Kasano Kapeggad ti Telebision?

Idi Disiembre 18, 1997, inreport dagiti paulo ti damdamag a pinagsakit ti maysa a cartoon iti telebision ti adu idiay Tokyo, Japan. Ginasut ti nayospital. “Nagbakuar iti dara ti dadduma nga ubbing ket natalimudaw wenno napukawan iti puot dagiti dadduma,” impadamag ti The New York Times. “Mamakdaar dagiti doktor ken sikologo a daytoy a pasamak ket makapakellaat a palagip no kasano kalaka a maimpluensiaan dagiti ubbing kadagiti sumagmamano nga agdama a pabuya iti telebision.”

Kinuna ti Daily News ti New York: “Nagkullayaw ti Japan idi kalman kalpasan a ti burangen a cartoon iti telebision ti nangimulagat iti nalabbasit a matmatana ket ginasut nga ubbing ti natalimudaw iti intero a nasion.

“Dandani 600 nga ubbing ken sumagmamano nga adulto ti naipan a dagus kadagiti kuarto ti emerhensia idi rabii ti Martes kalpasan ti panagbuyada . . . iti maysa a cartoon iti telebision.” Dadduma ti naipan kadagiti intensive care unit, agsipud ta marigatanda nga aganges.

Inlawlawag ni Yukiko Iwasaki, ti ina ti maysa a walo ti tawenna nga ubing: “Nagkullayawak a nakakita a naawanan iti puot ti balasitangko. Naganges laeng manen idi a binautko ti bukotna.”

Saan a nailawlawag dagiti producer dagiti programa ti telebision a para-ubbing no kasano a ti animation technique nga imbagada a nausaren iti “ginasut a daras” ti nakaigapuan ti kasta a napeggad, naranggas a reaksion.

Agsipud ta ammoda dagiti napeggad nga epekto ti panagbuya iti telebision, siaannad nga imonmonitor ti dadduma a nagannak ti panagbuya iti telebision wenno inikkatda payen ti telebision iti pagtaenganda. Insurat ti maysa nga ama idiay Allen, Texas, E.U.A., a sakbay nga inikkatda ti telebision iti pagtaenganda, “saan unay a mangikaskaso, alusiisen, saan unay a makikooperar, ken nakaro ti panagsikor” dagiti annakda. Inlawlawagna pay: “Ita, dandani tunggal maysa kadagiti lima nga annakmi​—nga agtawen iti 6 agingga iti 17​—​ket estudiante a kanayon a kangangatuan ti gradoda. Agsipud ta didan agbuybuya iti telebision, nabiit a napatanorda ti nadumaduma a paginteresan agraman ti isports, panagbasa, arte, panagusar iti computer, kdpy.

“Ti maysa a nangnangruna a nakalalagip a banag ket napasamak agarup dua a tawenen ti napalabas. Ti barok, nga agtawen idi iti 9, ket nagtelepono manipud iti agpatnag a padaya ti maysa a gayyem, a sadiay ti pagturogan ti amin a dimmar-ay, ta kayatnan ti agawid . . . Idi dinagasko ket dinamagko no ania ti problema, kinunana, ‘Makapasikor unay. Ti laeng kayatda ket agtugaw ken agbuya iti telebision!’”