saksi ni Jehova ket mabigbigbig a relihion. Ket daytoy laisenna ti nailanad iti paglintegan ti Supreme Administrative Court kadagiti kaso da Tsirlis ken Kouloumpas!

Sagudayen ti naisurat a sungbat manipud iti General Headquarters for National Defense: “Natinong ti Administrasion ti di makaay-ayo a desision maipapan iti aplikasion [ni Georgiadis], a naibasar iti eksperto nga opinion ti Mangtartarawidwid a Bagi ti Church of Greece, a di mangibilang kadagiti Saksi ni Jehova kas mabigbigbig a relihion.”​—Kuami dagiti italiko.

Napan ni Georgiadis iti Nafplion Training Camp idi Enero 20 ket dagus a naipisok iti pakadisiplinaan a selda ti kampo. Kalpasanna, nayakar iti Avlona Military Prison.

Idi Marso 16, 1992, inabsuelto ti Military Court of Athens ni Georgiadis. Daytoy ti damo a gundaway a binigbig ti maysa a korte militar idiay Grecia a dagiti Saksi ni Jehova ket agpayso a mabigbigbig a relihion. Isut’ dagus a rinuk-atan ti direktor ti Avlona Military Prison ngem binilinna nga agreport manen iti serbisiona idi Abril 4, idiay center ti Nafplion a pagilistaan iti miembro ti serbisio militar. Kadaydi a petsa, nagkedked manen ni Georgiadis nga agpalista ket naidarum manen iti isusukir iti autoridad, naibalud iti maikadua a gundaway, ken nabista.

Idi Mayo 8, 1992, isut’ inabsuelto ti Military Court of Athens iti baro a kriminal a kaso ngem naikeddeng nga awan ti rumbeng a maibayad kenkuana iti pannakaibaludna. Dagus a naruk-atan ni Georgiadis manipud iti Avlona Military Prison ngem nabilin nga agreport iti maikatlo manen a daras tapno agserbi idiay center ti Nafplion a pagilistaan iti miembro ti serbisio militar idi Mayo 22, 1992! Nagkedked manen nga agpalista ket iti maikatlo a daras naidarum iti isusukir iti autoridad ket naibalud.

Idi Hulio 7, 1992, winaswas ti Supreme Administrative Court ti desision idi Setiembre 1991, gapu ta dagiti Saksi ni Jehova ket agpayso a mabigbigbig a relihion. Idi Hulio 27, 1992, naruk-atan met laengen ni Georgiadis manipud iti Thessalonica Military Prison. Idi Setiembre 10, 1992, isut’ inabsuelto ti Military Court of Thessalonica ngem imbilinna a saan a maikari ni Georgiadis a mabayadan gapu ta ti pannakaibaludna ket naikuna a ‘gapu [manen] iti nakaro a panagliwayna.’

Reaksion ti Adu

Iti panagkomentona maipapan iti kaso ni Georgiadis, kinuna ti European Parliament: “Daytoy a situasion ket maysa a kaso ti panangidumduma a maibusor kadagiti Saksi ni Jehova a ministro ti relihion no maipapan iti prinsipio ti panagpapada iti sidong ti hurisdiksion ti linteg ken ti panangtagiragsak iti kalintegan ti padapada a pannakatrato.”

Idi Pebrero 1992, kinuna ti Amnesty International a “patien[na] a naibalud [ni Anastasios Georgiadis] gapu laeng iti mangidumduma a panangtrato dagiti autoridad ti militar kadagiti ministro a Saksi ni Jehova ket kidkiddawenna ti dagus ken awan kondisionna a pannakaruk-atna kas maysa a balud a maigapu iti konsiensiana.”

Uray ti piskal ti militar iti maysa kadagiti pannakabista ni Georgiadis ti natignay a mangikuna: “Agminar ti idudur-as a nadanonen ti kultura ti kagimongan babaen iti wagas ti panangtamingna kadagiti sumagmamano a situasion a pakainaigan dagiti umilina. No datayo ditoy Grecia ket agragut a ti idudur-as ti kulturatayo ket maitunos kadagiti pagalagadan ti Europa, no kayattayo ti umasenso, masapul ngarud a tungpalentayo dagiti internasional a regulasion ken iwaksitayon ti panangidumduma. Ti benneg nga ad-adda koma a maiparangarang daytoy ket ti panagraem iti indibidual a kalintegan dagiti umili. Nupay kasta, dagiti aktual a pasamak ken taktika ti administrasion nalawag nga ipakitada nga adda pay laeng ti panangidumduma ken ti narelihiosuan a di kinamanagpanuynoy a maibusor kadagiti relihion a minoria. Nalabesen ti madama a kaso.”

Insurat ni Ian White, miembro ti European Parliament, a taga Bristol, Inglatera: “Aglibbi ti adu a rupa iti daytoy a County iti ideya a dagiti Saksi ni Jehova ket di ‘mabigbigbig a relihion.’ Sigurado a nupay bassit ti bilangda, agdindinamag dagiti Saksi iti daytoy a Pagilian ket masansan nga agbalaybalayda.” Iti nasurok a 26,000 a Saksi a mangaskasaba iti Grecia, imposible a ‘saan[da] a mabigbigbig a relihion’!

Nagsurat ti grupo ti sangapulo a miembro ti European Parliament tapno iyebkas ti ungetda iti kaso ni Georgiadis, a kunkunada a “napalalot’ siddaaw ken ladingitda” iti kasta a pannakalabsing dagiti kalintegan ti tao idiay Grecia.

Panagapelar iti European Court of Human Rights

Kalpasan a naabsuelto ken naruk-atanda manipud pagbaludan, amin dagiti tallo a biktima daytoy a narelihiosuan a panangidumduma patienda a rumbeng laeng nga agapelarda iti European Court of Human Rights. Ti nakaibasaran daytoy nga apelasion ket ti di nainkalintegan a pannakaibaludda, a dayta a mismo ket napaneknekan a di umiso, ken ti napasaranda a mental ken pisikal a pannakatutuok, agraman ti nakaro a moral ken sosial nga epekto a nainaig iti maulit-ulit a pannakaipaidam ti wayawayada iti naunday unay a panawen. Gapu kadagitoy a rason, pinagreggetanda a gun-oden ti legal ken maitutop a kantidad ti kompensasion.

Nagkaykaysa nga inkonklusion ti European Commission of Human Rights a kadagiti kaso da Tsirlis ken Kouloumpas, nalabsing ti kalinteganda iti wayawaya ken seguridad ti tao, di nainkalintegan ti pannakaibaludda, ken adda kalinteganda a mabayadan, ken dida sinagrap ti awan panangidumdumana a panangbista ti husgado. Kasta met laeng ti konklusion ti Commission para iti kaso ni Georgiadis.

Nailinteg ti Kinaawan Hustisia

Nayeskediul ti Enero 21, 1997 a pannakabista. Nagadu ti dimmar-ay iti siled a pagukoman, agraman dagiti estudiante manipud iti lokal nga unibersidad, periodista, ken sumagmamano a Saksi ni Jehova manipud Grecia, Alemania, Belgium, ken Francia.

Nagsao ni Mr. Panos Bitsaxis, ti abogado dagiti Saksi, maipapan “ti kanayon a kinabangad ken panangipatangken dagiti autoridad ti Grecia a di mangbigbig iti kaadda ti maysa a relihion ti minoria,” nga isu dagiti Saksi ni Jehova. Binabalawna ti ugali dagiti autoridad iti Grecia nga ibasar ti opisial nga opinionda maipapan kadagiti Saksi iti panangmatmat ti kangrunaan a bumusbusor kadagiti Saksi​—ti Greek Orthodox Church! Kinunana pay: “Sadino pay ngata ti pakadanonan daytoy? . . . Ken agingga kaano?” Nasaona ti “naipaidam a pannakabigbig ti sumagmamano a narelihiosuan a komunidad, panangipaidam a kasla minamaag no makitam a daytat’ direkta, sibabatad, ken pulos a di nainkalintegan, maibusor iti linteg, maibusor iti pinulpullo a desision ti Supreme Administrative Court.”

Pinatalgedan ti pannakabagi ti gobierno iti Grecia ti mangidumduma a kababalin dagiti autoridad iti Grecia babaen ti panangikunana: “Masapul a di liplipatan a gistay ti intero a populasion ti Grecia ket miembro ti Orthodox Church iti adun a siglo. Maysa a natural a resulta daytoy ket ti organisasion dayta nga Iglesia ken ti takder dagiti ministrona ken ti akemda iti Iglesia ket talaga a nalawag. . . . Ti takder dagiti ministro iti Iglesia dagiti Saksi ni Jehova ket saan unay a nalawag.” Anian a nakadidillaw a panangamin iti mangidumduma a panangtrato kadagiti relihion ti minoria iti Grecia!

Naitandudo ti Wayawaya ti Relihion

Nairuar ti desision idi Mayo 29. Ti Presidente ti Husgado a ni Mr. Rolv Ryssdal, binasana ti desision. Ti Korte, a buklen ti siam a hues, nagkaykaysa a dinesisionanda a linabsing ti Grecia dagiti Artikulo 5 ken 6 ti European Convention. Intedna met kadagiti aplikante ti kantidad nga agarup $72,000 para iti kompensasion ken gastos. Kangrunaanna, ti desision inramanna ti adu a makapainteres nga argumento a mangpabor iti wayawaya ti relihion.

Kinuna ti Korte a “dagiti autoridad iti militar sibabatad a dida inkankano” ti kinapudno a dagiti Saksi ni Jehova ket maibilang kas “mabigbigbig a relihion” idiay Grecia, maitunos kadagiti pagannurotan ti Supreme Administrative Court. Inkomentona pay: “Ti nainaig a kinapinget dagiti autoridad a di ibilang dagiti Saksi ni Jehova kas ‘mabigbigbig a relihion’ ken ti panangipuerada kadagiti kalintegan dagiti aplikante iti wayawaya nga ibungana ket mangidumduma no igiddiat iti wagas ti pananggun-od dagiti ministro ti Greek Orthodox Church iti dida pannakipaset.”

Nasaknap a publisidad ti impaay ti warnakan ti Grecia para iti kaso. Inrakurak ti Athens News: ‘Ti Grecia ket nainget a binabalaw ti E[uropean] a korte gapu iti kalikagum dagiti Jehova.’ Ti desision iti kaso a Tsirlis & Kouloumpas and Georgiadis v. Greece ti nangpatibker iti namnama nga itunoston ti Gobierno ti Grecia ti lintegna iti paglintegan ti European Court, tapno masagrapen dagiti Saksi ni Jehova iti Grecia ti wayawaya ti relihion nga awanen ti pannakimitir ti administrasion, militar, wenno relihion. Kasta met a daytoy ti sabali manen a desision nga impaulog ti European Court a maibusor iti husgado ti Grecia maipapan kadagiti banag a mainaig iti wayawaya ti relihion.a

Ipatpateg dagiti Saksi ni Jehova ti wayawayada, ket ikagkagumaanda nga usaren dayta iti panagserbida iti Dios ken panangtulong iti kaarrubada. Inyuli ti tallo a ministro ti relihion dagiti Saksi ti kasoda iti European Court of Human Rights, saan a gapu iti aniaman a material a gunggona, no di ket gapu laeng kadagiti moral ken etikal a rason. Gapuna, aminda a tallo ti nangikeddeng a ti kompensasion a naited kadakuada ket mausarto laeng iti idudur-as ti trabaho a panangisuro dagiti Saksi ni Jehova.

[Footnote]

[Ladawan iti panid 20]

Da Esther ken Dimitrios Tsirlis

[Ladawan iti panid 21]

Da Timotheos ken Nafsika Kouloumpas

[Ladawan iti panid 22]

Da Anastasios ken Koula Georgiadis